Be Kɛha Nitsumɔ ni fa
1 Yɛ be mli ni ŋmɛnɛŋmɛnɛ yiwalɛ nibii agbɛjianɔtoo nɛɛ bɛŋkɛɔ enaagbee kpaakpa ni wɔnaa bɔ ni Yehowa jɔɔ wɔ sɔɔmɔ nitsumɔ lɛ nɔ babaoo lɛ, belɛ ehe hiaa ni wɔbo bɔfo Petro ŋaawoo akɛ ‘wɔfimɔ wɔjwɛŋmɔ hɛ wɔha nitsumɔ’ lɛ toi.—1 Pet. 1:13; Yes. 60:22.
2 Beni Petro kɛ ŋaawoo ni yɔɔ yiteŋgbɛ nɛɛ ha lɛ, no mli lɛ eeŋma yɛ yiwalaheremɔ ni baanyɛ atsɔ wɔnɔ kɛtsɔ Yesu Kristo la ni efɔse eshwie shi lɛ nɔ lɛ he. Maŋtsɛyeli lɛ he sanekpakpa lɛ ni wɔɔjaje lɛ ji gbɛ kome ni he hiaa ni wɔɔnyɛ wɔtsɔ nɔ wɔjie wɔhemɔkɛyeli kpo wɔtsɔɔ ni wɔtsɔɔ hiɛsɔɔ ni wɔyɔɔ kɛha sɛɛnamɔi ni wɔnine eshɛ nɔ kɛjɛ Yehowa suɔmɔ ni ejie lɛ kpo kɛtsɔ nikeenii ni ji e-Bi lɛ nɔ lɛ. (Yoh. 3:16) Kaimɔ be lɛ ji be ni he hiaa ni wɔfee ekaa waa yɛ nɛkɛ nitsumɔ ni Nyɔŋmɔ kɛha nɛɛ mli.
KAIMƆ GBIJURƆYELI KƐ MAŊSHIƐMƆ KRƐDƐƐ
3 Abaaye afi nɛɛ Kaimɔ lɛ yɛ April 10, beni hulu enyɔ shi. Amrɔ nɛɛ po, wɔbaanyɛ wɔpɛi wekukpaa ni ka wɔkɛ Yehowa Nyɔŋmɔ teŋ lɛ mli kɛ agbɛnɛ gbɛ ni wɔtsɔɔ nɔ wɔkaiɔ Yesu afɔleshaa lɛ hu bianɛ ni wɔkɛkpa nakai be krɛdɛɛ lɛ gbɛ. Ani wɔjieɔ wɔhemɔkɛyeli kpo daa gbi kɛtsɔɔ Yehowa jalɛ taomɔ nii ni wɔkɛ wɔhe kpɛtɛɔ he gbagbalii yɛ wɔsusumɔ, wɔwiemɔ, kɛ jeŋba mli lɛ nɔ? Ani wɔmiijie suɔmɔ kpo kɛmiitsɔɔ mɛi krokomɛi yɛ wɔhiɛ ni wɔmiaa koni wɔkɛshiɛ Maŋtsɛyeli lɛ kɛ kaselɔi afeemɔ mli? Daa afi kɛ Kaimɔ be lɛ shɛ lɛ, wɔjeɔ gbɛ wɔkaiɔ nɔ ni Yehowa Nyɔŋmɔ kɛ Yesu efee kɛha wɔ lɛ yɛ gbɛ krɛdɛɛ nɔ. (Luka 22:19;1 Kor. 11:23, 24) Esa akɛ bɔ ni wɔjwɛŋɔ ni wakɛkaiɔ nii nɛɛ akanya wɔ ni wɔfee nii yɛ gbɛ kpakpa nɔ bɔ ni wɔ aŋkroaŋkro nyɛmɔi kɛ shihilɛi baaŋmɛ gbɛ.
4 Yɛ March 25 lɛ, Yehowa Odasefoi asafoi pii ni yɔɔ jeŋ fɛɛ lɛ baaha maŋshiɛmɔ krɛdɛɛ ko ni ji “Mɔ Wala Diɛŋtsɛ lɛ Mli!” Mɛɛ hegbɛ fɛfɛo po nɛ kɛha mɛi heei lɛ akɛ amɛaaje shishi ni amɛkɛ asafo lɛ abɔ! Esa akɛ awo mɛi ni baa maŋshiɛmɔ krɛdɛɛ lɛ shishi lɛ hewalɛ ni amɛba Kaimɔ lɛ shishi hu yɛ April 10.
