Sanegbaa Kɛtsɔ Woji Aŋmalamɔ Nɔ

WOJI aŋmalamɔ eha hiɛyaa eba adesai akpekpei abɔ ashihilɛi kɛ jeŋbai amli. Woji ni yɔɔ Kristofoi a-Hela Ŋmalɛi lɛ amli lɛ ateŋ titri ji woji ni aŋmala. Wɔbaanyɛ wɔŋmala woji bɔni afee ni wɔkɛwo heyelilɔi hee lɛ hewalɛ, ni wɔkɛ nanemɛi aná sharamɔ, ni wɔkɛwo nyɛmimɛi hii kɛ yei ni eje sɔ̃i krɛdɛɛi komɛi ahe nitsumɔ shishi lɛ hewalɛ, ni wɔkɛkanya mɛi ni kɛ shihilɛ ni mli wawai kpeɔ lɛ, ni wɔtsɔ no nɔ wɔha ale saji ni he hiaa lɛ koni akɛtsu asafo lɛ nibii ahe nii.—1 Tes. 1:1-7; 5:27; 2 Pet. 3:1, 2.

Woloŋmaa ji gbɛ ni mɔɔ shi ní akɛyeɔ odase. Yɛ hei komɛi lɛ, mɛi babaoo yɛ shiai ni abuɔ he loo gbɔiatoohe ni akɛ be kakadaŋŋ hiɔ jɛmɛ, ni anyɛŋ atsu nii yɛ mli ni akɛ naagba ekpeŋ lɛ amli. Bei babaoo lɛ, mɛi babaoo bɛ shia ni no hewɔ lɛ, wɔnine shɛɛɛ amɛnɔ kɛji wɔmiiye odase yɛ shia kɛ shia nitsumɔ lɛ mli. Mɛi krokomɛi yɛ hei ni etse ehe banee.

Ekolɛ hela, kɔɔyɔŋ tsakemɔ, loo mla ni eŋmɛɛɛ mɔ ko gbɛ ni eje kpo gbɛkɛ tsĩɔ onaa yɛ oshia bei komɛi. Ani obaanyɛ oŋma wolo ni okɛye wekunyo ko loo mɔ ko ni oye lɛ odase trukaa lɛ odase ni mɔɔ shi? Ani o-Biblia mli nikaselɔi lɛ ateŋ mɔ ko efã kɛtee? Wolo ni mɔ lɛ nine baashɛ nɔ kɛjɛ odɛŋ lɛ baafee nɔ pɛ ni he hiaa lɛ ní miishɛɛ ni ená yɛ mumɔŋ lɛ ahi shi. Aloo ekolɛ obaanyɛ okɛ mɛi ni ebote gbalashihilɛ mli nyɛsɛɛ nɛɛ, mɛi ni etsɔmɔ fɔlɔi, loo mɛi ni amɛsuɔlɔi egboi lɛ asusu Ŋmalɛ ni sa he.

Odaseyeli Kɛtsɔ Woloŋmaa Nɔ

Kɛji ooŋma wolo ni okɛye mɔ ko ni okɛ lɛ ekpeko pɛŋ lɛ odase lɛ, klɛŋklɛŋ lɛ, tsɔɔmɔ mɔ ni oji. Obaanyɛ otsɔɔ mli akɛ, okɛ ohe miiwo nitsumɔ ko ni atsuɔ yɛ jeŋ fɛɛ ni awooo he nyɔmɔ lɛ mli. Tsĩi tã akɛ oji Yehowa Odasefoi lɛ ateŋ mɔ kome, kɛji ebaahi akɛ ofee nakai. Ha mɔ lɛ ale nɔ hewɔ ni oŋmaa lɛ wolo lɛ moŋ fe ni kulɛ oooba obasara lɛ lɛ. Ŋmaa wolo lɛ tamɔ nɔ ni okɛ mɔ lɛ miiwie hiɛ-kɛ-hiɛ. Ni kɛlɛ, yɛ nɔ ni kɛ gbɛtsɔɔmɔ ni akɛha akɛ, “nyɛhiɛ atɛã tamɔ onufui, ni nyɛfea kpoo tamɔ okpoi” lɛ kɛ gbeekpamɔ naa lɛ, susumɔ saji abɔ ni kɔɔ ohe ni obaaha ale lɛ he jogbaŋŋ.—Mat. 10:16.

