Feemɔ Be Fɛɛ Sɔɔmɔ lɛ Oshihilɛ he Mli Nitsumɔ
1 Nitsumɔ ni kɔɔ wɔ henɔjɔɔmɔ lɛ he nitsumɔ loo emlibaa kɛ naanɔ wala he diɛŋtsɛ ji Kristofoi asɔɔmɔ nitsumɔ lɛ. (Rom. 10:10; 1 Tim. 4:16) Beni Yesu fɔ nine etsɛ mɛi krokomɛi ni amɛbafee esɛɛnyiɛlɔi lɛ, efee lɛ faŋŋ akɛ nɔ ni fata enɛ he ji.Nyɔŋmɔ Maŋtsɛyeli lɛ ni aaajaje atsɔɔ yɛ he fɛɛ he. (Luka 9:57-62) Eyɛ mli akɛ ninefɔɔ nɛɛ ni wɔɔkpɛlɛ nɔ lɛ biŋ ni wɔtsake wɔ nitsumɔ moŋ, shi ekɔɔ tsakemɔ yɛ nibii ni he hiaa titri lɛ ahe diɛŋtsɛ. Nitsumɔ ni he hiaa fe fɛɛ ji ni “ajaje” Yehowa “agbojee lɛ.” ni nɔ ni fata he ji kaselɔi ni aaafee. (1 Pet. 2:9; Mateo 24:14; 28:19, 20) No hewɔ lɛ mɛi fɛɛ ni amɛjɔɔ amɛhe nɔ amɛha Yehowa lɛ haa amɛshihilɛ feɔ nɔ ni egba ebɔle sɔɔmɔ nitsumɔ lɛ. Mɛi pii ni amɛshihilɛ baaŋmɛ gbɛ lɛ enyɛ amɛfee be fɛɛ sɔɔmɔ lɛ amɛshihilɛ be mli nitsumɔ.—2 Kor. 4: 1, 7.
Shihilɛ Gbɛ Ni Nyɔmɔwoo Yɔɔ Mli
2 Yɛ be mli ni ekwɛɔ afii 54 ni ekɛhi be fɛɛ sɔɔmɔ nitsumɔ lɛ mli lɛ yɛ sɛɛ lɛ, enɛ tsirɛ gbɛgbalɔ ko ni eŋma akɛ: “Miishɛɛ ni Yehowa kɛha lɛ fa kwraa fe amanehului lɛ. Kɛ akɛ hegbɛ ha mi koni mahi shi ekoŋŋ lɛ masumɔ ni maje misuɔmɔ mli ni mikɛ mibe fɛɛ ejie Nyɔŋmɔ kpeteŋkpele ni ji Yehowa yi.” Je lɛŋ nitsumɔ ko bɛ ni baanyɛ ekɛ mligbɛ tsui ni nyɔɔ mɔ mli kɛ miishɛɛ ni baa kɛjɛɔ gbɛ ni tamɔ nɛkɛ ni atsɔɔ nɔ lɛ mli aba. Be fɛɛ sɔɔmɔ nitsumɔ ni mɔ ko aaadi sɛɛ kɛ ewala be fɛɛ lɛ ji Nyɔŋmɔ jamɔ hetuukɛhamɔ kpojiemɔ ni nyɔmɔwoo ni ekɛbaa bianɛ lɛ fa babaoo bɔ ni anyɛŋ atsi ta kɛ jɔɔmɔ hu ni ma shi shiŋŋ ni nine baashɛ nɔ yɛ wɔsɛɛ be mli.—1 Tim. 4:8.
3 Be fɛɛ sɔɔmɔ nitsumɔ lɛ ni mɔ ko kɛaafee eshihilɛ be mli nitsumɔ lɛ baanyɛ ni ekɛ miishɛɛ wuji diɛŋtsɛ aba ejaakɛ ekɔɔ nihamɔ babaoo he. (Bɔfoi 20:35) Anaa naanyobɔɔ ni jara wa fe fɛɛ, ni ji Yehowa kɛ e-Bi Yesu Kristo ni akɛaabɔ naanyo lɛ he sɛɛ ni ewajeɔ enɛ kɛtsɔɔ Maŋtsɛyeli lɛ he nibii ni akɛ he woɔ mli babaoo lɛ nɔ. (Luka 16:9; 1 Kor. 15:58) Anaa tsui ni nyɔɔ mɔ mli kɛ henilee ni mli tse keŋkeŋ ejaakɛ okɛ osusuma muu fɛɛ miitsu nii yɛ gbɛ ni oshihilɛ aaaŋmɛ gbɛ lɛ nɔ. Bɔ ni oto oshihilɛ gbɛ he gbɛjianɔ jogbaŋŋ lɛ haa onyɛɔ otsuɔ babaoo yɛ toiboo ni afeɔ ahaa Kristo tamɔ akɛ ‘atao maŋtsɛyeli lɛ kɛ ejalɛ lɛ tsutsu’ lɛ mli.—Mateo 6:33.
