Gilead Klas ni Ji 101—Amɛyɛ Ekaa Kɛha Nitsumɔi Kpakpai
WƆ BƆLƆ, Yehowa Nyɔŋmɔ, yɛ ekaa kɛha nitsumɔi kpakpai, ni nakai nɔŋŋ ji e-Bi, Yesu Kristo hu. Akɛ wɔ nɔkwɛmɔ nɔ lɛ, Yesu jie ekaa kpo kɛtsɔ nitsumɔ ni Nyɔŋmɔ kɛha lɛ ni etsu, ni nɔ ni fata he ji ní eŋɔ “lɛ diɛŋtsɛ ehe eha yɛ wɔnajiaŋ, koni ekpɔ̃ . . . lɛ diɛŋtsɛ emaŋ krɔŋŋ ni hiɛ dɔɔ yɛ nitsumɔi kpakpai ahe lɛ” nɔ. (Tito 2:14) Eka shi faŋŋ akɛ Buu-Mɔɔ Biblia Gilead Skul klas ni ji 101 lɛ mli bii 48 lɛ ejie ekaa ni amɛyɔɔ kɛha nitsumɔi kpakpai lɛ kpo. Atsu nɛkɛ maŋsɛɛ sanekpakpa shiɛlɔi nɛɛ askul naagbee gbɛjianɔtoo lɛ he nii yɛ September 7, 1996, yɛ Buu Mɔɔ Asafo lɛ Nikasemɔ He lɛ yɛ Patterson, yɛ New York.
Ŋaawoo ni Anyɛɔ Akɛtsuɔ Nii Koni Aya nɔ Ana Ekaa
Skul naagbee gbɛjianɔtoo lɛ sɛinɔtalɔ ji Carey Barber, Nɔyeli Kuu lɛ mli bii lɛ ateŋ mɔ kome, ni kɛ nɔ ni fe afii 70 ehi be-fɛɛ sɔɔmɔ lɛ mli lɛ. Yɛ eshishijee wiemɔ lɛ mli lɛ, Nyɛminuu Barber gbala jwɛŋmɔ kɛtee Yesu, mɔ ni ji “je lɛ mli la lɛ,” shiɛmɔ kɛ enitsɔɔmɔ nitsumɔ lɛ nɔ. (Yohane 8:12) Etsɔɔ mli faŋŋ akɛ, Yesu etsiii nakai gbɛhe ni woo yɔɔ mli lɛ naa ehaaa ekome ehe, shi moŋ ewo ekaselɔi lɛ hewalɛ ni amɛ hu amɛha amɛla lɛ akpɛ. (Mateo 5:14-16) Nɛkɛ sɔɔmɔ hegbɛ nɛɛ haa shishinumɔ baa Kristofonyo shihilɛ mli, ni ekɛ gbɛnaa nii ni tsii fɔ̃ɔ mɛi fɛɛ ni ‘nyiɛɔ tamɔ la bii’ lɛ anɔ.—Efesobii 5:8.
