Mɛni Hewɔ Juu Faa Babaoo Nɛkɛ?

RIO DE JANEIRO​—Hɔgbaa, October 18, 1992. Copacabana kɛ Ipanema ŋshɔnaa ni ehe gbɛi lɛ eyi obɔ kɛ gbɔmɛi. Trukaa ni obalaŋtai asafoi ni feɔ basabasa batutua gbɔmɛi lɛ, ni amɛkɛ amɛhe bɔi nɔmɔ, ni agbɛnɛ amɛmiiju nɔ fɛɛ nɔ ni sɛɛnamɔ yɔɔ he kɛmiijɛ gbɔmɛi ni yɔɔ ŋshɔ lɛ naa lɛ adɛŋ. Polisifoi ni yɔɔ jɛmɛ ni amɛyi faaa lɛ damɔ shi​—ni amɛnyɛɛɛ nɔ ko amɛfee ni amɛkɛfa mɛi ni ajuɔ amɛnibii nɛɛ ahe.

Kɛha maŋ lɛ mli bii kɛ gbɔi ni ba shishɛramɔ lɛ, eji jenamɔ mli nɔ ko ni haa ŋmiŋmi mɔɔ mɔ ni aana yɛ shwane fintii. Yɛ anɔkwale mli lɛ, mɛi anibii ni ajuɔ efee nii ni yaa nɔ. Ale yɛ maŋtiasei wuji lɛ amli akɛ julɔi juɔ obalaŋtai anibii​—ni yɛ bei komɛi amli lɛ amɛgbeɔ amɛ po​—koni amɛnine ashɛ tokotai ni amɛwo lɛ anɔ. Julɔi boteɔ mɛi ashiai amli kɛ gbɔmɛi yɛ shia loo amɛbɛ shia. Beni shia mli abaawai ni yeee anɔkwa lɛ ena amɛle he ni nibii hɔlɔ yɛ shia lɛ mli lɛ, amɛjuɔ jwetrii kɛ shika ni amɛjoɔ foi. Asafoi jwaa shwapoi ni amɛjuɔ mli nii. Kui ni ato amɛ gbɛjianɔ jogbaŋŋ lɛ po juɔ gbɔmɛi, taakɛ bɔ ni gbɔmɛi ni amɔmɔɔ amɛ ekaa naa atoɔ lɛ efa yɛ Brazil lɛ. Ni ekolɛ ooonyɛ oha enɛɛmɛi ahe nɔkwɛmɔ nɔ yɛ nɔ ni yaa nɔ yɛ bo diɛŋtsɛ okutsoŋ. Mɛni hewɔ ajuɔ waa nakai lɛ?

Mɛni Hewɔ Gbɔmɛi Juɔ?

Eyɛ mli akɛ ohia ni yaa hiɛ kɛ tsofai ni akɛtsuɔ nii yɛ gbɛ fɔŋ nɔ ji yiŋtoi titrii enyɔ moŋ, shi hetoo lɛ bɛ faŋŋ nakai. The New Encyclopædia Britannica lɛ kɛɛ: “Aŋmɛɛ nɔ kome ni kɛ efɔŋ feemɔ baa lɛ taomɔ lɛ he akɛ sɛɛnamɔ bɛ he.” Shi, nakai wolo lɛ nɔŋŋ tsɔɔ akɛ naagbai ni tamɔ juu lɛ “jɛ bɔ ni obalaŋtai nuɔ he akɛ amɛhe bɛ sɛɛnamɔ ko kɛ bɔ ni amɛnine shɛɛɛ daa gbi shihilɛ mli nibii ni anaa kɛ emli nyɔmɔwoi anɔ lɛ hewɔ.” Hɛɛ, yɛ bɔ ni anyɛɔ mɛi anɔ koni amɛhe guɔyeli nibii babaoo hewɔ lɛ, mɛi pii naa akɛ gbɛ ko bɛ ni amɛaatsɔ nɔ ni amɛnine ashɛ nibii ni amɛtsui shweɔ nɛɛ anɔ, akɛ ja amɛju.

Shi nɔ ni yɔɔ miishɛɛ ji akɛ, The World Book Encyclopedia lɛ wie akɛ: “Kɛ akɛto he lɛ, efɔŋ feemɔ baa shi fioo yɛ he ni gbɔmɛi heɔ yeɔ akɛ amɛshihilɛ gbɛ baaya nɔ yɛ lɛ. Shi efɔŋ feemɔ faa yɛ hei ni tsakemɔi baa oyayaayai yɛ hei ni amɛhiɔ kɛ nɔ ni amɛtsuɔ kɛhaa amɛdaaŋ ŋmaa namɔ mli​—yɛ amɛ hiɛnɔkamɔi kɛha amɛ wɔsɛɛ be shihilɛ kpakpa he susumɔ hewɔ.” Ensaiklopedia lɛ kɛfata he akɛ: “Nitsumɔ mli hegbɛi ni obalaŋtai yɔɔ lɛ faaa. Etamɔ nɔ ni miishɛɛ ko bɛ nitsumɔ ni yɔɔ ni ebiii hesaa tsɔ ko yɛ mli lɛ mli, kɛ akɛto nibii ni anaa amɛ oya ni miishɛɛ yɔɔ mli ni baa kɛjɛɔ juu mli lɛ he lɛ. Obalaŋtai miisumɔ hu ni amɛkɛ amɛhe awo mɔ ni aaamɔ amɛ lɛ he oshara mli ejaakɛ mɛni po amɛyɔɔ ni amɛbaalaaje.”

