Akɛ Woji Tɛtrɛbii Ni Ekaaa Baaha
1 The Watchtower lɛ kɛ Awake! ni ji April kɛ May nɔ lɛ hiɛ saji komɛi ni yɔɔ miishɛɛ waa kɛha mɛi fɛɛ ni taoɔ wɔsɛɛ be ni miishɛɛ yɔɔ mli lɛ. Akɛ nɔkwɛmɔ nɔ lɛ, nɔ ni baaje kpo yɛ April 1 kɛ 15 The Watchtower lɛ mli lɛ ji “Namɔ Baanyiɛ Adesai Ahiɛ Kɛya Toiŋjɔlɛ Mli?” kɛ “Jeŋ Toiŋjɔlɛ—Mɛni Ebaatsɔɔ Diɛŋtsɛ?” Mɛi fioo ko pɛ le nɛkɛ sanebimɔi nɛɛ ahetoo ni ja. Shi Yehowa shiko wɔ akɛ mɛi ni yiŋ feɔ amɛ kɔshikɔshi (Amos 3:7) Yɛ anɔkwale mli lɛ, gbɔmɛi akpekpei abɔ ni yɔɔ tsuijurɔ lɛ baasumɔ ni amɛna hetoo ni ja.
2 Nɔ ni fata saji ni baaje kpo yɛ April kɛ May Awake! lɛ mli hu ji ‘Mɛɛ Gbɛkpamɔ Yɔɔ Kɛha Wala Sɛɛkɛlɛ?’ ‘Shikpɔŋ ni nɔ Tse Keŋkeŋ—Ani Obaahi Wala Mli ni Ona Enɛ?’ kɛ ‘Jeŋ ni Tui Bɛ Mli—Ani Eeenyɛ Eba Mli?’ Ani okpɛlɛɔ nɔ akɛ esa akɛ gbɔmɛi ni yɔɔ oshikpɔŋkuku lɛ mli lɛ ana hegbɛ ni amɛkane enɛɛmɛi?
HE NI AKƐWOƆ MLI BABAOO
3 Esa akɛ wɔto gbɛjianɔ bianɛ ni wɔkɛ wɔhe awo nɛkɛ woji tɛtrɛbii ni ekaaa ni baa yɛ April kɛ May mli nɛɛ fɛɛ ajaa mli. Mɛni hewɔ otooo gbɛjianɔ bianɛ koni otuu be ni fa fe bɔ ni ofeɔ daa lɛ oha woji tɛtrɛbii ajaa? Akɛni aasusu saji ni sa yɛ ebe naa pɛpɛɛpɛ nɛɛ he hewɔ lɛ, wɔbaanyɛ ni wɔkɛ woji tɛtrɛbii nɛɛ aha kɛ hekɛnɔfɔɔ kɛ miishɛɛ.
4 Mɛni baanyɛ aye ebua wɔ ni wɔha wɔ woji tɛtrɛbii ni wɔkɛhaa lɛ aya hiɛ? Kɛ wɔɔje shishi lɛ, esa akɛ wɔkane woji tɛtrɛbii lɛ fɛɛ jogbaŋŋ. Kɛ wɔle woji tɛtrɛbii lɛ amli saji jogbaŋŋ lɛ, ekaa ni wɔyɔɔ ni wɔkɛaaha lɛ baafa. Yɛ be mli ni wɔkaneɔ lɛ, esa akɛ wɔtao emli saji otii ni wɔbaama nɔ mi. Mɛni yɔɔ emli saji lɛ fɛɛ eko mli ni baaŋɔɔ gbɔmɛi pɔtɛɛ komɛi anaa? Wɔbaanyɛ wɔbi wɔ diɛŋtsɛ wɔhe akɛ: ‘Namɔ titri hiɛ baasa nɛkɛ saji nɛɛ? Te emli nɔ ni baaŋɔɔ akutsoŋnyo ko naa, naanyo ko naa, jarayelɔ loo nitsumɔtsɛ ko naa, nikaselɔ ko naa, kɛ ekrokomɛi?’ Bɔni afee ni wɔhe asa lɛlɛŋ lɛ, esa akɛ wɔ diɛŋtsɛ lɛ wɔnyɛ wɔjie woji tɛtrɛbii lɛ ayi wɔha yɛ wɔnilee ni wɔna yɛ he lɛ kɛ emli saji lɛ ni wɔna he miishɛɛ lɛ hewɔ.
OKƐ OTI KO AMA SHi OHA BO DIƐŊTSƐ OHE
5 Mɛi komɛi baasumɔ ni amɛkɛ woji tɛtrɛbii abɔ ni amɛkɛaaha yɛ April aahu kɛyashi June lɛ falɛ ko ama amɛhiɛ, titri lɛ yɛ May kɛ June mli be mli ni wɔkpaa gbɛ akɛ wɔnine baashɛ nɔ ni ji krɛdɛɛ lɛ anɔ lɛ. Wɔmiiwo hewalɛ koni mɛi pii kɛ amɛhe awo gbɛgbalɔi awamɔ nitsumɔ lɛ mli yɛ Kaimɔ be lɛ mli. Ani ooto gbɛjianɔ koni okɛ ohe awo mli? Bɔ fɛɛ bɔ ni ogbɛjianɔtoo ji lɛ, too gbɛjianɔ kɛtsɔ hiɛ koni oja krɛdɛɛ nɔ nɛɛ babaoo.
6 Eji anɔkwale akɛ, gbɛi sɔrɔtoi pii yɛ ni aaatsɔ nɔ akɛ woji tɛtrɛbii lɛ aha yi shia-kɛ-shia sɔɔmɔ lɛ mli. Nyɛmimɛi pii ena mɛi pɔtɛɛ ni amɛkɛ woji tɛtrɛbii lɛ haa amɛ daa. Kɛ aafee sɛɛsaramɔi yɛ mɛi ni yɔɔ wiemɔi lɛ he miishɛɛ lɛ anɔ lɛ, abaanyɛ akɛ eheei ni ebavlɛ aha amɛ. Trukaa odaseyeli hu ji gbɛ kome ni atsɔɔ nɔ ayeɔ odase ni akɛ woji tɛtrɛbii haa. Yɛ bei komɛi amli lɛ kɛ okɛ mfoniri ni mɔɔ mɔ jwɛŋmɔ ni yɔɔ ehehaa nɔ lɛ hiɛ lɛ tsɔɔ lɛ, no pɛ po baaha onyɛ oje sanegbaa shishi ni okɛha mɔ ko.
7 Kaimɔ akɛ wɔ woji tɛtrɛbii lɛ yɛ sɔrɔto. Amɛtsɔɔ gbɛ ni kɛ mɔ yaa toiŋjɔlɛ, miishɛɛ, kɛ naanɔ wala mli. (Yoh. 17:3) No hewɔ lɛ too ogbɛjianɔ bianɛ ni okɛ saji krɛdɛɛ ni yɔɔ April kɛ May The Watchtower lɛ kɛ Awake! lɛ mli Iɛ aha ni ona mli ŋɔɔmɔ.