Yɛ shishijee wiemɔi nɛɛ asɛɛ lɛ, atsɛ Don Adams ni yɔɔ Ajinafoi Akui Anitsumɔ He lɛ yɛ Brooklyn nitsumɔ he yitso lɛ. Ewie saneyitso ni ji “Ní Aaaya Hiɛ, Jeee Sɛɛsɛɛ” he. Nyɛminuu Adams gbala jwɛŋmɔ kɛtee Gilead Skul lɛ diɛŋtsɛ kɛ eyiŋtoo—ni ji akɛ, koni alɛɛ sanekpakpa shiɛmɔ lɛ mli kɛya maŋsɛɛ shikpɔji anɔ lɛ nɔ. Ewie bɔ ni Nyɔŋmɔ gbɛjianɔtoo lɛ etee hiɛ waa, ni ekala Biblia kasemɔ woji yɛ je lɛŋ he fɛɛ he yɛ wiemɔi ni fa fe 300 mli lɛ he. Atsɔɔ Nilee Ni Kɛ Mɔ Yaa Naanɔ Wala Mli wolo lɛ, ni afee yɛ 1995 mli lɛ shishi kɛtee wiemɔi 111 mli, ni ato gbɛjianɔ akɛ abaakala yɛ wiemɔi krokomɛi babaoo mli kɛfata he. Amrɔ nɛɛ eetsu nii akɛ dɛŋdade titri ni miiye kɛmiibua Yesu kaselɔi heei koni amɛshɛ henɔjɔɔmɔ kɛ baptisimɔ he yɛ nyɔji fioo pɛ mli. No hewɔ lɛ, maŋsɛɛ sanekpakpa shiɛlɔi heei lɛ baaná Biblia kasemɔ woji heei fe fɛɛ ni eba kɛha amɛ nitsumɔ lɛ.
No sɛɛ lɛ, Lyman Swingle, ni fata Nɔyeli Kuu lɛ mli bii lɛ ahe lɛ, wie saneyitso ni ji “Yaa nɔ Okɛ Osɔɔmɔ Krɔŋkrɔŋ Ahã Yehowa,” ni damɔ Kpojiemɔ 7:15 nɔ lɛ he. Akɛni Yehowa diɛŋtsɛ ji miishɛɛ Nyɔŋmɔ hewɔ lɛ, sɔɔmɔ ni akɛhaa lɛ daa lɛ ji nɔ ni haa mɔ naa miishɛɛ. (1 Timoteo 1:11) Nɔ ni ejɛ sɔɔmɔ ni miishɛɛ yɔɔ mli nɛɛ mli eba ji akɛ, gbɔmɛi asafo babaoo ni jɛ shikpɔŋ lɛ nɔ hei sɔrɔtoi fɛɛ eba ni amɛmiija lɛ. Afii abɔ ni eho lɛ mli fɛɛ lɛ, mɛi ni atsɔse amɛ yɛ Gilead Skul lɛ efata he ni akɛye abua mɛnɛɛmɛi ateŋ mɛi babaoo ni amɛbaná anɔkwale lɛ he nilee ni ja kɛmɔ shi. No hewɔ lɛ, wɔyɛ yiŋtoo ni wɔɔdamɔ nɔ wɔhe wɔye akɛ Yehowa baaya nɔ ajɔɔ mɛi ni atsuɔ amɛ kɛyaa bianɛ koni amɛyabua asafo babaoo ni amɛyi faa lolo lɛ amli bii babaoo naa kɛba lɛ.
“Yehowa Miishɛɛ lɛ Kpojiemɔ” ji saneyitso ni Daniel Sydlik, ni lɛ hu efata Nɔyeli Kuu lɛ mli bii lɛ ahe lɛ, wie he. Etsɔɔ mli akɛ Nyɔŋmɔ tsuji fɛɛ, ní maŋsɛɛ sanekpakpa shiɛlɔi heei lɛ fata he lɛ, ena hegbɛ akɛ amɛaatsɔɔ gbɔmɛi naanɔ wala gbɛ lɛ, kɛ gbɛ ni amɛaatsɔ nɔ amɛna nɔ̃ kpakpa fe fɛɛ yɛ shihilɛ mli bianɛ. “Nitsɔɔmɔ,” taakɛ Nyɛminuu Sydlik wie lɛ, “ji nitsumɔ ni haa mɔ woɔ lɛ diɛŋtsɛ ehe nyɔmɔ. Ejeɔ kpo yɛ gbɔmɛi ni tsɔɔ nii lɛ kɛ gbɔmɛi ni kaseɔ lɛ hu ahiɛ.” (Lala 16:8-11) Etsɛ́ maŋsɛɛ sanekpakpa shiɛlɔ ko ni yɔɔ Estonia lɛ wiemɔ sɛɛ akɛ ewie akɛ, “Wɔhiɛ shɛɛ sane kpele fe fɛɛ yɛ shikpɔŋ muu lɛ fɛɛ nɔ, ni wɔhiɛ su ji nɔ ni jieɔ bɔ ni eji lɛ kpo etsɔɔ.” Bɔ ni wɔhiɛ su ji lɛ baaha mɛi babaoo agbele amɛshinaai amɛha wɔ, ni ebaatee amɛ miishɛɛ shi. Gbɔmɛi miitao ni amɛle nɔ ni haa Yehowa webii naa miishɛɛ. “No hewɔ lɛ hã ojwɛŋmɔ ahi bɔ ni ohiɛ su yɔɔ lɛ nɔ,” taakɛ Nyɛminuu Sydlik wo ŋaa lɛ. “Gbɔmɛi naa miishɛɛ kɛji amɛna gbɔmɛi ni yɔɔ miishɛɛ.”
