“Gbɛ lɛ Nɛ”
1 Yesaia 30:21 kɛɔ akɛ: “Ni otoii hu aaanu wiemɔ ko yɛ osɛɛ akɛ: Gbɛ lɛ nɛ! Nyɛnyiɛa nɔ!” Nakai ‘wiemɔ ni yɔɔ osɛɛ lɛ ji Yehowa gbee ni ekɛwieɔ kɛtsɔɔ e-Wiemɔ lɛ kɛ egbɛjianɔtoo loo asafo lɛ nɔ. Ani oboɔ nakai “wiemɔ” lɛ toi dani oyeɔ obuaa mɛi krokomɛi koni amɛ hu amɛhere nɔ?—Yak. 4:17.
2 Ehe miihia ni mɛi ni wɔkɛkaseɔ nii ale akɛ Yehowa yɛ asafo kó. Esa akɛ wɔye wɔbua amɛ ni amɛna asafo lɛ yɛ bɔ ni ekɛ gbalɛ mlibaa kpaa gbee lɛ naa koni no atsirɛ amɛ ni amɛkɛ lɛ akpa gbee. Bɔfoi yitso 2; okɛto Romabii 12:5 he. Mɛni wɔbaanyɛ wɔfee ni wɔkɛma gbɛfaŋnɔ ni asafo lɛ naa yɛ amɛwala mli lɛ nɔ mi?
Okɛ Wolo Bibioo Lɛ Atsu Nii Jogbaŋŋ
3 Wolo bibioo ni ji Yehowa Odasefoi Miifee Nyɔŋmɔ Suɔmɔnaa Nii yɛ Ekomfeemɔ Mli yɛ Jeŋ Fɛɛ lɛ he baanyɛ aba sɛɛnamɔ kɛha bo ni okɛtsɔɔ Biblia nikaselɔi lɛ agbɛ kɛba Yehowa gbɛjianɔtoo loo asafo lɛ mli. Ekɛ ŋmalɛi lɛ, kɛ emli mfonirii lɛ kɛ sanebimɔi ni akɛtiɔ saji amli lɛ tsuɔ nii yɛ gbɛ ni mɔɔ shi nɔ. Ehe baaba sɛɛnamɔ waa kɛ akɛ minitii nyɔŋma loo nɔ susu emli saji lɛ ahe yɛ nikasemɔ lɛ mli loo yɛ esɛɛ.
4 Esa akɛ awo nikaselɔ lɛ hewalɛ ni esusu saneyitso loo kuku ni abaanyɛ asusu he yɛ be ni ato lɛ mli lɛ he. Ekolɛ obaasumɔ ni ofee osanebimɔ lɛ kuku kɛ nibimɔ kome loo enyɔ ko pɛ. Akɛ nɔkwɛmɔ nɔ lɛ, yɛ be mli ni nyɛsusuɔ yitso ni ji “Yehowa Buaa Ewebii Anaa ni Ewulaa amɛ Kɛhaa Nitsumɔ” lɛ he lɛ, obaanyɛ okɛ be lɛ fɛɛ asusu sanebimɔ ni ji etɛ ni yɔɔ baafa 11 lɛ he. Kɛ okɛ ŋmalɛi ni atsɛ lɛ tsu nii yɛ be mli ni otiɔ otii ni atsi ta yɛ baafai 8 kɛ 9 lɛ amli lɛ, ebaaye ebua nikaselɔ lɛ ni enu Yehowa gbɛtsɔɔmɔ shishi.
5 Okɛ mfonirii ni yɔɔ yitso ni ji “Asafoi ni Akɛtswaa mɔ Amaa Shi yɛ Suɔmɔ kɛ Ekomefeemɔ Mli” ni jeɔ shishi yɛ baafa 12 shishi lɛ atsu nii. Mɛni hewɔ okɛ enɛ tsuuu nii ni okɛtsɔɔ gbɛnaa nii ni jwere onukpai lɛ anɔ lɛ mli? Enɛ nɔ mi ni oooma lɛ baaha efee mlɛo eha nikaselɔ lɛ akɛ eeeya onukpai lɛ aŋɔɔ kɛ ekɛ naagbai miikpe.
6 Yɛ be mli ni nyɛsusuɔ kpeei sɔrɔtoi lɛ ahe lɛ, nyɛsusua ekome he daa otsi. Nyɛbaanyɛ nyɛfee enɛ kɛ nyɛbaasusu sanebimɔ 2 ni yɔɔ yitso ni ji “Kpeei ni Akɛwoɔ Suɔmɔ kɛ Nitsumɔi Kpakpai Ahe Hewalɛ” lɛ shishi lɛ hetoo he lɛ. Tsɔɔmɔ nikaselɔ lɛ bɔ ni osaa ohe kɛhaa Asafo Woloŋ Nikasemɔ.
Ha Efee Mlɛo
7 Yitsei sɔrɔtoi babaoo yɛ Yehowa Odasefoi Miifee Nyɔŋmɔ Suɔmɔnaa Nii wolo bibioo lɛ mli ni abaanyɛ atsɔ nɔ agba sane yɛ bɔ ni shihilɛ lɛ baatamɔ lɛ naa. Nyɛminuu ko wie akɛ: “Nɔ ni esa akɛ obɔ he mɔdɛŋ ji bɔ ni oooha efee mlɛo. Ŋmalɛi enyɔ ko pɛ, sanegbaa kuku ni maa bɔ ni ehe hiaa akɛ aya kpee lɛ nɔ mi, ni ani obaahe oye?—eyeɔ omanye!” Nyɛminuu kroko ko hu kɛɛ akɛ: “Mitsiɔ Yehowa gbɛjianɔtoo loo asafo lɛ ta yɛ sɔlemɔ ni mikɛjeɔ shishi kɛ nɔ ni mikɛkpaa lɛ fɛɛ mli.”
8 Yehowa Odasefoi Miifee Nyɔŋmɔ Suɔmɔnaa Nii wolo bibioo lɛ baanyɛ ekɛ gbɛtsɔɔmɔ kɛ yelikɛbuamɔ aha bo ni eha o-Biblia nikasemɔ lɛ aya nɔ, ni eshwere. Kaimɔ ni nyɛsusu otii ni yɔɔ wolo lɛ mli lɛ ahe daa gbi. Nyɛhaa wɔnyiɛa hiɛ ni wɔtsɔɔa nikaselɔi ni boɔ wɔ toi lɛ agbɛ kɛbaa Yehowa gbɛjianɔtoo loo asafo lɛ mli ni wɔkɛ Yehowa afee ekome kɛkɛɛ akɛ: “Gbɛ lɛ nɛ.”