Kpɔmɔ Kɛmiijɛ Mizraim Kɛbashi Israel Klɛŋklɛŋ Maŋtsɛ lɛ Nɔ

Mose nyiɛ Israelbii lɛ ahiɛ kɛjɛ nyɔŋyeli mli yɛ Mizraim kɛtee Sinai Gɔŋ lɛ nɔ, he ni Nyɔŋmɔ kɛ emlai ha amɛ yɛ lɛ. Yɛ sɛɛ mli lɛ, Mose tsu hii 12 koni amɛyakpá Kanaan shikpɔŋ lɛ shi. Shi amɛteŋ mɛi 10 kɛ amaniɛbɔɔ ni ehiii ba. Amɛha gbɔmɛi lɛ shwe akɛ amɛaaku amɛsɛɛ ni amɛya Mizraim ekoŋŋ. Nyɔŋmɔ gbala Israelbii lɛ atoi ni eha amɛkpa shi yɛ ŋa lɛ nɔ afii 40 yɛ hemɔkɛyeli ni amɛbɛ yɛ emli lɛ hewɔ.

Yɛ naagbee lɛ, ahala Yoshua koni enyiɛ Israelbii lɛ ahiɛ kɛya Kanaan shikpɔŋ lɛ nɔ. Yehowa ha naakpɛɛ nibii komɛi ba ni ekɛye ebua amɛ koni amɛnine ashɛ shikpɔŋ lɛ nɔ. Eha Yordan Faa lɛ kpa hoo, eha Yeriko gbogboi lɛ kumɔ shwie shi, ni eha hulu lɛ wa edamɔ shi gbi muu fɛɛ. Yɛ afii ekpaa sɛɛ lɛ, ahe shikpɔŋ lɛ yɛ Kanaanbii lɛ adɛŋ.

Kɛjɛ Yoshua nɔ kɛbaa lɛ, kojolɔi lɛ kɛ afii 356 sɔŋŋ ye Israelbii lɛ anɔ. Wɔbaakase amɛteŋ mɛi babaoo ahe nii, tamɔ Barak, Gideon, Yefta, Samson kɛ Samuel. Wɔbaakane yei tamɔ Rahab, Debora, Yael, Rut, Naomi kɛ Delila he sane. Yɛ sɛɛ mli lɛ, Fã ETƐ lɛ wieɔ afii 396 yinɔsane he.