Ulysses Glass, ni efata he kɛtsɔɔ Gilead nikaselɔi anii aahu kɛjɛ klas ni ji 12 lɛ nɔ yɛ 1949 kɛbaa lɛ, kɛ toibolɔi lɛ wie saneyitso ni ji “Nyɛkɛ Tsuishitoo Abua Nyɛsusumai Ahe” lɛ he. Mɛni ji tsuishitoo? Ehiɛ shishinumɔ ni tsɔɔ tsuishiŋmɛɛ ni akɛmɛɔ nɔ ko, bɔ ni ajieɔ tsuishitoo kpo yɛ mlilawoo loo nɔnyɛɛ shishi. Gbɔmɔ ni toɔ etsui shi lɛ yaa nɔ enáa tsui ni eyeɔ ehe nɔ; mɔ ni bɛ tsuishitoo lɛ feɔ nii oya ni etsɛɛɛ ni emli fuɔ. “Mɛi pii susuɔ akɛ tsuishitoo tsɔɔ gbɔjɔmɔ loo yiŋ ni anyɛɛɛ akpɛ,” taakɛ Nyɛminuu Glass wie lɛ, shi “yɛ Yehowa hiɛ lɛ, eji kadimɔ nii ni tsɔɔ hewalɛ kɛ yiŋtoo.” (Abɛi 16:32) Mɛni ji nyɔmɔwooi ni jɛɔ tsuishitoo mli kɛbaa? “Tsuishitoo yɛ mlifu be mli baaha oye ohe kɛjɛ gbii oha ni kulɛ okɛaahi hejaramɔ mli lɛ he,” taakɛ abuɔ Chinabii abɛ ko lɛ. “Tsuishitoo hãa mɔ su kɛ ebaŋ yaa hiɛ babaoo,” Nyɛminuu Glass kɛɛ. “No tsɔɔ akɛ, ehàa sui krokomɛi ahe kɛ wulamɔ nii fɛfɛo ni hiɔ shi daa. Ehaa hemɔkɛyeli feɔ akɔnɔ, toiŋjɔlɛ sɛɛ tsɛɔ, ni suɔmɔ maa shi shiŋŋ.”
