Ha Ohiɛ Ahi Ohe Nɔ Ni Okɛ Biblia Kasemɔ He Woji Aha
1 Kwɛ bɔ ni wɔdaa shi yɛ Biblia kasemɔ he woji ni Yehowa kɛhaa wɔ daa kɛtsɔɔ egbɛjianɔtoo lɛ nɔ lɛ hewɔ! Wɔbuɔ nɛkɛ mumɔŋ niyenii nɛɛ waa diɛŋtsɛ. Kɛ wɔnine shɛ wolo hee ko nɔ pɛ lɛ, wɔkɛ miishɛɛ gbeleɔ ebaafai lɛ amli. Kɛkɛ lɛ yɛ be mli ni wɔkaneɔ lɛ jogbaŋŋ lɛ, wɔnaa saneshishinumɔ. Hiɛsɔɔ ni wɔyɔɔ kɛba Yehowa kɛ eyiŋtoi le daa kɛyaa hiɛ.
2 Sɛɛnamɔi ni wɔ diɛŋtsɛ wɔnine eshɛ nɔ lɛ tsirɛɔ Wɔ koni wɔkɛ mɛi krokomɛi aja nibii kpakpai ni wɔkase lɛ. (Mateo 24:14) Wɔhe tswaa shi akɛ wɔɔha gbɔmɛi babaoo ni wɔɔnyɛ anine ashɛ Asafo lɛ woji nɛɛ anɔ. Enɛ hu yeɔ ebuaa amɛ koni amɛkase anɔkwalei ni yɔɔ nɛkɛ Biblia kasemɔ he woji kpakpai nɛɛ amii lɛ. Kɛji akɛ wɔsaa wɔhe jogbaŋŋ ni wɔhiɛ yɛ wɔbe nɔ ni wɔkɛ hegbɛi fɛɛ ni wɔna tsu nii ni wɔkɛ woji heei lɛ ha lɛ, wɔbaanyɛ wɔye wɔbua gbɔmɛi anɔkwafoi pii ni amɛtsɔ amɛhe kɛba Yehowa ŋɔɔ ni amɛbafata wɔhe yɛ esɔɔmɔ mli.
Wolo Ni Akɛbaatsu Nii
3 Wɔkɛ woji ni hiɛ baafai 192 lɛ sɔrɔtoi pii baaha yɛ February kɛ March mli yɛ amɛjara lɛ fa naa. Nɔ ni fata woji nɛɛ ahe ji nɔ ni hiɛ baafai 192 ni akala dani 1980 shɛ lɛ. Asafoi ni amɛnine nyɛɛɛ ashɛ amɛwoji anɔ lɛ baanyɛ ashɛ fioo ko kɛjɛ Asafo lɛ ŋɔɔ bianɛ. Daa gbɛgbalɔi kɛ gbɛgbalɔi krɛdɛɛ baanyɛ ana eko yɛ bɔ ni akɛhaa maŋbii yɛ tafaa be lɛ mli lɛ jara lɛ fa naa. Shiɛlɔi krokomɛi ni eshwɛ fɛɛ baahe enɛ yɛ bɔ ni wolo lɛ jara diɛŋtsɛ ji yɛ tsutsu lɛ fa naa.
Feemɔ Mɔ Ni Bɔɔ Mɔdɛŋ
4 Eŋɔɔ wɔnaa akɛ wɔɔyoo akɛ shiɛlɔi kɛ gbɛgbalɔi babaoo miina ŋaa gbɛi sɔrɔtoi anɔ ni amɛaatsɔ ni amɛye odase yɛ shikpɔŋkuku lɛ mli yɛ naagbai ni wɔyɔɔ mli ŋmɛnɛ lɛ fɛɛ sɛɛ. Naa gbɛ ko ni mɛi komɛi kɛtsu nii ni amɛna akɛ eye omanye. Obaasumɔ ni oka okwɛ.
