Okɛ Obe Atsu Nii Jogbaŋŋ yɛ Shiɛmɔ Nitsumɔ lɛ Mli
1 Ekã shi faŋŋ akɛ babaoo yɛ ni wɔbaatsu yɛ shiɛmɔ nitsumɔ lɛ mli, shi be ni eshwɛ lɛ faaa dɔŋŋ. (Yoh. 4:35; 1 Kor. 7:29) Kɛ́ wɔto gbɛjianɔ jogbaŋŋ ní wɔsaa wɔhe kɛtsɔ hiɛ lɛ, wɔbaanyɛ wɔkɛ be babaoo atsu nii yɛ shiɛmɔ nitsumɔ lɛ mli.
2 Saamɔ Ohe: Dani obaaya kpee kɛha shiɛmɔyaa lɛ, bɔɔ mɔdɛŋ ni okɛ wolo ni okɛbaatsu nii lɛ aya, ni oha shiɛmɔ wiemɔ ni okɛbaatsu nii lɛ ahi ojwɛŋmɔ mli. Kɛ́ asɔle kɛmu kpee kɛha shiɛmɔyaa lɛ naa lɛ, jee shiɛmɔ lɛ shishi amrɔ nɔŋŋ. Enɛ baaha bo kɛ mɛi ni okɛtsuɔ nii lɛ aná be babaoo kɛtsu shiɛmɔ nitsumɔ lɛ.
3 Kɛ́ ahala bo akɛ okwɛ kpee kɛha shiɛmɔyaa lɛ nɔ lɛ, jee shishi yɛ be naa. Ha kpee lɛ afee kuku—ekaye fe minitii 10 kɛmiimɔ 15. Dani abaashi kɛya lɛ, bɔɔ mɔdɛŋ akɛ obaaha mɔ fɛɛ mɔ ale heni ebaatsu nii yɛ, kɛ mɔ ni ekɛbaatsu nii.
4 Beni Oshiɛɔ Lɛ: Kɛ́ eeehi lɛ, susumɔ be ni mɔ fɛɛ mɔ baaye yɛ shiɛmɔ nitsumɔ lɛ mli lɛ he dani oja. Ebaafee nɔ ni hi waa akɛ shiɛlɔi aaatsu nii enyɔnyɔɔnyɔ, ja shihilɛ ko ni baaha efee oshara waa ko yɛ. Enɛ kɛ nɔkwɛmɔnɔ ni Yesu fee lɛ kpãa gbee, ni ehaa mɔ fɛɛ mɔ kɛ ebe tsuɔ nii jogbaŋŋ yɛ shiɛmɔ nitsumɔ lɛ mli. (Luka 10:1; Ato Wɔhe Gbɛjianɔ, bf. 86, kk. 1; bf. 108, kk. 2; km-GA 10/04 bf. 8) Kɛ́ nyɛmiitsu nii akɛ kuu lɛ, susumɔ mɛi krokomɛi ni ekolɛ amɛmiimɛ ni ogbe sane ni okɛ shiatsɛ ko susuɔ he lɛ naa lɛ ahe. Enɛ baabi ni ekolɛ okɛ hiɛshikamɔ ashi mɔ ko ni miitaa sane naa, loo oto gbɛjianɔ ni oku osɛɛ oyasara mɔ ko ni ená wiemɔ lɛ he miishɛɛ lɛ.—Mat. 10:11.
5 Bɔni afee ni okanyiɛ nyiɛmɔ ni sɛɛnamɔ bɛ he kɛ́ oofee sɛɛkuu-kɛsaramɔ lɛ, too gbɛjianɔ ni oyasara mɛi ni yɔɔ akutso kome mli lɛ fɛɛ dani oshi kɛya akutso kroko mli. Ekolɛ ebaahi ni otswa aŋkroaŋkroi komɛi tɛlifoŋ ni oná nɔmimaa akɛ amɛbaahi shĩa. (Abɛi 21:5) Kɛ́ ona akɛ obaatsɛ yɛ sɛɛkuu-kɛsaramɔ ko mli lɛ, obaanyɛ oto gbɛjianɔ koni oha mɛi ni yɔɔ okuu lɛ mli lɛ ayashiɛ yɛ he ko ni bɛŋkɛ loo amɛyafee sɛɛkuu-kɛsaramɔi krokomɛi.
6 Be ní wɔyɔɔ mli lɛ ji be kɛha mumɔŋ nikpamɔ ni fá waa. (Mat. 9:37, 38) Etsɛŋ ni nitsumɔ lɛ baaba naagbee. No hewɔ lɛ, oti ni esa akɛ ema wɔhiɛ ji ni wɔkɛ wɔbe atsu nii jogbaŋŋ yɛ shiɛmɔ nitsumɔ lɛ mli.