Okɛ Osusuma Fɛɛ Atsu Nii yɛ Shiɛmɔ Nitsumɔ lɛ Mli
Fa 2—Miishɛɛ ni Oooha Afa
1 Ewaaa akɛ wɔɔnya nitsumɔ ko he yɛ be mli ni wɔkɛ wɔhe woɔ mli lɛ. Ni eji anɔkwale hu akɛ mɔ ko naa nɔ ko feemɔ he miishɛɛ yɛ be mli ni esaa ehe kɛha nakai nii lɛ. Nakai nɔŋŋ eji anɔkwale hu yɛ wɔ sɔɔmɔ nitsumɔ lɛ ni wɔɔha emɔ shi lɛ mli.—2 Tim. 4:5.
Hesaamɔ He Miihia
2 Miishɛɛ ni wɔnaa yɛ shiɛmɔ mli lɛ kɔɔ bɔ ni wɔsaa wɔhe jogbaŋŋ wɔhaa kɛ shii abɔ ni wɔkɛ wɔhe woɔ sɔɔmɔ lɛ mli lɛ he diɛŋtsɛ. Akɛ nɔkwɛmɔ nɔ lɛ, kɛ mɔ ni wɔkɛ kpe yɛ shia kɛ shia sɔɔmɔ lɛ mli lɛ jie ehe kpo akɛ Muslimnyo lɛ, mɛni wɔbaanyɛ wɔkɛɛ? Shiɛlɔ ni esaa ehe jogbaŋŋ lɛ baanyɛ akɛɛ akɛ: Ojogbaŋŋ Mikɛ Muslimbii pii ewieko. Shi mikane saji fioo ko ni kɔɔ nyɛjamɔ lɛ tsɔɔmɔi ahe yɛ wolo ni mihiɛ nɛɛ mli. [Gbelemɔ Reasoning wolo lɛ baafa 23.] Ekɛɔ akɛ nyɛheɔ nyɛyeɔ akɛ Yesu ji gbalɔ, shi Muhammad ji naagbee gbalɔ kɛ mɔ ni he hiaa fe fɛɛ. Ani jeee nakai? [Ha eha hetoo.] Ani oheɔ oyeɔ hu akɛ Mose ji anɔkwa gbalɔ? [Ha eha hetoo, ekolɛ ebaakpɛlɛ nɔ.] Ani mitsɔɔ bo nɔ ni Mose kase kɛɔ Nyɔŋmɔ ŋɔɔ yɛ Nyɔŋmɔ gbɛi diɛŋtsɛ lɛ he yɛ Ŋmalɛi Krɔŋkrɔŋi lɛ amli? Kɛkɛ lɛ obaanyɛ okane 2 Mose 6:3. Obaanyɛ otsɔ nɛkɛ gbɛ nɔ oje sanegbaa ni ŋɔɔ shishi.
3 Ewa kɛha wɔteŋ mɛi pii akɛ wɔɔkai baafai komɛi ayibɔ okadii. Shi kɛ wɔsaa wɔhe jogbaŋŋ fioo ni wɔti mli wɔkwɛ lɛ, wɔbaanyɛ wɔkɛ efa ni ji “Conversation Stoppers” ni bɛŋkɛ Reasoning wolo lɛ shishijee gbɛ lɛ atsu nii. Nɔ ni fata fa nɛɛ he ji baafai pii ni kɔɔ saji ni yeɔ buaa wɔ koni wɔha gbɔmɛi ni kɛɔ akɛ amɛjɛ jamɔ pɔtɛɛ ko mli lɛ hetoo.
4 Reasoning wolo lɛ yɛ efa ko hu ni kɔɔ hiɛkpamɔ wiemɔi ahe. Mɛni hewɔ okɛ ohiɛkpamɔ wiemɔi lɛ etooo enɛɛmɛi ahe? Ehe baahia ni wɔkɛ wɔwiemɔ lɛ ato shihilɛ lɛ he. Nɔ ni yɔɔ Reasoning wolo lɛ mli saji babaoo anaagbee gbɛ lɛ, fa ko ni kɛɔ akɛ ‘Kɛji akɛ Mɔ Ko Kɛɛ,’ ni enɛ kɛ hetoo haa sanebimɔi loo shitee-kɛ-woo pɔtɛɛ komɛi ni kɔɔ sane lɛ he lɛ. Shi nɛkɛ nibii kpakpai nɛɛ fɛɛ he baaba sɛɛnamɔ kɛji akɛ wɔkɛtsu nii yɛ wɔhesaamɔ mli.
Gbɛ ni Atsɔɔ nɔ Asaa He
5 Ha ohiɛ ahi woji ni abaasusu he yɛ Sɔɔmɔ Kpee lɛ mli lɛ anɔ, ni hiɛmɔ enɛɛmɛi ekomɛi yɛ be mli ni asusuɔ he ni afeɔ he nɔkwɛmɔ nɔ lɛ. Nɛkɛ gbɛ nɔ mɛi krokomɛi ahesaamɔ baaba sɛɛnamɔ aha bo yɛ.
6 Sɛɛnamɔ yɛ be ni ooofite ni okɛsaa ohe kɛha shiɛmɔ lɛ he. Kwɛmɔ akɛ onine eshɛ woji ni he hiaa bo lɛ anɔ lo. Okɛ be fioo akwɛ Saneyitso Kɛha Sanegbaa lɛ mli. Tii ŋmalɛi ni akɛtsuɔ nii lɛ mli ni otao saji titrii ni okɛbaatsu nii yɛ wolo ni akɛhaa lɛ mli. Sɛɛnamɔ baaba he kɛ nyɛfee enɛ akɛ weku.
7 Kaa efeemɔ okwɛ. Obaanyɛ ofee enɛ yɛ bei sɔrɔtoi amli—beni akpa Asafo Woloŋ Nikasemɔ, yɛ amɛhiɛtserɛjiemɔi ashishi, yɛ kui amli, beni ajɛ shia kome kɛmiiya ekroko mli. Shiɛmɔ wiemɔi nɛɛ ahamɔ, kɛ amɛhe susumɔ kɛ bɔ ni atsuɔ shitee-kɛ-wooi ahe nii ahaa lɛ baanyɛ afee miishɛɛ be ni ebaaha wɔna hegbɛ ni wɔha wɔhe asa babaoo.
8 Hesaamɔ kɛ hiɛdɔɔ baaha wɔna sɔɔmɔ nitsumɔ lɛ he miishɛɛ koni eha wɔtsɔmɔ nitsumɔ ni he esa ni wɔtsui anyɔ wɔmli.—Yoh. 2:17.