Fɛɛmɔ Mɔ Ni Yaa Ehiɛ Yɛ Osɔɔmɔ Nitsumɔ Lɛ Mli
4 Shihilɛ mli nitsumɔ biɔ ni adi nɔ ko sɛɛ loo aya hiɛ ni nine ashɛ nɔ ko nɔ yɛ mɔdɛŋbɔɔ ko mli. Hiɛyaa ni yaa nɔ fiofio lɛ he miihia kɛha tsuishiŋmɛɛ koni ohiɛ miishɛɛ kɛ ekaafeemɔ mli akɛ gbɛgbalɔ. Yehowa tsɔɔ egbɛjianɔtoo lɛ nɔ ekɛ mumɔŋ tsɔsemɔ haa yɛ asafoŋ kpeei ashishi, ni wɔ fɛɛ wɔhiɛ sɔɔ enɛ babaoo. Nɔ ni fata enɛ he ji onukpai ni akɛ amɛ kpeɔ yɛ December kɛ agbɛnɛ bɔ ni akɛ kpokpaa nɔkwɛlɔ lɛ kpeɔ kɛ ebasara aaato lɛ. Kɛ wɔkase shihilɛ ni wɔyɔɔ mli bianɛ lɛ doo wɔkwɛ lɛ, esa akɛ wɔnyɛ wɔto gbɛjianɔ wɔha kpokpaa nɔ kpeei. Taakɛ nyɛle lɛ, awieɔ gbɛgbamɔ sɔɔmɔ lɛ he yɛ kpokpaa nɔ kpeei fɛɛ kpeei ashishi Ani okadiɔ ŋaa ni awoɔ yɛ enɛ mli lɛ ni okɛ henilee kpakpa fɛɛ tsuɔ ŋaawoo ni akɛhaa yɛ nɛkɛ kpeei nɛɛ ashishi lɛ he nii?
5 Kɛ oleee Biblia nikasemɔ ni yaa hiɛ lɛ eko lɛ, ani okɛ enɛ efee oti ni ma ohiɛ? Ani obaanyɛ oya ohiɛ yɛ sɔɔmɔ nitsumɔ lɛ tai krokomɛi lɛ amli? Bɔ ni afee ni okɛ Yesaia 60:17 akpa gbee lɛ, esa akɛ efee wɔteŋ mɔ fɛɛ mɔ faishitswaa ni baaya nɔ daa akɛ wɔɔtsu nii waa ni wɔha gbɛi ni wɔtsɔɔ nɔ wɔshiɛɔ lɛ aya hiɛ ni wɔwo yibii babaoo yɛ Kristofoi asɔɔmɔ nitsumɔ lɛ mli. Obaanyɛ oya ohiɛ yɛ oshihilɛ be mli nitsumɔ nɛɛ mli yɛ enɛ kɛ gbɛi krokomɛi amli ni oha onyɛmɔ yɛ Nyɔŋmɔ nitsumɔ lɛ mli lɛ afee nɔ ni hi fe tsutsu lɛ.
6 Kɛ okɛ hiɛdɔɔ miisusu bɔ ni ooofee ni okɛ ohe abɔ gbɛgbalɔi babaoo lɛ ahe lɛ, belɛ yaa nɔ yɛ sɔlemɔ ni osɔleɔ ohaa Yehowa yɛ nɛkɛ sane nɛɛ he lɛ mli. (Mateo 7:7, 8) Mɛi pii etswa amɛhe ni amɛkɛfɔɔ Yehowa nɔ lɛ amɛma shi, klɛŋklɛŋ lɛ kɛtsɔ gbɛgbalɔi awamɔ Sɔɔmɔ lɛ nɔ. hɛɛ, mɔ ko baanyɛ afee gbɛgbalɔ, yɛ naatsii shishi po taakɛ eji yɛ je lɛŋ hei sɔrɔtoi he ni atsi nitsumɔ lɛ naa yɛ lɛ. Kɛ bei shwie mli fioo lɛ, abaaha wɔle gbɛi sɔrɔtoi ni atsɔɔ nɔ ayeɔ odase yɛ naatsii shishi lɛ sɔrɔtoi komɛi ni enɛ baaha efee mlɛo kɛha shiɛlɔi lɛ hu koni amɛha amɛsɔɔmɔ nitsumɔ lɛ aya hiɛ babaoo.
7 Jeee nyɛmɔ loo nikeenii sɔrɔto ko yɔɔ hewɔ ni mɔ ko nyɛɔ efeɔ gbɛgbalɔ. Suɔmɔ krɔŋŋ kɛha Nyɔŋmɔ kɛ gbɔmɛi, kɛ bɔ ni mɔ ko sumɔɔ akɛ ejɛ esuɔmɔ, mli esha afɔle ji nɔ ni he hiaa. (Mateo 22:37-89; Fil. 4:13) Kristofoi asɔɔmɔ nitsumɔ lɛ baanyɛ aye abua bo koni ona sui ni esa akɛ eje kpo yɛ mɛi ni baaje Harmagedon mli lɛ ahe lɛ eko. Ní ooodi enɛ sɛɛ yɛ obe fɛɛ mli lɛ baaha osuɔmɔ, hemɔkɛyeli, miishɛɛ kɛ toiŋjɔlɛ afa babaoo. (Gal. 5:22, 23) No hewɔ lɛ taomɔ ni agbɛnɛ omɔ gbɛgbamɔ sɔɔmɔ nitsumɔ lɛ mli akɛ oshihilɛ be mli nitsumɔ ni oshwɛɛɛ he kwraa!