Wɔ Woji Ajaa He Gbɛjianɔtoo ni Aha Efee Mlɛo

¹ Kɛbashi amrɔ nɛɛ, woji ajaa he gbɛjianɔtoo ni aha efee mlɛo ni abiii ehe nyɔmɔwoo lɛ etsu nii aahu afi kome. Ani gbɛjianɔtoo nɛɛ efee nɔ ni yeɔ omanye? Shiɛmɔyaa he akɔntaabui tsɔɔ akɛ woji kɛhamɔ etee hiɛ. Akɛ hegbɛ miiha gbɔmɛi akpekpei abɔ diɛŋtsɛ koni ‘amɛbayɛ wala nu lɛ yaka.’—Kpoj. 22:17.

² Shi kɛlɛ, ejeee nɔ ni kã wɔnɔ doo, ni jeee wɔsuɔmɔ naa hu ji akɛ wɔkɛ woji aaaha mɔ fɛɛ mɔ ni sumɔɔ kɛkɛ bɔ ni esaaa. Tamɔ bɔ ni wɔkɛ wɔ diɛŋtsɛ wɔnibii tsuɔ nii yɛ nilee mli lɛ, eji gbɛnaa nii ni kã shiɛlɔ fɛɛ shiɛlɔ nɔ akɛ ekɛ woji ni etsɔɔ asafo ni eyɔɔ mli lɛ nɔ enine shɛɔ nɔ kɛjɛɔ Asafo lɛ dɛŋ ni abiii ehe nyɔmɔwoo lɛ atsu nii yɛ nilee mli. Asafo lɛ woji ni ekɛhaa shiɛlɔi ni ebiii ehe nyɔmɔwoo lɛ etsɔɔɔ kwraa akɛ afiteee shika kwraa yɛ efeemɔ kɛ ejaa mli. Esa akɛ mɔ fɛɛ mɔ hiɛ asɔ sɛɛnamɔ ni yɔɔ wɔ woji lɛ ahe lɛ jogbaŋŋ diɛŋtsɛ yɛ be mli ni ayeɔ abuaa mɛi ni hiɛ tsui ni ja lɛ kɛtaoɔ anɔkwa nilee ni kɔɔ Yehowa Nyɔŋmɔ kɛ e-Bi Yesu Kristo he lɛ.—Yoh. 17:3.

³ Te Asafo lɛ feɔ tɛŋŋ enyɛɔ ekɛ ewoji haa mɛi fɛɛ ni ebiii nyɔmɔwoo ko yɛ he lɛ? Tooyelii ji nɔ ni akɛwoɔ ehe shikafitemɔ ni anyɛɛɛ naa atsĩ lɛ he nyɔmɔ yɛ efeemɔ kɛ ejaa mli. Yehowa sɔɔlɔi ni ejɔɔ amɛhe nɔ lɛ ji mɛi tuuntu ni kɛ shika nɛɛ yeɔ amɛbuaa. Yehowa Odasefoi kpako gbɛ akɛ maŋbii lɛ ji mɛi ni kɛ shika baafĩ Maŋtsɛyeli sanejajemɔ nitsumɔ ni hiamɔ eba he fe fɛɛ nɛɛ sɛɛ. Wɔbalako shika kɛjɛko maŋbii adɛŋ pɛŋ, ni wɔfeŋ nakai amrɔ nɛɛ hu. Shi kɛlɛ, ayɛ tooyelii ni jɛɔ suɔmɔ mli ni mɛi ni yɔɔ wiemɔ lɛ he miishɛɛ lɛɛlɛŋ lɛ, kɛ mɛi ni wɔkɛkpeɔ yɛ shiɛmɔ mli ni amɛtsɔɔ hiɛsɔɔ lɛ kɛhaa lɛ he miishɛɛ.

