Saneyitso He Wiemɔ

WIELƆI ni yɔɔ niiashikpamɔ lɛ le bɔ ni saneyitso he hiaa ha. Kɛ́ amɛmiisaa amɛhe yɛ wiemɔ ko mli lɛ, saneyitso lɛ yeɔ ebuaa amɛ ni amɛgbalaa amɛjwɛŋmɔ kɛbaa adafitswai pɔtɛɛi komɛi anɔ ni amɛsusuɔ he babaoo. Nɔ ni jɛɔ mli baa ji akɛ yɛ nɔ najiaŋ ní amɛaawie saji otii babaoo he hiɛaŋhiɛaŋ lɛ, amɛwieɔ amɛsane lɛ he yɛ gbɛ ni he yɔɔ sɛɛnamɔ babaoo kɛha amɛtoibolɔi lɛ nɔ. Kɛ́ saji otii lɛ fɛɛ kɔɔ saneyitso lɛ he tɛ̃ɛ, ni eyeɔ ebuaa ni akɛwieɔ he lɛ, ebaaye ebua toibolɔi lɛ koni amɛ hu amɛkai nakai saji otii lɛ ni amɛnu sɛɛnamɔ ni yɔɔ sɛɛ lɛ shishi.

Eyɛ mli akɛ abaanyɛ akɛɛ akɛ osaneyitso lɛ ji sane ni odamɔɔ nɔ owieɔ lɛ moŋ, shi obaana akɛ bɔ ni owiemɔ lɛ ŋɔɔ ha lɛ baaya hiɛ kɛji okpɛlɛ nɔ akɛ osaneyitso lɛ ji susumɔ pɔtɛɛ ko ni odamɔɔ nɔ owieɔ osane lɛ. Maŋtsɛyeli lɛ, Biblia lɛ, kɛ gbohiiashitee lɛ ji saji ni mli lɛɛ. Abaanyɛ awie saneyitsei srɔtoi ahe yɛ saji nɛɛ ashishi. Nɔkwɛmɔnii komɛi nɛ: “Maŋtsɛyeli lɛ, Eji Nɔyeli Diɛŋtsɛ,” “Nyɔŋmɔ Maŋtsɛyeli lɛ Baafee Shikpɔŋ lɛ Paradeiso,” “Biblia lɛ Jɛ Nyɔŋmɔ Mumɔ lɛ Mli,” “Biblia lɛ Ji Gbɛtsɔɔmɔ ni Anyɛɔ Akɛtsuɔ Nii yɛ Wɔgbii Nɛɛ Amli,” “Gbohiiashitee kɛ Hiɛnɔkamɔ Haa Mɛi ni Yeɔ Awerɛho Lɛ,” kɛ “Gbohiiashitee He Hiɛnɔkamɔ lɛ Yeɔ Ebuaa Wɔ ni Wɔdamɔɔ Shi Shiŋŋ Beni Wɔkɛ Yiwaa Ekpe.” Saneyitsei nɛɛ fɛɛ biɔ ni awie he yɛ gbɛ̀i srɔtoi anɔ.

Akɛni shiɛmɔ ni Yesu Kristo shiɛ yɛ eshikpɔŋ nɔ sɔɔmɔ nitsumɔ lɛ mli lɛ kɛ saneyitso ni yɔɔ Biblia lɛ mli lɛ kpãa gbee hewɔ lɛ, ema saneyitso lɛ nɔ mi: “Ŋwɛi maŋtsɛyeli lɛ ebɛŋkɛ!” (Mat. 4:17) Mɛɛ gbɛ nɔ ewie nakai saneyitso lɛ he yɛ? Atsĩ nakai Maŋtsɛyeli lɛ tã fe shii 110 yɛ Sanekpakpai ejwɛ lɛ mli. Shi Yesu fee babaoo fe gbɛi “maŋtsɛyeli” lɛ ni eeeti mli kɛkɛ. Yesu ha efee faŋŋ kɛtsɔ enitsɔɔmɔ kɛ naakpɛɛ nii ni efee lɛ nɔ akɛ lɛ, mɔ ni eyɔɔ amɛteŋ lɛ, ji Nyɔŋmɔ Bi lɛ, ni ji Mesia lɛ, mɔ ni Yehowa kɛ Maŋtsɛyeli lɛ baaha lɛ. Yesu tsɔɔ hu akɛ abaatsɔ enɔ agbele gbɛ kɛha mɛi krokomɛi hu koni amɛbaná nakai Maŋtsɛyeli lɛ mli gbɛfaŋnɔ. Etsɔɔ sui ni esa akɛ mɛi ni akɛ nakai hegbɛ lɛ baaha amɛ lɛ ajie lɛ kpo. Etsɔ enitsɔɔmɔi kɛ hewalɛ nitsumɔi ni etsu lɛ nɔ efee nɔ ni Nyɔŋmɔ Maŋtsɛyeli lɛ baatsɔɔ yɛ gbɔmɛi ashihilɛ mli lɛ faŋŋ, ni etsɔɔ mli akɛ Nyɔŋmɔ mumɔ lɛ ní etsɔ nɔ efamɔ daimonioi lɛ ji odaseyeli ní tsɔɔ akɛ, “Nyɔŋmɔ maŋtsɛyeli lɛ eshɛ” etoibolɔi lɛ ‘aŋɔɔ.’ (Luka 11:20) Nakai Maŋtsɛyeli lɛ ji nɔ ni Yesu kɛ nitsumɔ wo esɛɛnyiɛlɔi lɛ adɛŋ ni amɛyaye he odase lɛ.—Mat. 10:7; 24:14.