Okɛ nɔ ni kulɛ obaakɛɛ mɔ lɛ kɛji otee oyasara lɛ lɛ afata wolo ni oŋmaa lɛ he. Obaanyɛ okɛ hiɛkpamɔ wiemɔ ni yɔɔ Reasoning wolo lɛ mli lɛ eko atsu nii, loo okɛ Ŋmalɛ naa nɔkwɛmɔnɔ ni eje kpo nyɛsɛɛ nɛɛ yɛ Wɔ Maŋtsɛyeli Sɔɔmɔ lɛ mli lɛ atsu nii. Obaanyɛ obi sane ni owo mɔ lɛ hewalɛ koni esusu he. Shiɛlɔi komɛi tsɔɔ mli kɛkɛ akɛ, wɔyɛ gbɛjianɔtoo ni akɛhaa Biblia mli saji ahetoo ní aheee nɔ ko, kɛkɛ lɛ otsĩ saneyitsei ni yɔɔ wɔwoji ni wɔkɛ mɛi kaseɔ lɛ eko mli lɛ ekomɛi atã. Obaana wolo ni aŋmaa koni akɛye odase lɛ he nɔkwɛmɔnɔ yɛ baafa 73. Ebaanyɛ eha oná susumɔ ko, shi ebaahi jogbaŋŋ akɛ oootsake wiemɔi ni yɔɔ mli lɛ mli. Kɛ́ jeee nakai lɛ, beni bei shweɔ mli lɛ, mɛi anine baashɛ wolo kome too lɛ nɔ.

Mɛi komɛi sumɔɔɔ akɛ amɛkaneɔ wolo ni sɛɛ kɛ ni jɛ mɛi ni amɛleee amɛ lɛ adɛŋ. No hewɔ lɛ, ebaafee nɔ ni nilee yɔɔ mli akɛ obaaha wolo ni oŋmaa lɛ afee kuku. Kɛji owolo ni oŋmaa lɛ sɛɛ kɛ lɛ, ekanemɔ baatɔ mɔ ni oŋma lɛ lɛ. Ebaahi jogbaŋŋ akɛ obaafɔ̃ lɛ nine kɛba kpee yɛ Maŋtsɛyeli Asa lɛ nɔ. Obaanyɛ okɛ dɛhiɛmɔ wolo, wolo bibioo, Buu-Mɔɔ loo Awake! woji tɛtɛrɛbii lɛ eko afata he, ní otsɔɔ akɛ, abaanyɛ aha enine ashɛ eko nɔ be kɛ be fɛɛ kɛji eesumɔ. Aloo ekolɛ, obaanyɛ obi lɛ kɛji obaanyɛ obasara mɔ ni nine shɛ nɔ lɛ yɛ shia koni okɛ lɛ atsa sanegbaa nɛɛ nɔ.

Wiemɔ Fioo ni Kɔɔ Bɔ ni Eji He

Kwɛmɔ wolo ni aŋma ní akɛha akɛ nɔkwɛmɔnɔ lɛ. Kadimɔ nibii ni nyiɛ sɛɛ nɛɛ: (1) Ehe tse, ebɛ haŋtsii. (2) Kɛji wolo ni hà he lɛ laaje po lɛ, mɔ ni aŋma lɛ wolo lɛ nine baanyɛ ashɛ mɔ ni ŋma lɛ gbɛi kɛ adrɛs nɔ. (3) Atsɔɔ yiŋtoo ni akɛŋma wolo lɛ mli faŋŋ yɛ klɛŋklɛŋ kuku lɛ mli. (4) Atsu oti fɛɛ oti he nii yɛ kuku kroko mli. (5) Yɛ yiŋtoo ni ehiɛ lɛ hewɔ lɛ, wolo lɛ jeee wolo folo ko kɛkɛ loo nɔ ni yɔɔ kpɛŋŋ hu tsɔ.

Kɛji ootao ni oŋma wolo ni ato he gbɛjianɔ, tamɔ nɔ ni asafoŋ woloŋmalɔ lɛ kɛbaamaje nitsumɔhe nine lɛ, no lɛ esa akɛ akɛ asafo lɛ gbɛi afata he, kɛ woloŋmalɔ lɛ gbɛi, e-adrɛs, kɛ date. Mɔ ni aŋmaa lɛ lɛ loo gbɛjianɔtoo ni akɛ wolo lɛ majeɔ lɛ gbɛi kɛ adrɛs lɛ hu baaje kpo. Nɔ ni nyiɛ enɛ sɛɛ ji ŋamɔ ni sa. Kɛha wolo lɛ naamuu lɛ, yɛ wiemɔi komɛi amli lɛ, wiemɔi tamɔ “Onaanyo kpakpa” loo “Onaanyo” jeɔ kpo yɛ he ni waonaa gbɛi lɛ yɔɔ lɛ ŋwɛigbɛ. Esa akɛ akɛ nine aŋma waonaa gbɛi lɛ.

