Sanekpakpa Lɛ Kɛhamɔ—Kɛtsɔ Biblia Mli Nikasemɔi Anɔ
1 Yɛ sɔɔmɔ afi ni ho nɛɛ mli lɛ, wɔ Maŋtsɛyeli jajelɔi 31,000 lɛ fee Biblia mli nikasemɔi ni fe 48,000 yɛ daa nyɔŋ nɔ yɛ Ghana. Kɛ aja mli lɛ enɛ haa shiɛlɔ fɛɛ shiɛlɔ naa Biblia mli nikasemɔi 1.5 yɛ daa nyɔŋ nɔ. Shi mɛɛ da. Emli babaoo ji nɔ ni gbɛgbalɔi krɛdɛɛ, daa gbɛgbalɔi kɛ gbɛgbalɔi awalɔi ni kɛ aja mli lɛ amɛnaa Biblia mli nikasemɔi aaafee 4 kɛmiimɔ 9 yɛ daa nyɔŋ nɔ lɛ fee. Agbɛnɛ hu, shiɛlɔi babaoo hu fee Biblia mli nikasemɔi enyɔ loo etɛ po yɛ daa nyɔŋ nɔ. No hewɔ lɛ niiamlitaomɔ jogbaŋŋ haa wɔnaa faŋŋ akɛ wɔteŋ mɛi ni fa fe 10,000 (aloo mlijai etɛ mli ekome) efeee Biblia mli nikasemɔ ko kwraa. Te aaafee tɛŋŋ ni wɔteŋ mɛi ni fa aaana miishɛɛ krɛdɛɛ ni jɛɔ mɔ kroko ni atsɔɔ lɛ anɔkwale lɛ mli baa lɛ mli gbɛfaŋnɔ hu?
2 Akɛni wɔsumɔɔ Nyɔŋmɔ kɛ wɔnaanyo hewɔ lɛ, wɔmiisumɔ ni wɔkɛ mɛi krokomɛi aja anɔkwale lɛ. Shi Yehowa yelikɛbuamɔ he miihia wɔ yɛ wɔsɔɔmɔ lɛ mli. (1 Kor. 3:6, 7) No hewɔ lɛ, ani efeŋ nɔ ni hi akɛ wɔɔbɛŋkɛ Yehowa yɛ sɔlemɔ mli ni wɔbi lɛ ni eye ebua wɔ ni wɔje shia Biblia mli nikasemɔ shishi? (1 Yoh. 5:14, 15) No sɛɛ lɛ esa akɛ wɔfee nɔ ni kɛ wɔnibimɔ lɛ kpaa gbee ni wɔkɛ wɔhe awo shiɛmɔ nitsumɔ lɛ mli kwraa kɛmɔ shi yɛ bɔ ni wɔshihilɛ aaaŋmɛ gbɛ lɛ mli, ni wɔŋɔ hegbɛ lɛ ni wɔkɛ amɛ afee shia Biblia mli nikasemɔ be fɛɛ be ni hegbɛ aaaba. Eji anɔkwale akɛ shiɛlɔi ni enyɛ etee nɔ amɛkɛ ŋmɛlɛtswai babaoo etsu nii yɛ shiɛmɔ mli kɛjɛ be mli ni naatsii lɛ je shishi nɛɛ ji mɛi ni yɔɔ shia Biblia mli nikasemɔi ni amɛto shishi jogbaŋŋ ni amɛkɛ mɛi lɛ yakaseɔ nii daa lɛ. Aje enɛɛmɛi ekomɛi ashishi yɛ naatsii lɛ mli kɛtsɔ trukaa odaseyeli nɔ kɛ agbɛnɛ kɛtsɔ mɛi lɛ aŋɔɔ ni amɛtee tɛɛ lɛ hu nɔ.
Hegbɛi Babaoo
3 Wɔkɛ woji wuji, woji tɛtrɛbii kɛ woji bibii akpekpei abɔ eha yɛ shikpɔŋkuku lɛ mli yɛ afii babaoo ni eho lɛ mli. Anaa woji tamɔ Obaanyɛ Ohi Shi Kɛya Naanɔ, Anɔkwa Toiŋjɔlɛ, kɛ Anɔkwale wolo lɛ, kɛ woji krokomɛi babaoo yɛ mɛi akpei abɔ ni amɛjeee Yehowa Odasefoi lɛ ashiai. Enɛ tsɔɔ hegbɛ ni da waa ni wɔnaa ni wɔkɛaaje Biblia mli nikasemɔi heei ashishi.
