Dɛhiɛmɔ Wolo He Tafãa Krɛdɛɛ Kɛjɛ October 20 Kɛyashi November 16!
1 Kɛjɛ Ju, October 20 aahu kɛyashi otsii ejwɛ ni baanyiɛ sɛɛ lɛ, wɔkɛ wɔhe baawo dɛhiɛmɔ wolo hee ko ni yitso ji Ani Obaasumɔ ní Ole Anɔkwale Lɛ? jaa mli. Wɔshwelɛ ji akɛ, tafãa krɛdɛɛ ni baaya nɔ yɛ jeŋ fɛɛ nɛɛ baaha mɛi babaoo anya anɔkwale jɛɛhe kome pɛ lɛ he.—Yoh. 17:17.
2 Dɛhiɛmɔ wolo lɛ kɛ Biblia mli hetooi ni ja kɛha sanebimɔi ekpaa komɛi ni he hiaa lɛ haa: “Ani Nyɔŋmɔ susuɔ wɔhe lɛɛlɛŋ?” “Ani ta kɛ amanehulu sɛɛ baafo be ko?” “Mɛni baa wɔnɔ kɛ́ wɔgboi?” “Ani hiɛnɔkamɔ ko yɛ kɛha mɛi ni egboi lɛ?” “Mɛɛ gbɛ nɔ matsɔ masɔle ní Nyɔŋmɔ abo mi toi?” kɛ “Te mafee tɛŋŋ maná miishɛɛ yɛ shihilɛ mli?” Kristendom sɔlemɔi lɛ kɛ sanebimɔi nɛɛ ahetoo ni haa mɔ tsui nyɔɔ emli hako dã. Mɛi ni amɛjeee Kristofoi po lɛ esusu saji nɛɛ ahe, shi ekolɛ amɛleee akɛ hetooi ni yɔɔ faŋŋ yɛ Biblia lɛ mli. No hewɔ lɛ, wɔmiikpá gbɛ akɛ mɛi babaoo baanya sane nɛɛ he.
3 Tsu Oshikpɔŋkuku lɛ Mli Nii Kɛmɔ Shi: Bɔɔ mɔdɛŋ akɛ obaatsu shĩa kɛ shĩa nitsumɔ lɛ yɛ oshikpɔŋkuku lɛ mli nii kɛmɔ shi bɔ ni ooonyɛ. Kɛ́ oshikpɔŋkuku lɛ da waa lɛ, ekolɛ onukpai lɛ baawo bo hewalɛ ni oshi dɛhiɛmɔ wolo lɛ eko yɛ mɛi ni bɛ shĩa lɛ ashinaai anaa kɛ otee jɛmɛ klɛŋklɛŋ kwraa. Kaimɔ ni okɛ eko aha okutsoŋbii, owekumɛi, onanemɛi nitsulɔi loo skulbii, kɛ mɛi ni okɛ amɛfɔɔ sanegbaa. Ekolɛ obaanyɛ oto gbɛjianɔ ni okɛ ohe awo gbɛgbalɔi awamɔ nitsumɔ lɛ mli yɛ October kɛ November mli. Ani oyɛ bi ko loo Biblia mli nikaselɔ ko ní miiya ehiɛ yɛ mumɔŋ ní ekolɛ ehe baasa akɛ shiɛlɔ ní abaptisiko lɛ ni baanyɛ efata wɔhe yɛ tafãa nɛɛ mli? Kɛ́ nakai ni lɛ, wó onukpai lɛ atoi nɔ.
4 Nɔ ni Obaakɛɛ: Bɔni afee ni onyɛ okɛ sane lɛ aha mɛi babaoo lɛ, ebaafee nɔ ni sa akɛ obaaha oshiɛmɔ wiemɔ lɛ afee kuku. Bi shiatsɛmɛi lɛ sanebimɔi ekpaa ni yɔɔ wolo lɛ sɛɛ lɛ ateŋ ekome, ni otsɔɔ amɛ hetoo lɛ yɛ dɛhiɛmɔ wolo lɛ mli. Enɛ baaha shiɛlɔi fɛɛ ato amɛshiɛmɔ wiemɔ lɛ he gbɛjianɔ bɔ ni ehe baaba sɛɛnamɔ aha mɛi ni yɔɔ shikpɔŋkuku lɛ mli lɛ. Kɛ́ mɔ ko jie miishɛɛ kpo lɛ, ŋmãa ofɔ̃ shi, koni oku osɛɛ oyasara lɛ ekoŋŋ. Abaanyɛ akɛ woji tɛtrɛbii lɛ kɛ dɛhiɛmɔ wolo lɛ fɛɛ aha yɛ otsii lɛ anaagbee. Kɛ́ tafãa lɛ ba naagbee yɛ November 16 lɛ, wɔkɛ Biblia lɛ Tsɔɔ wolo lɛ baaha. Kɛ́ dɛhiɛmɔ wolo lɛ eko shwɛ lɛ, akɛbaatsu nii tamɔ bɔ ni akɛ dɛhiɛmɔ woji krokomɛi lɛ tsuɔ nii lɛ nɔŋŋ.
5 Jee Biblia Mli Nikasemɔ Shishi: Ato dɛhiɛmɔ wolo nɛɛ he gbɛjianɔ koni eye ebua wɔ ni wɔnyɛ wɔje Biblia mli nikasemɔ shishi. Kɛ́ oku osɛɛ oyasara mɔ ni jie miishɛɛ kpo lɛ, obaanyɛ obi lɛ Biblia mli anɔkwale ní ha emii shɛ ehe loo etsui nyɔ emli. Gbálamɔ ejwɛŋmɔ kɛya wolo lɛ sɛɛ heni atsɔɔ bɔ ni wɔfeɔ Biblia mli nikasemɔ wɔhaa lɛ mli yɛ lɛ, ní oha lɛ Biblia lɛ Tsɔɔ wolo lɛ eko. Kɛ́ ebaahi lɛ, okɛlɛ asusu kuku kome loo enyɔ ko he kɛjɛ saneyitso ni wieɔ sane ni etsɔɔ lɛ he.
6 Yehowa miitao mɛi ni baajá lɛ “yɛ mumɔ kɛ anɔkwale mli.” (Yoh. 4:23) Eba akɛ wɔ fɛɛ wɔkɛ wɔhe baawo tafãa krɛdɛɛ nɛɛ mli, koni wɔkɛye wɔbua mɛi krokomɛi ní amɛbale anɔkwale lɛ!