Sanebimɔ He

◼ Mɛni esa akɛ wɔha ehi wɔ jwɛŋmɔ mli, kɛ́ wɔmiiŋmala woji wɔyaha shiatsɛmɛi ni wɔnyɛɛɛ wɔna amɛ yɛ shia lɛ?

Yɛ yiŋtoi sɔrɔtoi babaoo hewɔ lɛ, wɔmiina akɛ eewa kɛmiiha wɔ daa nɛɛ akɛ wɔɔna mɛi komɛi, beni wɔ́tee ni wɔyaasara amɛ yɛ amɛ shiai lɛ. Shiɛlɔi komɛi ena akɛ woloŋmaa ji gbɛ ni hi jogbaŋŋ ni amɛtsɔɔ nɔ, ni haa nine shɛɔ amɛnɔ. Yɛ be mli ni enɛ baanyɛ awo yibii kpakpai komɛi lɛ, ehe miihia ni wɔsusu kaimɔ wiemɔi komɛi ni baanyɛ aye abua wɔ koni wɔkwa naagbai komɛi lɛ ahe:

Okɛ Asafo lɛ adrɛs akatsu nii. Enɛ baatsɔɔ yɛ gbɛ ni ejaaa nɔ akɛ akɛ wolo ni aŋma lɛ maje kɛjɛ wɔ nitsumɔ hei lɛ, ni ekɛ naagbai ni he ehiaaa baaba kɛ nyɔmɔbɔɔ yɛ bei komɛi amli.

Kwɛmɔ ni ohiɛ adrɛs ni ja lɛ ni owo woloŋmaa majemɔ he nyɔmɔ ni sa lɛ.

Kaaŋmala woji lɛ akɛ okɛmiimaje “Occupant” (Mɔ ni yɔɔ shia lɛ); okɛ gbɛi pɔtɛɛ atsu nii.

Okashi woji ni oŋmala lɛ yɛ shinaa lɛ naa, kɛ mɔ ko bɛ shia lɛ.

Woji kukuji ni aŋmalaa hi fe fɛɛ. Okɛ dɛhiɛmɔ wolo ko loo wolo tɛtrɛɛ ko awo mli, moŋ fe nɔ ni oooka akɛ oooŋmala saji babaoo.

Woji ni akɛ taip tswaa lɛ waaa kwraa kɛ kanemɔ, ni ehaa anaa jwɛŋmɔ kpakpa yɛ he.

Abuuu woji ni aŋmalaa lɛ ahe akɔntaa akɛ sɛɛsaramɔi, ja ótsɔ hiɛ oye mɔ lɛ diɛŋtsɛ odase.

Kɛ ooŋma wolo kɛyaha mɔ ko ni tsutsu ko lɛ ejie miishɛɛ kpo lɛ, esa akɛ okɛ adrɛs loo tɛlifon nɔmba aha koni nine anyɛ ashɛ onɔ. Tsɔɔmɔ wɔ Biblia kasemɔ he gbɛjianɔ ni ato lɛ mli.

Fɔɔ nine otsɛ lɛ kɛya kpeei ni asafo ni yɔɔ jɛmɛ lɛ feɔ lɛ. Tsɔɔmɔ lɛ adrɛs kɛ bei ni akɛyaa kpee lɛ.

Kaaya nɔ oŋmala woji kɛmaje mɛi ni bɛ shia lɛ, kɛ okɛ shikpɔŋkuku lɛ eha; shiɛlɔ ni tsuɔ shikpɔŋkuku lɛ mli nii amrɔ nɛɛ ji mɔ ni emli nitsumɔ kã enɔ.