“Eji hegbɛ akɛ nine aaashɛ nitsumɔ nɔ kɛjɛ Yehowa Nyɔŋmɔ dɛŋ kɛtsɔ egbɛjianɔtoo lɛ nɔ,” taakɛ Mark Noumair, ni kɛ afii 11 sɔmɔ yɛ Kenya akɛ maŋsɛɛ sanekpakpa shiɛlɔ, ni amrɔ nɛɛ eji nitsɔɔlɔ yɛ Gilead lɛ kɛɛ lɛ. Beni ewieɔ saneyitso ni ji “Ja Oyɛ Hemɔkɛyeli, Kɛ́ Jeee Nakai lɛ, Osɛɛ Etsɛŋ” lɛ he lɛ, Nyɛminuu Noumair gbala jwɛŋmɔ kɛtee Yuda Maŋtsɛ Ahaz nɔkwɛmɔ nɔ lɛ nɔ. Yesaia ma nɔ mi eha maŋtsɛ lɛ akɛ Yehowa fi esɛɛ yɛ enitsumɔ lɛ mli, shi Ahaz kɛ ehe efɔɔɔ E-nɔ. (Yesaia 7:2-9) Kɛkɛ ni Nyɛminuu Noumair tsɔɔ mli faŋŋ akɛ ehe miihia ni maŋsɛɛ sanekpakpa shiɛlɔi—yɛ anɔkwale mli lɛ, mɔ fɛɛ mɔ—aná Yehowa mli hemɔkɛyeli bɔni afee ni amɛsɛɛ atsɛ yɛ amɛ teokrase nitsumɔi amli. Kaai titri ni maŋsɛɛ sanekpakpa shiɛlɔ kɛkpeɔ yɛ enitsumɔ mli lɛ biɔ hemɔkɛyeli ni mli wa. “Nyɛkaia be fɛɛ be akɛ shihilɛ ko bɛ ni eye emuu yɛ nibii agbɛjianɔtoo nɛɛ mli,” Nyɛminuu Noumair kɛɛ.
Niiashikpamɔi ni Woɔ Hewalɛ ni Atsu Nii kɛ Ekaa
Yɛ amɛ Gilead nikasemɔ be lɛ mli lɛ, nikaselɔi lɛ náa be yɛ daa otsi naagbee ni amɛkɛ amɛhe woɔ shiɛmɔ nitsumɔ, ní baafee nɔ titri yɛ amɛ maŋsɛɛ sanekpakpa shiɛmɔ nitsumɔi amli lɛ mli. Wallace Liverance, ni ji Gilead tsɔɔlɔi lɛ ateŋ mɔ kome lɛ, kɛ nikaselɔi 15 gba sane, ni ebi amɛ saji ni amɛgba amɛ niiashikpamɔi amɛtsɔɔ. No sɛɛ lɛ, Leon Weaver, ni fata Sɔɔmɔ Nitsumɔ Ajinafoi Akuu lɛ he lɛ, kɛ Lon Schilling, ni lɛ hu efata Betel Nitsumɔi Ajinafoi Akuu lɛ he lɛ, bi nitsumɔ he niji ajinafoi akui amli bii ni jɛ Afrika kɛ Latin Amerika lɛ saji, ni amɛgba niiashikpamɔi ni jɛ maŋsɛɛ sanekpakpa shiɛmɔ nitsumɔi amli, ni amɛkɛ ŋaawoi kpakpai ha maŋsɛɛ sanekpakpa shiɛlɔi ni egbe nikasemɔ naa lɛ. Yɛ Sierra Leone lɛ, atsɔɔ mli faŋŋ akɛ, mɛi ni abaptisi amɛ yɛ 1995 sɔɔmɔ afi lɛ mli lɛ amlijaa oha mli 90 ji mɛi ni maŋsɛɛ sanekpakpa shiɛlɔi ye amɛbua amɛ. Mɛɛ nitsumɔ ni ekaa yɔɔ mli waa he yijiemɔ kpakpa nɛ!