⁴ Bɔ ni Tooyeli He Gbɛjianɔtoo lɛ Etee Nɔ Eha: Asafoi babaoo kɛ shika miifĩ Asafo lɛ jeŋ muu fɛɛ nitsumɔ lɛ sɛɛ kɛmiitsara nɔ (daa nyɔŋ nɔ). Eyɛ mli akɛ shika ni afiteɔ kɛfeɔ woji bianɛ lɛ etee ŋwɛi waa moŋ, shi nyɛmimɛi yeɔ too lolo kɛwoɔ shika ni afiteɔ yɛ wɔ jeŋ muu fɛɛ shiɛmɔ nitsumɔ hewɔ lɛ he nyɔmɔ ni jeee kɛha woji ni amɛkɔlɔɔ lɛ pɛ kɛkɛ. Enɛ sa yijiemɔ.

⁵ Teemɔŋ, weku, kɛ asafoŋ nikasemɔi feɔ mlɛo yɛ woji ni nine shɛɔ nɔ lɛ hewɔ. Hiɛ esɔ mumɔŋ hiɛyaa ni jɛɔ fɛɛ mli kɛbaa lɛ waa diɛŋtsɛ. Shi kɛlɛ, woji ni ashɛɛɛ ashwieee shi tamɔ Insight kɛ wolokpoi lɛ ajara wa. No hewɔ lɛ, esa akɛ akɛ nilee ashɛ enɛɛmɛi. Yɛ nɔ najiaŋ ni weku mli bii ateŋ mɔ fɛɛ mɔ baashɛ ekome lɛ, weku wojiatoohe ni aaaná lɛ baafee nɔ ni sa. Nyɛmimɛi komɛi ni yɔɔ woji memeji kɛ wolokpoi lɛ kɛ enɛɛmɛi eke Maŋtsɛyeli Asa wojiatoohe ni ato he gbɛjianɔ jogbaŋŋ lɛ bɔni afee ni mɛi fɛɛ anyɛ aná woji ni anáaa kɛjɛɛɛ Asafo lɛ dɛŋ dɔŋŋ lɛ he sɛɛ.

⁶ Nɔ ni Wɔ Tooyelii lɛ Tsuɔ He Nii: Eji nɔ ni sa akɛ wɔɔsaa wɔhe koni wɔkɛ be kuku atsɔɔ bɔ ni ajɛɔ suɔmɔ mli akɛ tooyelii fĩɔ wɔ jeŋ muu fɛɛ Biblia mli tsɔsemɔ nitsumɔ lɛ mli faŋŋ. Akɛ shika fɛɛ ni akɛyeɔ abuaa lɛ woɔ shika babaoo ni afiteɔ yɛ Maŋtsɛyeli shiɛmɔ nitsumɔ ni atsuɔ yɛ ŋmɛnɛŋmɛnɛ be nɛɛ mli lɛ he nyɔmɔ. Kɛfata woji ni afeɔ koni aja yɛ jeŋ muu fɛɛ lɛ he lɛ, Asafo lɛ kwɛɔ nitsumɔhe niji, Betel shiai, sɔɔmɔ kɛ maŋsɛɛ sanekpakpa shiɛlɔi askul srɔtoi, maŋsɛɛ sanekpakpa shiɛlɔi, nɔkwɛlɔi gbɛfalɔi, kɛ nitsumɔi krokomɛi babaoo ni akɛyeɔ abuaa ni he hiaa kɛha nitsumɔ ni Yesu kɛwo ekaselɔi lɛ adɛŋ lɛ fɛɛ he nitsumɔ.—Mat. 24:14; 28:19, 20.

