SANEYITSO LƐ MLITSƆƆMƆ | NAMƐI JI YEHOWA ODASEFOI?
Mɛni Yehowa Odasefoi heɔ yeɔ?
Yehowa Odasefoi heɔ yeɔ akɛ, “Ŋmalɛ lɛ fɛɛ jɛ Nyɔŋmɔ mumɔ lɛŋ, ni ehe yɛ sɛɛnamɔ.” (2 Timoteo 3:16) Biblia lɛ yeɔ ebuaa wɔ ni wɔkaseɔ wɔ-Bɔlɔ lɛ he nii, ni no hãa wɔhiɔ shi yɛ gbɛ kpakpa nɔ.
Biblia lɛ kɛɔ akɛ: “Koni amɛná amɛle akɛ bo, ni okome too ogbɛi ji Yehowa lɛ, bo ji mɔ ni kwɔ fe fɛɛ yɛ shikpɔŋ lɛ nɔ fɛɛ!” (Lala 83:19) No hewɔ lɛ, wɔjaa Yehowa Nyɔŋmɔ pɛ, ni akɛ e-Dasefoi lɛ, wɔbɔɔ mɔdɛŋ wɔhãa mɛi leɔ egbɛ́i lɛ.—Yesaia 43:10-12.
Akɛ Kristofoi lɛ, wɔheɔ wɔyeɔ akɛ Yesu, ni ji “Nyɔŋmɔ Bi lɛ”a ba shikpɔŋ lɛ nɔ ni ebatsɔ Mesia lɛ. (Yohane 1:34, 41; 4:25, 26) Be ni Yesu gbo lɛ, atee lɛ shi kɛtee ŋwɛi. (1 Korintobii 15:3, 4) Sɛɛ mli lɛ, ebatsɔ Nyɔŋmɔ Maŋtsɛyeli lɛ nɔ Maŋtsɛ. (Kpojiemɔ 11:15) Nakai Maŋtsɛyeli lɛ ji nɔyeli ni yɔɔ diɛŋtsɛ ni baahã shikpɔŋ lɛ atsɔ Paradeiso ekoŋŋ. (Daniel 2:44) Biblia lɛ kɛɔ akɛ, “Mɛi ni he jɔ lɛ, shikpɔŋ lɛ aaatsɔ̃ amɛnɔ̃, ni amɛmii aaashɛ amɛhe yɛ hejɔlɛ babaoo mli.”—Lala 37:11, 29.
“Kɛ́ amɛkane Biblia lɛ, amɛheɔ amɛyeɔ akɛ Nyɔŋmɔ kɛ amɛmiiwie. Be fɛɛ be ni amɛbaaná naagba ko lɛ, amɛkwɛɔ Nyɔŋmɔ Wiemɔ lɛ mli kɛhã enaa tsabaa. . . . Amɛnaa Nyɔŋmɔ Wiemɔ lɛ akɛ ehiɛ kã lolo.”—Katolik osɔfo Benjamin Cherayath, Münsterländische Volkszeitung, Germany adafitswaa wolo
Yehowa Odasefoi heɔ yeɔ akɛ, mɛi baanyɛ aná Biblia mli shishitoo mlai ahe sɛɛ ŋmɛnɛ po. (Yesaia 48:17, 18) No hewɔ lɛ, wɔhiɔ shi yɛ Biblia mli shishitoo mlai anaa. Akɛ nɔkwɛmɔnɔ lɛ, akɛni Biblia bɔɔ wɔ kɔkɔ ni wɔtsi wɔhe kɛje nifeemɔi ní baanyɛ awo wɔgbɔmɔtsei kɛ wɔjwɛŋmɔ he muji hewɔ lɛ, wɔshɛreee tawa, ni wɔkɛ tsofai tsuuu nii yɛ gbɛ ni ejaaa nɔ. (2 Korintobii 7:1) Wɔtsiɔ wɔhe kɛjeɔ nibii ni Biblia lɛ guɔ tamɔ, dãatɔɔ, bɔlɛnamɔ jeŋba sha, kɛ juu he.—1 Korintobii 6:9-11.
a Biblia wieɔ Yesu he hu akɛ “Nyɔŋmɔ Bi koome lɛ,” ejaakɛ lɛ ji mɔ ni Yehowa bɔ klɛŋklɛŋ, ni mɔ ko fataaa ehe kɛ bɔ lɛ.—Yohane 3:18; Kolosebii 1:13-15.