“Nyɛhiɛa Ekomefeemɔ Ni Nyɛtsɔ Mumɔ Lɛ Nɔ Nyɛná Lɛ Mli”
BƆFO PAULO wo nyɛmimɛi ni yɔɔ Efeso lɛ hewalɛ ni ‘amɛná tsui amɛhãhãa amɛhe yɛ suɔmɔ mli, ni amɛbɔ mɔdɛŋ waa amɛhiɛ ekomefeemɔ ni amɛtsɔ mumɔ lɛ nɔ amɛná lɛ mli, yɛ toiŋjɔlɛ ni tamɔ kpãa ni fiɔ amɛ efeɔ amɛ ekome lɛ mli.’—Efe. 4:2, 3.
Ŋmalɛ lɛ kɛɛ, “mumɔ lɛ,” ni ji Nyɔŋmɔ hewalɛ lɛ, ji nɔ ni hãa “ekomefeemɔ” hiɔ wɔteŋ. Shi tamɔ bɔ ni Paulo wie lɛ, esa akɛ wɔbaa ekomefeemɔ ni yɔɔ wɔteŋ nɛɛ yi. Enɛ tsɔɔ akɛ, sɔ̃ kã mi kɛ bo fɛɛ nɔ akɛ wɔbaakwɛ ni ekomefeemɔ nɛɛ akafite.
Akɛ nɔkwɛmɔnɔ lɛ, ŋɔɔ lɛ akɛ mɔ ko ke bo tsɔne hee. Kɛ́ okwɛ lɛ, namɔ sɔ̃ kã enɔ akɛ ekwɛ ni tsɔne lɛ akafite? Hetoo lɛ yɛ faŋŋ; bo, aloo jeee nakai? No hewɔ lɛ, kɛ́ okwɛɛɛ tsɔne lɛ jogbaŋŋ ni efite lɛ, onyɛŋ oshwa mɔ ni kɛke bo lɛ.
Tamɔ nɔkwɛmɔnɔ nɛɛ ehã wɔna lɛ, eyɛ mli akɛ Nyɔŋmɔ kɛ ekomefeemɔ edro wɔ moŋ, shi eji wɔteŋ mɔ fɛɛ mɔ sɔ̃ akɛ ebaakwɛ ni ekafite. No hewɔ lɛ, kɛ́ okɛ nyɛmi ko teŋ bɛ jogbaŋŋ lɛ, obaanyɛ obi ohe akɛ, ‘Ani migbɛfaŋ lɛ, miifee bɔ fɛɛ bɔ ni manyɛ koni masaa naagba ni yɔɔ mi kɛ lɛ teŋ lɛ koni ekomefeemɔ ni yɔɔ asafo lɛ mli lɛ akafite?’
ESA AKƐ ‘WƆBƆ MƆDƐŊ WAA’ KONI EKOMEFEEMƆ AYA NƆ AHI WƆTEŊ
Paulo wiemɔ lɛ hãa wɔnaa akɛ, jeee be fɛɛ be eyɔɔ mlɛo akɛ wɔbaahã ekomefeemɔ aya nɔ ahi wɔ kɛ wɔnyɛmimɛi lɛ ateŋ, titri lɛ kɛ́ amɛteŋ mɔ ko fee wɔ nɔ ko ni gba wɔnaa waa. Kɛ́ wɔnyɛmi ko tɔ̃ wɔnɔ lɛ, ani ja wɔyana lɛ ni wɔwie sane lɛ he dani wɔbaanyɛ wɔŋmɛɛ he? Jeee doo. Nɔ ko ni baaye abua bo ni ona kɛji esa akɛ oyana nyɛmi lɛ ji ni obaabi ohe akɛ, ‘Kɛ́ miyana lɛ lɛ, ani no baahã toiŋjɔlɛ aba mi kɛ lɛ teŋ loo ebaahã sane lɛ mli awo wu moŋ?’ Bei komɛi lɛ, ehi akɛ wɔkɛbaake mɔ lɛ ni wɔkɛ lɛ eyawieee he po.—Abɛi 19:11; Mar. 11:25.
