Nɔ ni Kadiɔ Wɔ Akɛ Yehowa Odasefoi

Akɛ sanekpakpa lɛ he sɔɔlɔi lɛ, ale wɔ yɛ faŋŋ mli akɛ Yehowa Odasefoi. Suɔmɔ ni wɔyɔɔ kɛha Nyɔŋmɔ kɛ wɔnaanyo lɛ ji nɔ ni tsirɛɔ wɔ ni wɔkɛ wɔhe woɔ shiɛmɔ nitsumɔ lɛ mli. Jeee gbɔmɔ ko loo gbɛjianɔtoo ko ji nɔ ni tsirɛɔ wɔyisɛɛ ni wɔkɛ wɔhe woɔ mli, shi moŋ yɛ famɔ ni Nyɔŋmɔ kɛha akɛ ashiɛ “sanekpakpa” lɛ ni afee mɛi kaselɔi lɛ kɛ gbeekpamɔ naa. (Mat. 24:​14; 28:​19, 20) No hewɔ lɛ, shiɛlɔi fɛɛ baafee jogbaŋŋ akɛ amɛaakwa amɛhe ni amɛkɛaatsɔɔ akɛ amɛji Buu Mɔɔ kɛ Woji Tɛtrɛbii Asafo ni yɔɔ Pennsylvania lɛ loo nitsumɔ kuu kroko ni “tsulɔ anɔkwafo kɛ nilelɔ” lɛ kɛtsuɔ nii ni ekɛgbɛ Maŋtsɛyeli lɛ he sane lɛ eshwa lɛ najiaŋdamɔlɔi.​—Mat. 24:​45-47.

Kɛji oshara ba mɔ ko nɔ aloo hehiamɔ sane ko ba aloo akɛ naagbai komɛi kpe yɛ be mli ni atsuɔ shikpɔŋkuku ko mli nii lɛ, ehe baahia ni shiɛlɔi ana kadimɔ nibii komɛi amɛfata amɛgbɛi ni amɛaatsɔɔ pɛ lɛ kɛ agbɛnɛ wɔ jamɔ mli nitsumɔ nɛɛ mlitsɔɔmɔ yɛ Ŋmalɛi lɛ amli lɛ sɛɛ lɛ he. Kɛ abi sane loo abi ni mɔ ko kɛ ekadimɔ wolo ko atsɔɔ mɔ ni eji lɛ, shiɛlɔi ni abaptisi amɛ lɛ baanyɛ ni amɛkɛ kadimɔ wolo bibioo (S-65) lɛ ni onukpai asɛinɔtalɔ lɛ kɛ ewaonaa gbɛi ewo shishi, ni tsɔɔ akɛ eeshiɛ Maŋtsɛyeli lɛ he sanekpakpa lɛ akɛ asafo ni atsɔɔ yɛ wolo lɛ sɛɛ lɛ mli nyo lɛ atsɔɔ.

Esa akɛ ashɛ kadimɔ woji bibii (S-65) lɛ eko afata asafo lɛ woji ni shɛɔ daa afi lɛ he, ni aja aha shiɛlɔi ni abaptisi amɛ lɛ kɛ ehe miihia ni afee nakai. Kɛ shiɛlɔi komɛi kɛ amɛ diɛŋtsɛ amɛ kadimɔ woji tsuɔ nii yɛ shiɛmɔ nitsumɔ lɛ mli lɛ, esaaa akɛ amɛŋmala yɛ wolo lɛ nɔ akɛ amɛji Buu Mɔɔ Asafo lɛ najiaŋdamɔlɔi.