⁷ Hiɛyaa babaoo ni yaa nɔ yɛ Yehowa webii ateŋ lɛ etsirɛ mɛi babaoo koni amɛbi nɔ ni amɛbaanyɛ amɛfee ni amɛkɛye amɛbua. Amɛteŋ mɛi babaoo nyɛɛɛ ni amɛ diɛŋtsɛ amɛye amɛbua kɛha nitsumɔhe niji heei kɛ Maŋtsɛyeli Asai amaamɔ aloo ni amɛaafã gbɛ kɛaaya shikpɔŋkukuji ni yɔɔ shɔŋŋ lɛ anɔ koni amɛyajaje sanekpakpa lɛ yɛ jɛmɛ. Shi bɔni afee ni shiɛlɔi babaoo kɛ amɛwekui aná nitsumɔi ni yɔɔ miishɛɛ nɛɛ mli gbɛfaŋnɔ bɔ ni amɛaanyɛ lɛ, amɛkɛfeɔ amɛsubaŋ akɛ amɛkɛ nɔ ko aaato daa koni amɛkɛye amɛbua jeŋ muu fɛɛ nitsumɔ lɛ. (Okɛto 1 Korintobii 16:1, 2 he.) Nɛkɛ gbɛ nɔ atsɔɔ akɛ shika fĩɔ Asafo lɛ nitsumɔi fɛɛ asɛɛ, kɛfata woji ajaa lɛ he. Esaaa akɛ mɔ ko mɔ ko kwɛɔ suɔmɔ mli ni ajɛɔ ayeɔ too ahaa jeŋ muu fɛɛ nitsumɔ lɛ tamɔ nyɔmɔwoo ko kɛkɛ kɛha woji lɛ ajara.

⁸ Kɛ wɔmiibɛŋkɛ shiatsɛmɛi loo mɛi krokomɛi kɛ yiŋtoo lɛ akɛ wɔɔye odase lɛ, esa akɛ wɔsaa wɔhe koni wɔkɛ amɛ agba Biblia mli saneyitso ko he sane. Akɛ hiɛkpamɔ wiemɔi babaoo ni ŋɔɔ, ní Biblia mli saneyitsei babaoo ni sa fata he lɛ he gbɛtsɔɔmɔi eha yɛ Reasoning From the Scriptures loo Wɔ Maŋtsɛyeli Sɔɔmɔ srɔtoi lɛ amli. Esa akɛ shiɛlɔ lɛ adamɔ bɔ ni mɔ lɛ feɔ enii yɛ Maŋtsɛyeli shɛɛ sane lɛ he lɛ nɔ koni ele bɔ ni eeefee eya nɔ ekɛ woji lɛ aha. Kɛ etamɔ nɔ ni miishɛɛ ni aná yɛ he lɛ faaa bɔ ni baatsɔɔ akɛ obaanyɛ okɛ wolo ko loo nɔ kroko aha lɛ lɛ, obaanyɛ okpɛ oyiŋ ni otsɔ ŋaa gbɛ nɔ okɛ sanegbaa lɛ aba naagbee ni oya mɔ kroko hu ŋɔɔ. Aloo obaanyɛ oshĩ dɛhiɛmɔ wolo ko kɛ́ mɔ lɛ wo shi akɛ ebaakane emli shɛɛ sane lɛ.

⁹ Kwɛmɔ akɛ Ayɛ He Miishɛɛ Lɛɛlɛŋ Lo: Kɛ mɔ ko kɛ oyaiyeli nyiɛ gbɛjegbɛ lɛ nɔ kɛmiiba lɛ, obaanyɛ oha lɛ dɛhiɛmɔ wolo ko kɛkɛ ní okɛɛ lɛ akɛ, “Naa sanekpakpa ko ní obaakane kɛ́ oná dekã.” Kɛ etamɔ nɔ ni mɛi kɛ oyaiyeli enyiɛɛɛ lɛ, okɛ woji tɛtrɛbii lɛ aha, ní otsɔɔ tooyeli he gbɛjianɔtoo lɛ mli. Ehi akɛ okɛ woji lɛ aaawo gbɔmɛi adɛŋ yɛ he fɛɛ he ni ooona amɛ yɛ. Shi kɛlɛ, ehe miihia ni mɛi fɛɛ akwɛ akɛ ayɛ he miishɛɛ lɛɛlɛŋ lo. Susumɔ gbɛ̀i ni nyiɛ sɛɛ nɛɛ ahe okwɛ:

