Wɔhiɛ Ni Wɔɔya Yɛ Sɔɔmɔ Nitsumɔ Lɛ Mli
1 Blema abɛbua ko ni kɔɔ hiɛyaa he lɛ kɛɔ akɛ: “Jee shishi yɛ he ni oyɔɔ lɛ. Shi kaahi he ni oyɔɔ lɛ sɔŋŋ.” Kwɛ bɔ ni nakai wiemɔ lɛ kɔɔ bɔ ni wɔɔya wɔhiɛ yɛ sɔɔmɔ nitsumɔ lɛ mli lɛ he ehaa! Beni oje sɔɔmɔ nitsumɔ lɛ shishi lɛ, no mli lɛ ekolɛ Maŋtsɛyeli shɛɛ sane lɛ he wiemɔ kuku ko pɛ onyɛɔ okɛhaa. Shi kɛji afii fioo ko eho ni oyako ohiɛ fe nakai, ni odamɔ he ni oje shishi yɛ lɛ lolo lɛ, no lɛ mɛni obaanyɛ ofee yɛ he?
2 Klɛŋklɛŋ nii ni sa akɛ ofee ji ni obi Yehowa ni eha bo nilee ni he hiaa ni okɛaatsɔɔ nii yɛ ŋaa mli. (Abɛi 15:14; Yak. 1:5) Nifeemɔ ni ji enyɔ ji ni otsu nii ni ekɛ osɔlemɔ lɛ akpa gbee. Too be pɔtɛɛ ko ni okɛti shiɛmɔ wiemɔi kukuji ni yɔɔ Reasoning wolo lɛ mli lɛ amli. Taomɔ emli ekome ni osusuɔ akɛ obaanyɛ okɛtsu nii jogbaŋŋ, ni oti nakai wiemɔ kuku lɛ mli shii abɔ kɛyashi be mli ni ooonyɛ okai wiemɔ lɛ fɛɛ jogbaŋŋ. Nifeemɔ ni ji etɛ ji ni ofata onyɛmimɛi lɛ ahe yɛ shiɛmɔ nitsumɔ lɛ mli bɔni afee ni onyɛ okɛ wiemɔ kuku ni osaa lɛ aha.
Nanemɛi Baaye Abua Bo
3 Ekolɛ obaakɛɛ akɛ. ‘Ekɛɛmɔ tamɔɔɔ efeemɔ.’ Eji anɔkwale, shi no hewɔ ni oyɔɔ nanemɛi ni baaye amɛbua bo lɛ. Kɛji oji gbekɛ lɛ, okɛ ofɔlɔi loo shiɛlɔi ni yɔɔ niiashikpamɔ, ni ji sɔɔlɔi ni woɔ yibii lɛ awie enɛ he. Bi amɛ ŋaawoo yɛ bɔ ni ooofee okɛ mɛi agba sane yɛ shinaai anaa lɛ he. Ekolɛ amɛaawo ŋaa ni otao be ni okɛti shiɛmɔ wiemɔ kuku ni osaa ohe yɛ mli lɛ mli. Amɛbaanyɛ amɛfee shiatsɛ amɛha bo, ni amɛbaateetee shitee-kɛ-woo wiemɔi ni wɔkɛkpeɔ yɛ naatsii nɛɛ mli lɛ ekomɛi ashi. Kɛ oti mli shii abɔ lɛ, obaanyɛ ole bɔ ni ooofee okɛ mɛi agba sane yɛ ŋaa gbɛ nɔ.
4 Oyɛ nanemɛi krokomɛi hu ni baanyɛ aye ebua bo. Gbɛgbalɔi yɛ ni amɛkase ŋaa gbɛi ni atsɔɔ nɔ ashiɛɔ kɛtsɔ niiashikpamɔ nɔ, kɛ agbɛnɛ kɛtsɔ Gbɛgbalɔi atsɔɔmɔ Skul ni amɛtse lɛ nɔ. Nyɛ kuu lɛ hiɛnyiɛlɔ lɛ loo sɔɔmɔ nɔkwɛlɔ lɛ hu baanyɛ ana hegbɛ ni ekɛ bo atsu nii yɛ shia kɛ shia koni amɛtsɔ no nɔ amɛfee gbɛ ni atsɔɔ nɔ akɛ mɛi wieɔ ni akɛ amɛ susuɔ nii ahe lɛ he nɔkwɛmɔ nii amɛtsɔɔ bo.