5 Yaa shikpɔŋkuku lɛ fa ko ni nyɛminuu ko yɔɔ jɛmɛ lɛ mli. Bi gbɔmɛi lɛ akɛ ani amɛle he ni Ashimashi loo Ashimashi hiɔ lɛ. Bɔni afee ni oye obua amɛ ni amɛyoo mɔ lɛ, tsii ta akɛ Ashimashi ni otaoɔ lɛ lɛ ji Yehowa Odasefoi lɛ ateŋ mɔ kome. Kɛji akɛ gbɔmɛi lɛ nyɛ amɛtsɔɔ bo he ni mɔ lɛ yɔɔ loo amɛnyɛɛɛ hu lɛ, daa amɛ shi jogbaŋŋ ni Okɛfata he akɛ “ . . . shi Yehowa Odasefoi lɛ ateŋ mɔ kome hu ji mi. Edɔɔ wɔ akɛ wɔnine shɛɛɛ wɔnanemɛi anɔ koni wɔkɛ amɛ agba Biblia mli saji yɛ shihilɛ ni wɔyɔɔ mli amrɔ nɛɛ ni miheɔ miyeɔ akɛ nyɛ hu nyɛle lɛ hewɔ, ni wɔnanemɛi lɛ ateŋ mɛi komɛi kɛɔ wɔ akɛ edɔɔ amɛ akɛ wɔbasa amɛŋɔɔ dɔŋŋ. Ani Odasefoi komɛi baa nyɛŋɔɔ dani nɛkɛ naatsii nɛɛ ba?”
6 Enɛ baaha ona hegbɛ ni oye odase ni mɔɔ shi ni woɔ yibii. Obaanyɛ odamɔ mɔ ni owieɔ otsɔɔ lɛ lɛ nifeemɔ nɔ okɛ wolo ko aha, aloo kɛ hooo lɛ oshi dɛhiɛmɔ woji bibii lɛ eko, ni oto gbɛjianɔ kɛha sɛɛsaramɔ. Kɛ oshi jɛmɛ lɛ, yaa Ashimashi lɛ ŋɔɔ fioo yɛ eshia, kɛji akɛ amɛnyɛ amɛtsɔɔ bo he ni eyɔɔ. Yɛ no sɛɛ lɛ shi jɛmɛ ni oya shikpɔŋkuku lɛ he kroko ni okɛ nakai gbɛ lɛ nɔŋŋ ayatsu nii ni okɛye odase. Shi, wolo fɛɛ wolo loo nɔ fɛɛ nɔ ni ohiɛ lɛ esa akɛ ohiɛ lɛ yɛ bɔ ni egbalaŋ jwɛŋmɔ kɛbaŋ onɔ akɛ eka shi faŋŋ akɛ okɛ ohe ewo shia-kɛ-shia nitsumɔ mli.
Trukaa Odaseyeli
7 Esa akɛ wɔha wɔhiɛ ahi hegbɛi babaoo ni baa ni baaha wɔnyɛ wɔkɛ woji aha yɛ trukaa odaseyeli mli lɛ nɔ. Susumɔ gbɛi anɔ ni oootsɔ oye saralɔi, wekumɛi, nanemɛi nitsulɔi, skulbii, gbɔmɛi ni wɔkɛ amɛ kpeɔ yɛ shwapoi amli, kɛ mɛi ni wɔkɛ amɛ kpeɔ yɛ shia kɛ shiai yɛ beni wɔtee shiɛmɔ lɛ ahe. Tsɔ hiɛ oto gbɛjianɔ, ni ohiɛ woji be fɛɛ be ni onyɛ okɛha yɛ he fɛɛ he. Yɛ bei babaoo mli lɛ, ewaaa akɛ wɔɔhiɛ woji bibii fe ekome. Wɔbaanyɛ wɔtsu nɔ kpakpa babaoo kɛtsɔ trukaa odaseyeli nɔ.—Pet. 3:15.
8 Yehowa gbɛjianɔtoo loo esafo lɛ kɛ woji babaoo diɛŋtsɛ eha wɔ bɔni afee ni eha wɔhe awa yɛ mumɔŋ ni eye ebua wɔ ni wɔgbɛ sanekpakpa lɛ wɔshwa. Kɛ Wɔha wɔhiɛ hi wɔhe nɔ yɛ hegbɛi ni wɔnaa koni wɔkɛ Biblia kasemɔ he woji aha lɛ nɔ lɛ, eeeye ebua wɔ ni wɔwo Yehowa gbɛi lɛ nɔ gojoo.—Lala 34:3.