Okɛ Saneyitso ni Sa Atsu Nii. Abiii akɛ owie saneyitso ko he kakadaŋŋ taakɛ Biblia lɛ feɔ lɛ, shi kɛlɛ ehe miihia ní oná saneyitso ko ni sa.

Kɛ́ ashi saneyitso lɛ aha bo koni ohala lɛ, klɛŋklɛŋ lɛ, susumɔ oti ni yɔɔ owiemɔ lɛ mli lɛ he. Agbɛnɛ, beni ohalaa saji otii ni baafee owiemɔ he wolo lɛ, kwɛmɔ akɛ enɛɛmɛi fiɔ saneyitso ni ohala lɛ sɛɛ lo.

Kɛ́ aha bo saneyitso lɛ, pɛimɔ mli jogbaŋŋ ni ona nɔ ni etsɔɔ yɛ gbɛ ni ato sane lɛ he gbɛjianɔ aha lɛ mli. Mɔdɛŋbɔɔ komɛi ahe baahia koni okɛna sɛɛnamɔ ni yɔɔ nakai saneyitso lɛ kɛ nɔ ni ebaanyɛ efee lɛ he. Kɛ́ bo obaahala saji ni obaawie he yɛ saneyitso ni akɛha bo lɛ mli lɛ, no lɛ halamɔ nibii amli jogbaŋŋ bɔni afee ni saneyitso lɛ ahi jwɛŋmɔ mli. Yɛ gbɛ kroko nɔ lɛ, kɛ́ akɛ sane lɛ eha bo lɛ, ehe baahia ni opɛi mli loo ni ole bɔ ni okɛbaatsu nii ni ekɛ saneyitso lɛ akpã gbee. Ehe miihia hu ni ole nɔ hewɔ ni sane lɛ he hiaa otoibolɔi lɛ kɛ nɔ ni esa akɛ oti ni ma ohiɛ lɛ afee yɛ wiemɔ lɛ hamɔ mli. Enɛ baaye abua bo koni ole nɔ ni esa akɛ oma nɔ mi yɛ owiemɔ lɛ mli.

Bɔ ni Afeɔ ni Amaa Saneyitso lɛ Nɔ Mi. Bɔni afee ni oma saneyitso lɛ nɔ mi jogbaŋŋ lɛ, esa akɛ oto shishi yɛ be mli ni ohalaa osane lɛ ni otoɔ he gbɛjianɔ lɛ. Kɛ́ okɛ nɔ ni fiɔ osaneyitso lɛ sɛɛ lɛ pɛ tsu nii, ní onyiɛ shishitoo mlai ni kɔɔ wiemɔ he wolo he gbɛjianɔtoo kpakpa he lɛ sɛɛ lɛ, no lɛ obaama osaneyitso lɛ nɔ mi ní ohiɛ kãaa nɔ.

Sane mlitii baanyɛ aye abua koni ewaje saneyitso lɛ. Yɛ saŋku lalai aŋmalamɔ mli lɛ, bei pii lɛ atiɔ lala lɛ mli saneyitso lɛ mli bɔ ni sa bɔni afee ni akɛkadi lala muu lɛ fɛɛ. Jeee be fɛɛ be lala lɛ jeɔ kpo yɛ he nɔ kome mli. Bei komɛi lɛ wiemɔ kuku kome loo enyɔ pɛ jeɔ kpo, bei komɛi hu lɛ, akɛ tsakemɔi ni yɔɔ saneyitso lɛ mli lɛ tsuɔ nii, shi yɛ gbɛ kome loo yɛ gbɛ kroko nɔ lɛ, lalafolɔ lɛ tsaraa elala lɛ ni ejeɔ kpo yɛ lala lɛ mli kɛyashi ebaaná lala muu lɛ fɛɛ nɔ hewalɛ. Nakai ji bɔ ni esa akɛ eba lɛ yɛ wiemɔ ko saneyitso mli. Wiemɔ mli otii ní atiɔ mli yɛ saneyitso lɛ mli lɛ tamɔ lala ko mli wiemɔi ni jeɔ kpo yɛ lalafoo lɛ fɛɛ mli. Wiemɔi srɔtoi ni hiɛ shishinumɔ kome too lɛ nɔŋŋ loo saneyitso lɛ ni awie he yɛ gbɛ kroko nɔ lɛ tsuɔ nii ákɛ saneyitso lɛ mlitsakemɔ. Nakai gbɛ ni okɛaatsu nii lɛ baanyɛ aha saneyitso lɛ afee susumɔ titri ni otoibolɔi lɛ baakai.

Nɛkɛ shishitoo mlai nɛɛ kɔɔɔ wiemɔi ni awieɔ kɛjɛɔ wiemɔ kpoku lɛ nɔ pɛ he, shi moŋ ekɔɔ saji ni agbaa yɛ shiɛmɔ nitsumɔ lɛ mli hu he. Sanegbaa ni yɔɔ kuku lɛ nyɛɔ efeɔ nɔ ni akaiɔ kɛ́ saneyitso lɛ fee faŋŋ. Kɛ́ ama saneyitso ko nɔ mi lɛ, ehaa akaiɔ gbɛtsɔɔmɔi ni akɛha yɛ Biblia mli nikasemɔ ko shishi lɛ amrɔ nɔŋŋ. Mɔdɛŋ ni obɔɔ koni okɛhala saneyitso ni owie he lɛ baaye abua babaoo koni owiemɔi amɔ shi jogbaŋŋ akɛ wielɔ kɛ Nyɔŋmɔ Wiemɔ lɛ tsɔɔlɔ.