Mɛi Ni Yɔɔ Wiemɔ Lɛ He Miishɛɛ Lɛ Asɛɛ Ni Wɔɔdi
5 Wɔyɛ he miishɛɛ akɛ wɔɔtsa nɔ wɔkɛ mumɔŋ yelikɛbuamɔ babaoo aha gbɔmɛi ni heɔ wɔ woji lɛ. Enɛ tsɔɔ akɛ esa akɛ wɔku wɔsɛɛ wɔya amɛŋɔɔ ni wɔyakanya amɛmiishɛɛ lɛ lolo. Dani wɔɔya sɛɛsaramɔ lɛ, saamɔ otĩ nɔ ni owie beni otee jɛmɛ klɛŋklɛŋ kwraa lɛ mli ekoŋŋ bɔni afee ni onyɛ otsa saneyitso ni ena he miishɛɛ lɛ he sanegbaa lɛ nɔ jogbaŋŋ yɛ gbɛ ni baamɔ shi nɔ. Ha ehi ojwɛŋmɔ mli hu akɛ, yɛ be mli ni wɔtɛoɔ ni wɔshwieɔ nɔ nu lɛ, Yehowa ji mɔ ni haa ekwɛ̃ɔ. Sɔlemɔ obi egbɛtsɔɔmɔ dani oyafee sɛɛsaramɔ lɛ. (1 Kor. 3:6; 2 Kor. 9:10) Yɛ be mli ni wɔyeɔ wɔbuaa mɛi krokomɛi hu ni amɛkase nii lɛ, wɔ diɛŋtsɛ hu wɔyaa wɔhiɛ.
6 No sɛɛ lɛ gbɛ ni he hiaa ji Biblia mli nikasemɔ shishijee kɛ efeemɔ. Kɛji oshɛko jɛmɛ yɛ ohiɛ ni oyaa yɛ osɔɔmɔ nitsumɔ lɛ mli lɛ, no lɛ yaa nɔ ebɛŋkɛ Yehowa yɛ sɔlemɔ mli ni obi lɛ ni eye ebua bo ni ona mɛi ni tamɔ gwantɛŋi lɛ eko ni ole lɛ. Ekolɛ obaana akɛ sɛɛnamɔ yɛ he akɛ oookwɛ bɔ ni tsɔɔlɔ ko ni enitsɔɔmɔ mɔɔ shi Iɛ feɔ Biblia mli nikasemɔ ehaa koni bo hu okase gbɛi ni etsɔɔ nɔ etsɔɔ nii lɛ. Agbɛnɛ hu, esa akɛ oti saji ni aŋmala yɛ nitsɔɔmɔ he, tamɔ nɔ ni yɔɔ Our Bulletin nɛɛ mli, yɛ saneyitso ni ji “Ni Wɔɔfee Weku Nikasemɔi ni Woɔ Yibii” shishi lɛ mli, ejaakɛ abaanyɛ akɛ gbɛi ni atsɔɔ yɛ mli lɛ hu atsu nii yɛ shiɛmɔ mli. Kɛ otsɔ nɛkɛ gbɛ nɔ osaa ohe lɛ, no baaha ofee klalo akɛ ooofee nikasemɔ kɛji aha osɔlemɔ lɛ hetoo.
Okɛ Otii Amamɔ Ohiɛ Ni Oshɛ He
7 Otii ni ji nitsɔɔmɔ ni mɔɔ shi, sɛɛsaramɔi ni wɔɔya, kɛ nikasemɔi afeemɔ he ni wɔɔshɛ lɛ heɔ be. Ani obaanyɛ okɛ oti kroko ama ohiɛ, ni ji gbɛgbalɔi awalɔ loo daa gbɛgbalɔ ni ooofee? Yɛ be mli ni oyaa nɔ oyaa ohiɛ yɛ sɔɔmɔ nitsumɔ lɛ mli lɛ, no aaaha ofee hewalɛwoo jɛɛhe kɛha mɛi krokomɛi. Ni kɛji odamɔɔɔ he ni oyɔɔ lɛ sɔŋŋ, shi otee ohiɛ kɛtsara nɔ lɛ, no lɛ onine baashɛ Yehowa dɛŋ jɔɔmɔi babaoo nɔ.