Yɛ naagbee lɛ, Milton Henschel, Asafo lɛ sɛinɔtalɔ lɛ, kɛ toibolɔi 2,734 lɛ wie saneyitso ni ji, “Esoro Yehowa Gbɛjianɔtoo ni Anaa lɛ Kwraa” lɛ he. Mɛni hãa Nyɔŋmɔ gbɛjianɔtoo lɛ feɔ nɔ ni eko kwraa kɛ lɛ yeee egbɔ lɛ? Jeee edalɛ loo ehewalɛ, shi moŋ anɔkwale ni eji akɛ Nyɔŋmɔ jalɛ mlai kɛ ekojomɔ yiŋkpɛi ji nɔ ni kudɔɔ lɛ lɛ. Yɛ blema beaŋ lɛ, Yehowa webii, ni ji Israel maŋ lɛ, ji mɛi ni etu ewiemɔi ni yɔɔ krɔŋkrɔŋ lɛ ewo amɛdɛŋ, ni no hã nakai maŋ lɛ fee maŋ ni esoro lɛ kwraa. (Romabii 3:1, 2) Ŋmɛnɛ, Yehowa gbɛjianɔtoo lɛ efee ekome beni etsuɔ nii yɛ Yesu Kristo kudɔmɔ shishi lɛ. (Mateo 28:19, 20) Eeshwere, eeda. Ani gbɛjianɔtoo kroko ko yɛ shikpɔŋ nɛɛ nɔ ni e-Nɔyeli Kuu lɛ kwɛɔ Nyɔŋmɔ Wiemɔ, Biblia lɛ mli dani amɛfeɔ yiŋkpɛi ni he hiaa? Gbɛi nɛɛ kɛ gbɛi krokomɛi anɔ esoroɔ Yehowa gbɛjianɔtoo ni anaa lɛ kwraa yɛ lɛlɛŋ.
Nifeemɔ ni yɔɔ miishɛɛ nɛɛ ba naagbee kɛ nikaselɔi lɛ ayijiemɔ woji ni akɛha amɛ, kɛ wolo ni klas lɛ ŋma ni amɛkɛtsɔɔ hiɛsɔɔ ni amɛyɔɔ kɛha tsɔsemɔ krɛdɛɛ ni amɛna lɛ hu kanemɔ.
[Akrabatsa ni yɔɔ baafa 22]
Klasbii lɛ Ahe Saji
Maji sɔrɔtoi anɔ ni amɛjɛ kɛba: 9
Maji sɔrɔtoi ni aha amɛ nitsumɔ yɛ mli: 12
Nikaselɔi lɛ ayifalɛ: 48
Afii abɔ ni amɛye lɛ mlijaa: 31.7
Afii abɔ ni amɛkɛhi anɔkwale lɛ mli lɛ mlijaa: 13.8
Afii abɔ ni amɛkɛsɔmɔ kɛ amɛbe fɛɛ mlijaa: 9.8
[Mfoniri ni yɔɔ baafa 23]
Buu-Mɔɔ Biblia Gilead Skul Klasbii ni Ji 101 ni Gbe Nikasemɔ Naa
Gbɛi ni yɔɔ shishigbɛ lɛ miitsɔɔ bɔ ni amɛdamɔ shi lɛ mli, kɛjɛ hiɛgbɛ kɛyaa sɛɛgbɛ, ni amɛgbɛi lɛ jeɔ shishi kɛjɛɔ abɛku kɛyaa ninejurɔ gbɛ.
(1) Swint, H.; Zezenski, A.; Highfield, L.; Mercado, S.; Diehl, A.; Chavez, V.; Smith, J.; Selenius, S.
(2) Kurtz, D.; Clark, C.; Leisborn, J.; Mortensen, W.; Bromiley, A.; Toikka, L.; Marten, A.; Smith, D.
(3) Zezenski, D.; Bjerregaard, L.; Garafalo, B.; Kaldal, L.; Chavez, E.; Fröding, S.; Khan, R.; Selenius, R.
(4) Swint, B.; Bjerregaard, M.; Garafalo, P.; Holmblad, L.; Keyzer, M.; Fröding, T.; Palfreyman, J.; Palfreyman, D.
(5) Minguez, L.; Leisborn, M.; Mercado, M.; Kurtz, M.; Diehl, H.; Toikka, J.; Clark, S.; Khan, A.
(6) Minguez, F.; Marten, B.; Highfield, L.; Holmblad, B.; Bromiley, K.; Kaldal, H.; Mortensen, P.; Keyzer, R.