Ani World Cup Lɛ Baanyɛ Afee Mɛi Ekome Lɛɛlɛŋ?​—Mɛni Biblia Lɛ Kɛɔ Yɛ He?

Aakpa gbɛ akɛ mɛi aaafee akpekpe toi akpei enumɔ baakwɛ FIFA World Cup ni aatswa kɛjɛ November 20 kɛyashi December 18, 2022 lɛ. Mɛi pii susuɔ akɛ, shwɛmɔi loo kpɔiaŋgbɔlemɔ nifeemɔi tamɔ nɛkɛ lɛ feɔ babaoo fe bɔ ni ehãa mɛi nuɔ he akɛ amɛfee ekome be ni amɛkwɛɔ lɛ.

• “Spɔts baanyɛ ekɛtsake je lɛ. Ebaanyɛ ehã mɛi afee nibii kpakpai. Ehãa mɛi feɔ ekome yɛ gbɛ ni sa kadimɔ waa nɔ.”​—Nelson Mandela, South Africa tsutsu maŋ hiɛnyiɛlɔ.

• “Futbɔl . . . feɔ mɛi ekome, ejaakɛ ehãa mɛi nuɔ he akɛ “amɛyɛ hiɛnɔkamɔ, ehãa amɛmii shɛɔ amɛhe, ekanyaa amɛ, ehãa amɛsumɔɔ mɛi asane, ni ehãa amɛnuɔ he akɛ tsakpãa ko yɛ amɛ kɛ mɛi lɛ ateŋ.”​—Gianni Infantino, FIFA sɛinɔtalɔ.a

Ani World Cup lɛ loo spɔts ko yɛ ni baanyɛ afee nibii kpakpai nɛɛ fɛɛ? Ani hiɛnɔkamɔ ko yɛ akɛ toiŋjɔlɛ kɛ ekomefeemɔ baaba gbi ko kɛ̃?

Ani enyɛɔ efeɔ mɛi ekome lɛɛlɛŋ?

Afi nɛɛ World Cup lɛ ehã mɛi miijwɛŋ nibii pii ahe fe futbɔl lɛ po. Ehã mɛi miitsɔɔ amɛjwɛŋmɔ yɛ saji tamɔ adesai ashihilɛ kɛ maŋkwramɔ saji ahe; ekomɛi ji bɔ ni abuuu hegbɛi ni mɛi komɛi yɔɔ lɛ, hewolonɔ su mlijiemɔ, hiɛaŋkwɛmɔ, kɛ ohia. Ni enɛ kɛ naataamɔi eba.

Fɛɛ sɛɛ po lɛ, mɛi babaoo náa miishɛɛ waa kɛ́ amɛmiikwɛ majimaji ateŋ kpɔiaŋgbɔlemɔ akaŋshii tamɔ World Cup lɛ. Shi ekɔɔɔ he eko bɔ ni mɛi shweɔ waa koni nifeemɔi tamɔ nɛkɛ lɛ kɛ ekomefeemɔ ni hiɔ shi daa lɛ aba lɛ, spɔts loo kpɔiaŋgbɔlemɔ nifeemɔi nɛɛ nyɛŋ amɛkɛ ekomefeemɔ ni hiɔ shi daa aba kɔkɔɔkɔ. Moŋ lɛ, bei pii lɛ, amɛhãa anaa sui ni kɛ mligbalamɔi baa kɛ nifeemɔi ni Biblia lɛ kɛɛ nomɛi baatsɔɔ akɛ wɔyɛ be ni atsɛɔ lɛ “naagbee gbii lɛ” amli lɛ.​—2 Timoteo 3:1-5.

Nɔ diɛŋtsɛ ni kɛ jeŋ fɛɛ ekomefeemɔ baaba

Biblia lɛ hãa wɔnaa nɔ diɛŋtsɛ ni kɛ ekomefeemɔ baaba je lɛŋ fɛɛ. Biblia lɛ ewo shi akɛ abaafee adesai ni yɔɔ shikpɔŋ nɔ fɛɛ lɛ ekome yɛ ŋwɛi nɔyeli ko, ni atsɛɔ lɛ “Nyɔŋmɔ Maŋtsɛyeli lɛ” shishi.​—Luka 4:43; Mateo 6:10.

Nakai Maŋtsɛyeli lɛ nɔ Maŋtsɛ, ni ji Yesu Kristo lɛ, baakwɛ koni toiŋjɔlɛ aba shikpɔŋ nɔ fɛɛ. Biblia lɛ kɛɛ:

• “Jalɔi baafa . . . ni toiŋjɔlɛ baahi he fɛɛ he.”​—Lala 72:7.

• “Ebaajie ohiafo ni bolɔɔ kɛhã yelikɛbuamɔ lɛ . . . Ebaajie amɛ kɛje nɔnyɛɛ kɛ yiwalɛ mli.”​—Lala 72:12, 14.

Ŋmɛnɛ po lɛ, Yesu tsɔɔmɔi lɛ efee mɛi akpekpei abɔ ekome yɛ shikpɔji 239 anɔ. Amɛjie mɛi ni kɛ amɛ kpãaa gbee lɛ ahe hetsɛ̃ kɛje amɛmli. Kɛ́ ootao ole enɛ he saji krokomɛi lɛ, kanemɔ sane ni tsaraa nɔ ni ji “Obaanyɛ Oye Hetsɛ̃ Nɔ” lɛ.