Bi ohe akɛ, ‘Kɛ́ miyana lɛ lɛ, ani no baahã toiŋjɔlɛ aba mi kɛ lɛ teŋ loo ebaahã sane lɛ mli awo wu moŋ?’
Tamɔ bɔ ni bɔfo Paulo wie lɛ, esa akɛ wɔya nɔ ‘wɔná tsui wɔhãhãa wɔhe yɛ suɔmɔ mli.’ (Efe. 4:2) Wolo ko wie akɛ, abaanyɛ atsɔɔ nɔ ni Paulo wie lɛ shishi akɛ “bɔ ni amɛyɔɔ lɛ, mɔ mli nakai.” Enɛ tsɔɔ akɛ, wɔkpɛlɛɔ nɔ akɛ wɔnyɛmimɛi lɛ yeee emuu tamɔ bɔ ni wɔyeee emuu lɛ nɔŋŋ. Eji anɔkwale akɛ, wɔ fɛɛ wɔmiimia wɔhiɛ ni wɔwo “gbɔmɔ hee” lɛ. (Efe. 4:23, 24) Shi ekã shi faŋŋ akɛ, wɔnyɛŋ wɔfee nakai jogbaŋŋ kɛmɔ shi. (Rom. 3:23) Kɛ́ wɔhã enɛ hi wɔjwɛŋmɔ mli lɛ, ebaahã efee mlɛo akɛ wɔbaaná tsui wɔhã he, ni wɔkɛ tɔmɔi ake. Kɛ́ wɔfee nakai lɛ, ebaahã ekomefeemɔ aya nɔ ahi wɔteŋ.
Kɛ́ wɔkɛ wɔnyɛmimɛi lɛ atɔmɔi ke amɛ, ni wɔjie amɛhe mlifu yɛ wɔtsui mli lɛ, toiŋjɔlɛ kɛ ekomefeemɔ baahi wɔteŋ. Greek wiemɔ ni Paulo kɛtsu nii yɛ Efesobii 4:3 lɛ shishi ji nɔ ko ni mɔɔ nɔ ko etsaa, ni nakai Greek wiemɔ lɛ nɔŋŋ atsɔɔ shishi yɛ Kolosebii 2:19 lɛ akɛ “talɔi-amli-loi” lɛ. Bɔ ni talɔi-amli-loi mɔɔ wui enyɔ kɛtsaa lɛ, nakai nɔŋŋ toiŋjɔlɛ kɛ suɔmɔ ni yɔɔ wɔ kɛ wɔnyɛmimɛi lɛ ateŋ lɛ baahã wɔya nɔ wɔkpɛtɛ amɛhe kɛ́ amɛfee wɔ nɔ ko ni gba wɔnaa po.
No hewɔ lɛ, kɛ́ nyɛmi ko tɔ̃ onɔ, efee bo nɔ ko ni dɔ bo loo ewo omli la lɛ, bɔɔ mɔdɛŋ ni okɛ ojwɛŋmɔ ama sui kpakpai ni eyɔɔ lɛ anɔ moŋ fe nɔ ni efee bo lɛ. (Kol. 3:12) Akɛni wɔ fɛɛ wɔyeee emuu hewɔ lɛ, ŋwanejee ko bɛ he akɛ, bo hu ofee mɔ ko nɔ ko ni egba enaa pɛŋ. Kɛ́ ohã enɛ hi ojwɛŋmɔ mli lɛ, ebaaye ebua bo ni kɛ́ naagba ba okɛ mɔ ko teŋ lɛ, ofee bɔ fɛɛ bɔ ni obaanyɛ kɛsaa naagba lɛ, koni ekomefeemɔ ni yɔɔ asafo lɛ mli lɛ akafite.