4 Kɛ shiatsɛ ko kɛɛ wɔ akɛ ele wɔ nitsumɔ lɛ momo aloo akɛ eyɛ wɔ woji lɛ eko momo lɛ, esa akɛ wɔkɛɛ lɛ bɔ ni wɔyɔɔ enɛ he miishɛɛ waa ha. (Kwɛmɔ Reasoning, baafa 20.) Kɛji eyɛ wɔ woji lɛ eko lɛ, wɔbaanyɛ wɔkɛ mlihilɛ abi lɛ ni eyakɔ kɛba ni wɔtsɔɔ lɛ emli nibii komɛi ni yɔɔ miishɛɛ ni he aaaba sɛɛnamɔ aha lɛ kɛ eweku lɛ fɛɛ. Kɛji ekpɛlɛ nɔ lɛ, wɔbaanyɛ wɔna hegbɛ ni wɔkɛ lɛ afee Biblia mli nikasemɔ.
5 Wɔbaanyɛ wɔtsake nɔ ni wɔtsɔ hiɛ wɔtsɔɔ nɛɛ mli doo ni wɔ moŋ wɔtsɔ hiɛ wɔbi shiatsɛ lɛ kɛji eyɛ wɔ woji lɛ eko. Ni enɛ baanyɛ aye omanye jogbaŋŋ, titri lɛ yɛ shikpɔŋkuku ni wɔkɛ woji babaoo eha yɛ mli lɛ mli. Yɛ be mli ni wɔkɛ naanyobɔɔ su etsɔɔ mɔ ni wɔji sɛɛ lɛ, wɔbaanyɛ wɔkɛɛ akɛ, bɔ ni wɔfɔɔ mɛi saramɔ lɛ hewɔ lɛ, mɛi babaoo ni yɔɔ akutso nɛɛ mli lɛ yɛ wɔ woji lɛ eko. Wɔmiisumɔ ni wɔna akɛ mɛi lɛ miina nibii ni aŋmala yɛ mli lɛ ahe sɛɛ. No sɛɛ lɛ obaanyɛ obi shiatsɛ lɛ kɛji eyɛ wɔ woji lɛ eko. Kɛji eyɛ eko lɛ, wɔbaanyɛ wɔkɛ mlihilɛ abi ni ekɛtsɔɔ wɔ ni wɔbi lɛ ni eha wɔtsɔɔ lɛ bɔ ni wɔfeɔ wɔkaseɔ. Shia Biblia mli nikasemɔ baanyɛ ajɛ nɔkwɛmɔ nɔ kuku ni wɔɔfee wɔtsɔɔ lɛ lɛ mli. Kɛji ebɛ wɔ woji lɛ eko lɛ, wɔbaanyɛ wɔkɛ nɔ ni wɔkɛhaa lɛ eko aha lɛ, aloo ni wɔbi lɛ tɛɛ kɛji eweku lɛ baasumɔ ni amɛna shia Biblia mli nikasemɔ ni aheee mɔ nɔ ko.
Okɛ Niiasɛɛyoomɔ Atsu Nii
6 Akɛni gbɔmɛi bɛ deka hewɔ lɛ, eji nilee gbɛ akɛ wɔɔyoo nii jogbaŋŋ ni kɛ ahere wɔ hiɛmɛɛ lɛ, wɔkatsɛ fe nine. Ebaanyɛ efee akɛ wɔɔha wɔ klɛŋklɛŋ nikasemɔi lɛ afee minitii 15 pɛ. Kɛ shiatsɛ lɛ le akɛ wɔfiteŋ ebe babaoo lɛ, ebaasumɔ ni wɔbasara lɛ daa gbi. Kɛ wɔna wɔto nikasemɔ lɛ shishi ni shiatsɛ lɛ miishɛɛ da kɛtee hiɛ lɛ, no lɛ wɔbaanyɛ wɔye be ni sɛɛ jɛkɛ doo yɛ nikasemɔ lɛ mli. Eji anɔkwale akɛ mɛi komɛi baasumɔ ni kɛjɛ shishijee mli nɔŋŋ lɛ, amɛkɛ be ni sɛɛ jɛkɛ akase nii lɛ.
7 Mɛi ni tamɔ gwantɛŋi yɛ shikpɔŋkuku lɛ mli ni wɔyelikɛbuamɔ he miihia amɛ, ni amɛteŋ mɛi babaoo yɛ wɔ woji lɛ eko. Ŋwanejee ko bɛ he akɛ amɛteŋ mɛi komɛi miiye ŋkɔmɔ ni amɛmiidɔmɔ ŋtsɔi yɛ nihiinii ni afeɔ yɛ je lɛ mli ŋmɛnɛ lɛ hewɔ. (Ezek. 9:4) Eji hegbɛ ni wɔna, jeee ni wɔkɛja woji ni wieɔ Maŋtsɛyeli ni baajie adesai anaagbai nɛɛ kɛya lɛ he lɛ kɛkɛ, shi moŋ ni wɔkɛ anɔkwale lɛ aya mɛi ni hiɛ tsui krɔŋŋ lɛ aŋɔɔ kɛtsɔ Biblia mli nikasemɔ nɔ.—Mat. 28:19, 20.