Kwɛmɔ Jogbaŋŋ yɛ Amale Gbalɔi Ahe!
BRAZILBII gbalashihilɛ mli hefatalɔi enyɔ komɛi yakamɔ shi amɛwɔ pɛ kɛkɛ ni amɛnu ni julɔi eba amɛshia lɛ. Hefatalɔi ni tsui efa nɛɛ bɔ mɔdɛŋ amɛjo foi kɛtsɔ pia lɛ samfɛlɛ lɛ mli ni amɛyatsɛ polisifoi. Shi yɛ no sɛɛ lɛ, niiashikpamɔ nɛɛ ha ŋa lɛ she gbeyei waa akɛ enyɛɛɛ ewɔ shia lɛ mli dɔŋŋ, ni no hewɔ lɛ esa akɛ eyahi enyɛ masɛi.
Mɔ fɛɛ mɔ ni abaju lɛ da aloo atswa lɛ ojo yɛ gbɛ ko nɔ lɛ baanu shihilɛ ni eyɔɔ mli lɛ shishi jogbaŋŋ diɛŋtsɛ. Niiashikpamɔ ni tamɔ nɛkɛ woɔ mɔ he gbeyei, ni nɔ jeee miishɛɛ sane ji akɛ, mɛi babaoo miiya nɔ amɛmiina amanehulu yɛ nɛkɛ gbɛ nɔ. Shi, juu kroko ko yɛ ni nibii ni jɛɔ mli baa lɛ yɛ hiɛdɔɔ kwraa fe enɛ.
Mɛni ji nɛkɛ juu ni hiɛdɔɔ yɔɔ he nɛɛ, ni namɛi ji julɔi lɛ? Yesu Kristo kɛ enɛ he saji fioo ko haa wɔ, yɛ be mli ni ewieɔ wɔgbii nɛɛ ahe lɛ, ni ekɛɛ: “Ni amale gbalɔi pii aaate shi, ni amɛaalaka mɛi pii.” (Mateo 24:11) Amale gbalɔi ji julɔi. Yɛ mɛɛ gbɛ nɔ? Mɛni amɛjuɔ? Amɛjuu lɛ kɛ gbalɛi ni amɛgbaa lɛ yɛ tsakpaa. No hewɔ lɛ, bɔni afee ni wɔnu sane lɛ shishi jogbaŋŋ kɛmɔ shi lɛ, klɛŋklɛŋ lɛ ehe miihia ni wɔle nɔ ni ji gbalɛ yɛ bɔ ni Biblia tsɔɔ mli ehaa lɛ naa.
Nɔ ni Gbalɛ ni Agbaa Tsɔɔ
Kɛji osusu gbalɛ he lɛ, ekolɛ nɔ ni baa ojwɛŋmɔ mli klɛŋklɛŋ ji gba ni agbaa nɔ ni baaba wɔsɛɛ atsɔɔ. Yɛ anɔkwale mli lɛ, enɛ fata Nyɔŋmɔ gbalɔi ni hi shi yɛ blema lɛ anitsumɔ he, shi jeee no ji amɛnitsumɔ titri. Akɛ nɔkwɛmɔ nɔ lɛ, beni akɛɛ gbalɔ Ezekiel yɛ ninaa mli akɛ “gbaa otsɔɔ mumɔ lɛ”, nɔ ni etsɔɔ kɛkɛ ji ni ekɛ famɔ ni jɛ Nyɔŋmɔ ŋɔɔ aha. (Ezekiel 37:9, 10) Beni akojoɔ Yesu yɛ osɔfoi lɛ ahiɛ lɛ, atsɛ̃rɛ lajɔ̃ ashwie ehe ni agbala lɛ mai, ni mɛi ni waa lɛ yi lɛ ye ehe fɛo amɛkɛɛ: “Kristo, gbaa otsɔɔ wɔ. Namɔ ji mɔ ni yio lɛ?”Amɛkɛɛɛ Yesu akɛ egba amɛ nɔ ni baaba yɛ wɔsɛɛ. Amɛmiitswa lɛ mpoa ni etsɔ Nyɔŋmɔ hewalɛ nɔ etsɔɔ amɛ mɛi ni gbala lɛ mai lɛ.—Mateo 26:67, 68.
Yɛ anɔkwale mli lɛ, shishinumɔ krɛdɛɛ ni yɔɔ shishijee Biblia mli wiemɔi ni atsɔɔ shishi akɛ “gbaa” loo “gbalɛ” lɛ sɛɛ ji, klɛŋklɛŋ kwraa lɛ, ni awie nɔ ni ji Nyɔŋmɔ jwɛŋmɔ yɛ sane ko he aloo, taakɛ Bɔfoi lɛ Asaji wolo lɛ wie he lɛ, ni awie “Nyɔŋmɔ nii wuji lɛ” ahe atsɔɔ. (Bɔfoi lɛ Asaji 2:11) Nɛkɛ shishinumɔ nɛɛ naa amale gbalɔi pii shishiuɔ mɛi babaoo yɛ lɛ.
Shi kɛlɛ, namɛi ji amale gbalɔi lɛ, ni mɛni amɛjuɔ lɛ? Bɔni afee ni wɔha sanebimɔ nɛɛ hetoo lɛ, nyɛhaa wɔkua wɔsɛɛ ni wɔkwɛa Israel maŋ lɛ yinɔsane mli kɛyaa Yeremia gbii lɛ amli.