Maŋtsɛyeli Lalai Hãa Anáa Ekãa

Be ni awo Paulo kɛ Sila tsuŋ lɛ, amɛlá kɛjie Nyɔŋmɔ yi. (Bɔf 16:25) Yɛ wɔ bei nɛɛ amli hu lɛ, wɔnyɛmimɛi héyelilɔi lɛ lá Maŋtsɛyeli lalai be ni awo amɛ tsuŋ yɛ Sachsenhausen yiwalɛ nsara lɛ mli, yɛ Nazi Germany, kɛ be ni amɛyɔɔ nomŋɔɔ mli yɛ Siberia lɛ. Nɔkwɛmɔnii nɛɛ hãa wɔnaa bɔ ni lalai baanyɛ ahã Kristofoi ni kɛ kai miikpe lɛ aná ekãa kɛkpee naa.

Etsɛŋ, abaaná lalawolo hee ni yitso ji, ‘Lá Kɛ Miishɛɛ’ Ohã Yehowa lɛ yɛ wiemɔi babaoo mli. Kɛ́ wɔnine shɛ nɔ nɔŋŋ lɛ, wɔbaanyɛ wɔkpe emli wiemɔi lɛ wɔwo wɔyitsoŋ, kɛtsɔ fɔ ni wɔbaafɔ lámɔ yɛ wɔweku jamɔ shishi lɛ nɔ. (Efe 5:19) Kɛkɛ lɛ, mumɔ krɔŋkrɔŋ lɛ baawa wɔ ni wɔkai kɛ́ wɔkɛ kai kpe. Maŋtsɛyeli lalai baanyɛ aye abua wɔ ni wɔkɛ wɔjwɛŋmɔ ama wɔhiɛnɔkamɔ lɛ nɔ. Ebaanyɛ ewaje wɔ kɛ́ wɔkɛ kai miikpe. Ni be ni wɔmii eshɛ wɔhe lɛ, lalai lɛ amli wiemɔi ni woɔ mɔ hewalɛ lɛ hãa ‘wɔwoɔ wɔgbee nɔ kɛ nyamɔ,’ ejaakɛ wɔyɛ tsuijurɔ. (1Kr 15:16; La 33:1-3) Nyɛhãa wɔbɔa mɔdɛŋ wɔkasea wɔ-Maŋtsɛyeli lalai lɛ ni wɔlá!

KWƐMƆ VIDIO NI YITSO JI, LALA KO NI KANYA MƐI YƐ TSUŊWOOHE LƐ, KONI NO SƐƐ LƐ, OHÃ SANEBIMƆI NI NYIƐ SƐƐ NƐƐ AHETOO:

• Mɛɛ shihilɛi hã Nyɛminuu Frost fo lala lɛ?

• Mɛɛ gbɛ nɔ lala lɛ waje nyɛmimɛi ni yɔɔ Sachsenhausen yiwalɛ nsara lɛ mli lɛ?

• Mɛɛ shihilɛi obaanyɛ okɛkpe daa gbi ní Maŋtsɛyeli lalai lɛ baanyɛ awo bo hewalɛ kɛkpee naa?

• Mɛɛ Maŋtsɛyeli lalai obaasumɔ ni okpe owo oyitsoŋ?