Yɛ woloŋmaa lɛ fɛɛ mli lɛ, kwɛmɔ wiemɔi a-spɛlimɔ, wiemɔ he mla, niŋmaa mli okadii, kɛ bɔ ni niŋmaa lɛ hi ha lɛ jogbaŋŋ. Nakai ni ooofee lɛ baaha wolo ni oŋma lɛ kɛ shɛɛ sane ni yɔɔ mli lɛ he aba sɛɛnamɔ.

Ŋmaa adrɛs ni onine shɛɔ woloŋmaa nɔ kɛtsɔɔ nɔ lɛ yɛ wolo kotoku lɛ sɛɛ daa—kɛ eeehi lɛ o-adrɛs. Kɛ́ ona akɛ nilee bɛ mli akɛ okɛ bo diɛŋtsɛ o-adrɛs aaaha beni oyeɔ gbɔ ko odase kɛtsɔ woloŋmaa nɔ lɛ, no lɛ bi onukpai lɛ kɛji amɛbaakpɛlɛ ni okɛ nyɛ Maŋtsɛyeli Asa lɛ nɔ adrɛs ni nine shɛɔ woloŋmaa nɔ kɛtsɔɔ nɔ lɛ atsu nii. Esaaa akɛ okɛ Buu Mɔɔ Asafo lɛ adrɛs lɛ tsuɔ nii kɔkɔɔkɔ yɛ enɛ gbɛfaŋ, ejaakɛ enɛ baatsɔɔ yɛ gbɛ ni ejaaa nɔ akɛ, akɛ owoji lɛ maje kɛjɛ Asafo lɛ nitsumɔhe lɛ ni ekɛ naagba baaba. Kɛ́ akɛ adrɛs ni nine shɛɔ woloŋmaa nɔ kɛtsɔɔ nɔ lɛ haaa, ni akɛ wolo fata he lɛ, enɛ hu baanyɛ ekɛ jwɛŋmɔ ni ejaaa aha akɛ Asafo lɛ ji mɔ ni kɛmaje.

Kwɛmɔ ni owo woloŋmaa majemɔ lɛ he nyɔmɔ, titri lɛ kɛji okɛ wolo wo mli. Kɛ́ woloŋmaa majemɔ he nyɔmɔ lɛ shɛɛɛ lɛ, ekolɛ abaabi ni mɔ ni nine baashɛ nɔ lɛ awo nyɔmɔ ni eshwɛ lɛ, ni enɛ baagbala mɔ lɛ jwɛŋmɔ kɛjɛ shɛɛ sane lɛ nɔ. Kaimɔ akɛ yɛ maji pii anɔ lɛ kɛji akɛ wolo bibioo loo wolo tɛtrɛɛ wo mli lɛ, woloŋmaa majemɔ he nyɔmɔ lɛ yaa hiɛ fe kɛji wolo lɛ pɛ yɔɔ mli.

Wiemɔ Su ni Sa

Kɛji ogbe wolo lɛ ŋmaa naa lɛ, kanemɔ koni okwɛ emli wiemɔi lɛ. Te etamɔ tɛŋŋ? Ani naanyobɔɔ su kɛ ŋaa yɛ mli? Suɔmɔ kɛ mlihilɛ fata sui ni esa akɛ wɔbɔ mɔdɛŋ ni wɔjie lɛ kpo yɛ be mli ni wɔkɛ mɛi krokomɛi yeɔ lɛ mli lɛ he. (Gal. 5:22, 23) Kɛji ona akɛ wiemɔ ko ehiii loo ekɛ gbɛkpamɔ kpakpa haaa lɛ, no lɛ tsakemɔ mli.

Wolo baanyɛ aya hei ni onyɛŋ oya. Anɔkwale nɛɛ pɛ haa ebafeɔ dɛŋdade ni sa kadimɔ kɛha sɔɔmɔ nitsumɔ lɛ. Akɛni owolo lɛ damɔɔ bo kɛ nibii ni oheɔ oyeɔ lɛ najiaŋ hewɔ lɛ, susumɔ nɔ ni okɛɔ, bɔ ni eyɔɔ, kɛ bɔ ni etamɔ lɛ he. Ebaanyɛ ekɛ nɔ ni he hiaa koni okɛha susuma ko ni jara wa aje wala gbɛ lɛ nɔ nyiɛmɔ shishi, ni okɛwaje lɛ, loo okɛwo lɛ hewalɛ lɛ aha.