NIKASEMƆ 64
Daniel Yɛ Jatai Abu Lɛ Mli
Maŋtsɛ kroko ni baye Babilon maŋ lɛ nɔ ji Dario, Medianyo lɛ. Dario na akɛ esoro Daniel kwraa. No hewɔ lɛ, ewó Daniel hii ni abuɔ fe fɛɛ yɛ maŋ lɛ mli lɛ anɔkwɛlɔ. Shi hii nɛɛ ye Daniel he awuŋa, ni no hewɔ lɛ, amɛtao gbɛ ni amɛbaatsɔ nɔ amɛgbe lɛ. Amɛle akɛ Daniel sɔleɔ ehãa Yehowa shii etɛ daa gbi. No hewɔ lɛ, amɛyakɛɛ Dario akɛ: ‘Maŋtsɛ, hã awo mla akɛ mɔ fɛɛ mɔ asɔle ahã bo pɛ. Mɔ fɛɛ mɔ ni baaku mla nɛɛ mli lɛ, hã ashɛ lɛ afɔ̃ jatai abu lɛ mli.’ Dario nya nɔ ni amɛwie lɛ he, ni ehã awo mla lɛ.
Be ni Daniel nu akɛ awo mla lɛ nɔŋŋ ni etee shĩa. Egbele esamfɛji lɛ, ni ekula shi esɔle ehã Yehowa. Hii ni yeɔ Daniel he awuŋa lɛ bote eshĩa lɛ mli trukaa ni amɛna ni eesɔle. Amɛjo foi kɛtee Dario ŋɔɔ ni amɛyakɛɛ lɛ akɛ: ‘Daniel yeee mla ni owo lɛ nɔ. Esɔleɔ ehãa e-Nyɔŋmɔ lɛ shii etɛ daa gbi.’ Dario sumɔɔ Daniel sane, ni esumɔɔɔ ni agbeɔ lɛ. Gbi muu lɛ fɛɛ lɛ, ekwɛ bɔ ni ebaafee ehere Daniel yiwala. Shi maŋtsɛ lɛ po nyɛɛɛ atsake mla ni lɛ diɛŋtsɛ ewo lɛ. No hewɔ lɛ, efã ni ashɛ Daniel afɔ̃ jatai abu lɛ mli.
Dario hao waa yɛ Daniel hewɔ nakai gbɛkɛ lɛ aahu akɛ, enyɛɛɛ ewɔ. Be ni je tsɛre lɛ, ejo foi kɛtee bu lɛ naa ni ebo etsɛ Daniel ni ekɛɛ: ‘Ani o-Nyɔŋmɔ lɛ enyɛ ehere oyiwala?’
Daniel here nɔ. Ekɛɛ Dario akɛ: ‘Yehowa bɔfoi lɛ baŋamɔ jatai lɛ anaabui. No hewɔ lɛ, amɛfeee mi nɔ ko nɔ ko.’ Dario ná miishɛɛ waa! Efã ni ajie Daniel kɛje bu lɛ mli. Be ni ajie Daniel lɛ, epilako bibioo po. Kɛkɛ ni maŋtsɛ lɛ fã akɛ: ‘Nyɛshɛrɛa hii ni folɔ Daniel naa lɛ nyɛshwiea bu lɛ mli.’ Be ni ashɛrɛ amɛ ashwie bu lɛ mli lɛ, jatai lɛ kpe amɛ.
Dario tsu ni ayakɛɛ mɛi fɛɛ ni yɔɔ emaŋtsɛyeli lɛ mli lɛ akɛ: ‘Mɔ fɛɛ mɔ ashe Daniel Nyɔŋmɔ lɛ gbeyei, ejaakɛ ehere Daniel kɛje jatai lɛ adɛŋ.’
Ani osɔleɔ ohãa Yehowa daa gbi tamɔ Daniel fee lɛ?
“Yehowa le bɔ ni efeɔ ejieɔ mɛi ni jáa Nyɔŋmɔ lɛ kɛjeɔ shihilɛ ni mli wa mli.”—2 Petro 2:9