HA WOJI TƐTRƐBII KRƐDƐƐ LƐ AJAA AYA HIƐ
5 Buu-Mɔɔ lɛ kɛ Awake! lɛ tsuɔ nitsumɔ ko ni he hiaa yɛ wɔ maŋ sɔɔmɔ lɛ mli yɛ be mli ni ekɛ mumɔŋ niyenii kɛ nikanemɔ ni eba yɛ ebe naa pɛpɛɛpɛ haa wɔ fɛɛ lɛ. Maŋtsɛyeli shiɛlɔi fɛɛ ahiɛ baasɔ mɔdɛŋ diɛŋtsɛ ni abɔ ni akɛtsu April kɛ May woji tɛtrɛbii lɛ ahe nii lɛ. Wɔbaama enɛɛmɛi anɔ mi yɛ be mli ni wɔkɛ woji tɛtrɛbii lɛ haa koni ashɛ yɛ May kɛ June mli lɛ. Bɔɔ mɔdɛŋ ni ole eko fɛɛ eko ni onine aaashɛ nɔ lɛ mli sane amrɔ nɔŋŋ. Enɛ baakanya ekaa ni oyɔɔ ni ekɛaaha yɛ shiɛmɔ mli yɛ be mli ni okɛ woji tɛtrɛbii lɛ haa koni ashɛ lɛ kɛ agbɛnɛ yɛ be mli ni okɛ ekomekomei haa koni ahe aloo yɛ be mli ni okɛ woji tɛtrɛbii enyɔ kɛ wolo bibioo fataa he haa mɛi ni nyɛɛɛ ashɛ lɛ.
6 Ani obaanyɛ oto gbɛjianɔ yɛ obe he gbɛjianɔtoo mli koni ofee gbɛgbalɔ awalɔ yɛ April kɛ May? Kɛji akɛ shiɛlɔi pii fee ekome yɛ asafo lɛ mli akɛ amɛaafe gbɛgbalɔi yɛ be kometoo mli lɛ, amɛbaanyɛ amɛye amɛbua ni amɛ wowoo amɛhe hewalɛ yɛ nɛkɛ be krɛdɛɛ ni nitsumɔi faa yɛ mli nɛɛ mli. Ebaaŋɔɔ onukpai lɛ anaa akɛ amɛaaye amɛbua kɛtsɔ gbɛjianɔtoi krokomɛi anɔ koni ana kutuu odaseyeli yɛ he ni ehe hiaa yɛ kɛ aaahi.
7 Susumɔ shihilɛ ni bo diɛŋtsɛ oyɔɔ mli lɛ he, tamɔ weku mli gbɛnaa nii, gbɔmɔtsoŋ hewalɛ, heloo gbɛfaŋ nitsumɔ, aloo skul be he gbɛjianɔtoo. Kɛ onyɛɛɛ ofee gbɛgbalɔ yɛ nɛkɛ be nɛɛ mli lɛ, belɛ te ooofee tɛŋŋ ni oha ohe ni okɛwoɔ sɔɔmɔ nitsumɔ lɛ mli lɛ afa loo eya hiɛ? Eka shi faŋŋ akɛ Yehowa hiɛ sɔɔ susuma muu fɛɛ mli sɔɔmɔ ni tsɔɔ suɔmɔ ni wɔyɔɔ kɛha lɛ lɛ kɛ hiɛsɔɔ hu ni wɔna wɔha lɛ yɛ e-Bi Yesu, ni ji ni keenii ni jara wa ni ekɛha wɔ lɛ hewɔ. Yɛ be mli ni wɔtsɔɔ Nyɔŋmɔ Wiemɔ lɛ nɔ wɔpɛiɔ wɔ diɛŋtsɛ wɔmli ni agbɛnɛ wɔwajeɔ wɔjwɛŋmɔi kɛhaa nitsumɔ lɛ wɔbaanyɛ wɔna hekɛnɔfɔɔ akɛ Yehowa mumɔ lɛ baawaje wɔ yɛ yijiemɔ afɔle shaa ni saa ehiɛ ni wɔkɛhaa lɛ lɛ mli.—Heb. 13:15.