Ni kɛlɛ, mɛi ni bɛ nitsumɔ loo nyɔmɔwoo bibioo ko pɛ amɛnaa lɛ ateŋ mɛi pii ejuuu, yɛ be mli ni klakefoi loo owulai kɛ mɛi ni feɔ guɔyeli nibii lɛ juɔ yɛ nitsumɔ mli oookɛɛ nibii ni amɛjuɔ lɛ fata amɛ nyɔŋgbele nyɔmɔwoo he. Yɛ anɔkwale mli lɛ, juu-kɛ-fɔ̃ nifeemɔi ni akɛ he woɔ mli lɛ biɔ hegbɛ loo gbɛhe ko ni kwɔ. Ani onuko heguɔgbee nifeemɔi ni kɔɔ shika babaoo ni maŋkwralɔi, nɔyeli lɛ mli onukpai, kɛ nitsumɔtsɛmɛi ju lɛ ahe? Sanebimɔ ko kwraa bɛ he akɛ, jeee ohiafoi pɛ juɔ.

Kaimɔ hu akɛ, sinii kɛ TV nɔ nibii kɛ juu feɔ fɛoyeli (mɔ titri ni yɔɔ mli lɛ po baanyɛ afee julɔ), ni enɛ haa juu bafeɔ nɔ ni akpɛlɛɔ nɔ babaoo. Kɛ wɔkpɛlɛɔ nɔ akɛ akɛ sinii ni tamɔ nɛkɛ kwɛmɔ shɛjeɔ mɔ mii po lɛ, yɛ nakai beaŋ nɔŋŋ lɛ akɛ bɔ ni afeɔ ajuɔ miitsɔɔ mɛi ni kwɛɔ enɛ lɛ. Ani jeee gbɛ ni yɔɔ nigii nɔ atsɔɔ yɛ akɛ sɛɛnamɔ po yɛ efɔŋ feemɔ he lɛ? Ŋwanejee ko bɛ he akɛ hiɛjoomɔ, anihao, kɛ jwɛŋmɔ ni ahiɛ akɛ mɔ fɛɛ mɔ miiju kɛkɛ lɛ haa juu yaa hiɛ. Eji anɔkwale akɛ “jaramɔ bei” ni agba afɔ shi akɛ mɛi baafee hesuɔlɔi kɛ shika suɔlɔi lɛ mli wɔyɔɔ lɛ.​—2 Timoteo 3:​1-5.

Kaaju

Yɛ nibii ni ejaaa ni je lɛ buɔ nomɛi akɛ sɛɛnamɔ yɔɔ he lɛ fɛɛ sɛɛ lɛ, ehe miihia ni wɔbo kita: “Julɔ lɛ, ekaju dɔŋŋ” lɛ toi. (Efesobii 4:28) Mɔ ni buɔ heloo gbɛfaŋ nibii loo miishɛɛnamɔ fe nine lɛ baalaka ehe koni ehe eye akɛ juu he oshara ni akɛ he woɔ mli lɛ sa. Shi juu ji hiɛdɔɔ sane yɛ Nyɔŋmɔ hiɛ, ni ejieɔ suɔmɔ ni abɛ kɛha naanyo gbɔmɔ lɛ kpo. Agbɛnɛ hu, juu bibii baaha mɔ lɛ tsui akpilim. Ni kɛ abuo akɛ mɔ ni yeee anɔkwa hu? Namɔ kɛ ehe baafɔ julɔ nɔ? Nyɔŋmɔ Wiemɔ lɛ kɛ nilee kɛɔ akɛ: “Nyɛteŋ mɔ ko mɔ ko akana amanehulu akɛ awuiyelɔ loo julɔ loo efɔŋ feelɔ.”​—1 Petro 4:⁠15.

Eji anɔkwale akɛ osumɔɔɔ juu ni faa babaoo lɛ, shi mɛɛ gbɛ nɔ gbɔmɛi ni yɔɔ he ni efɔŋ feemɔ fa yɛ lɛ tsɔɔ amɛdamɔɔ enɛ naa? Mɛɛ gbɛ nɔ tsɔ ni tsutsu julɔi komɛi tsake amɛshihilɛ? Ani juu baaba naagbee gbi ko yɛ jeŋ muu fɛɛ? Wɔmiifɔ bo nine ni okane sane ni nyiɛ sɛɛ nɛɛ, “Jeŋ ni Julɔi Bɛ Mli.”