Ani Osaa Ohe Oto Oshara?

Nɔ ko baanyɛ aba trukaa ní baabi ni akɛ mɔ aya helatsamɔhe. (Yak. 4:14) No hewɔ lɛ, hiɛtɛ̃lɔ saa ehe jogbaŋŋ etoɔ. (Abɛi 22:3) Ani okpɛ oyiŋ yɛ tsofafeemɔi kɛ helatsamɔ gbɛi ni obaasumɔ ni akɛtsu nii aha bo lɛ he, ni oŋmala oyiŋkpɛi lɛ oshwie shi? Afee vidio ni ji Transfusion-Alternative Health Care—Meeting Patient Needs and Rights lɛ koni akɛye abua bo, ni no ji vidio enyɔ nɔ yɛ DVD ni yitso ji Transfusion-Alternatives—Documentary Series lɛ nɔ. Beni okwɛɔ vidio lɛ, kwɛmɔ akɛ obaanyɛ oha sanebimɔi ni nyiɛ sɛɛ nɛɛ ahetoo lo. Akɛni opireshɛnfeemɔ he mfonirii fioo komɛi yɛ vidio nɛɛ mli hewɔ lɛ, esa akɛ fɔlɔi akwɛ kɛji esa akɛ amɛbii bibii lɛ akwɛ vidio nɛɛ.

(1) Mɛni hewɔ datrɛfoi kɛ nɛɛsifoi komɛi miitsake amɛjwɛŋmɔ yɛ lá ni ahaa mɔ lɛ he lɛ? (2) Tsĩi opireshɛŋ srɔtoi etɛ ni feemɔ wa ni anyɛ afee ni ahaaa mɔ lá lɛ atã. (3) Yɛ jeŋ fɛɛ lɛ, mɛni hewɔ datrɛfoi kɛ opireshɛŋfeelɔi akpei abɔ miisumɔ ni amɛtsá mɛi ní amɛhaaa lá lɛ? (4) Mɛni niiamlipɛimɔi ni afee nyɛsɛɛ nɛɛ yɛ helatsamɔhei lɛ eha ana yɛ lá kɛnitsumɔ he? (5) Mɛɛ helatsamɔŋ osharai yɔɔ lá ni ahaa mɔ lɛ he? (6) Mɛɛ sɛɛnamɔi datrɛfoi babaoo ni he esa lɛ etsɔɔ akɛ eyɔɔ nibii krokomɛi ni akɛyeɔ lá ni ahaa mɔ lɛ najiaŋ lɛ he? (7) Mɛni haa mɔ lá nɔ gbɔɔ, ni mɛni abaanyɛ afee kɛtsu lá ni nɔ egbɔ lɛ he nii? (8) Mɛɛ gbɛ nɔ abaanyɛ atsɔ aha walayibii tsuji ni yɔɔ helatsɛ ko gbɔmɔtso mli lɛ afa? (9) Mɛɛ ŋaa gbɛi akɛtsuɔ nii koni lá pii akaho kɛ́ aafee opireshɛŋ? (10) Ani abaanyɛ akɛ nibii krokomɛi ni akɛyeɔ lá najiaŋ lɛ atsu gbekɛbii bibii loo mɛi ni wala yɔɔ oshara mli lɛ ahe nii? (11) Mɛni ji shishitoo mlai ni he hiaa waa yɛ helatsɛmɛi akwɛmɔ mli lɛ ateŋ ekome?

Akɛni mɔ fɛɛ mɔ baadamɔ ehenilee nɔ ekpɛlɛ tsofafeemɔ gbɛi ni je kpo yɛ vidio lɛ mli lɛ ateŋ ekomɛi anɔ hewɔ lɛ, kaamɛ ni oshara ko nina bo dani okpɛ oyiŋ yɛ nɔ ni obaasumɔ kɛ nɔ ni osumɔɔɔ he. “Nyɔŋmɔ Suɔmɔ” wolo lɛ yitso 7 lɛ, kɛ woji krokomɛi ni atsɛ yisɛɛ yɛ nakai yitso lɛ mli, kɛ agbɛnɛ hu, nɔ ni aŋma ahɔ December 2006 Wɔ Maŋtsɛyeli Sɔɔmɔ lɛ mli lɛ baaye abua bo koni okpɛ yiŋ ni ja. No sɛɛ lɛ, kɛ́ oji mɔ ni abaptisi lɛ lɛ, ŋmalamɔ oyiŋkpɛi lɛ owo DPA wolo lɛ nɔ, ni oha ehi ohe be fɛɛ be.

[Wiemɔ ni akɔ ni akɛmiitsu nii ni yɔɔ baafa 3]

Ani okpɛ oyiŋ yɛ tsofafeemɔi kɛ helatsamɔ gbɛi ni obaasumɔ ni akɛtsu nii aha bo lɛ he, ni oŋmala oyiŋkpɛi lɛ oshwie shi?