◼ Shiɛlɔ lɛ kɛ woji tɛtrɛbii heei lɛ ekome tsu nii ni ekɛ shiatsɛ lɛ gba sane. Beni shiɛlɔ lɛ gbala jwɛŋmɔ kɛtee wolo tɛtrɛɛ lɛ mli sane oti pɔtɛɛ ko nɔ lɛ, shiatsɛ lɛ kɛɛ akɛ: “Eyɛ miishɛɛ waa.” Shiɛlɔ lɛ kɛɛ akɛ: “Masumɔ ni mashĩ wolo tɛtrɛɛ lɛ maha bo koni oná sane nɛɛ kɛ ekrokomɛi fɛɛ hu ni yɔɔ wolo tɛtrɛɛ lɛ mli lɛ kanemɔ he miishɛɛ.” Shiatsɛ lɛ bi akɛ: “Enyiɛ ahɔ̃ɔ lɛ?” Shiɛlɔ lɛ ha hetoo akɛ: “Kɛ obaakane lɛ, no lɛ awooo he nyɔmɔ. Obaanyɛ ona yɛ biɛ yɛ wolo tɛtrɛɛ nɛɛ mli baafa ni akɛ ekalamɔ lɛ saji ewo lɛ akɛ nɛkɛ wolo tɛtrɛɛ nɛɛ fata jeŋ muu fɛɛ Biblia mli tsɔsemɔ nitsumɔ lɛ he, ni ajɛɔ suɔmɔ mli ayeɔ too akɛfĩɔ sɛɛ. [Gbalamɔ jwɛŋmɔ kɛya sane ni aŋma yɛ Awake! lɛ baafa 4 lɛ loo fã ni yɔɔ shishigbɛ ninejurɔgbɛ lɛ yɛ Buu-Mɔɔ lɛ mli baafa 2 lɛ nɔ.] Yehowa Odasefoi aaashɛ mɛi akpekpei ekpaa ni ejɛ amɛsuɔmɔ mli amɛkɛ amɛbe kɛ amɛnibii eha koni akɛtsu nitsumɔ ni he hiaa nɛɛ yɛ shikpɔji ni fá fe ohai enyɔ nɔ lɛ ateŋ mɔ kome kɛkɛ ji mi. Kɛ oosumɔ ni oye too fioo ko kɛha nitsumɔ lɛ, oyɛ hegbɛ aahu akɛ ooofee nakai.” Shiatsɛ lɛ kɛ shika ye ebua ni shiɛlɔ lɛ kɛ shika lɛ wo wolo kotoku ni ehiɛɔ kɛha nakai yiŋtoo lɛ mli. Etsɔɔ bɔ ni ehiɛ esɔ shika ni akɛye abua lɛ, ni ekɛɛ ekɛ woji tɛtrɛbii krokomɛi ni baanyiɛ sɛɛ lɛ baaba.

◼ Yɛ shihilɛ kroko mli lɛ, shiɛlɔ lɛ shĩii wolo ko ejaakɛ eyɛ mli akɛ shiatsɛ lɛ miisumɔ ni ewie moŋ, shi ebɛ miishɛɛ diɛŋtsɛ yɛ Maŋtsɛyeli shɛɛ sane lɛ he.

◼ Yɛ shihilɛ ni ji etɛ lɛ mli lɛ, abaanyɛ ashĩ dɛhiɛmɔ wolo ko aha mɔ ko ni jie miishɛɛ diɛŋtsɛ kpo shi yɛ nakai beaŋ nɔŋŋ lɛ ebɛ dekã ni etamɔ nɔ ni ejeee nɔ ni sa yɛ nakai be lɛ nɔŋŋ mli akɛ aaatsɔɔ lɛ bɔ ni akɛ shika fĩɔ wɔ jeŋ muu fɛɛ nitsumɔ lɛ sɛɛ ahaa lɛ. Shiɛlɔ lɛ wo shi akɛ ebaaku esɛɛ eba be kroko ni hi. Kɛ eba ekoŋŋ lɛ, ebaabɔ mɔdɛŋ koni ele kɛji shiatsɛ lɛ yɛ wɔ nitsumɔ lɛ he miishɛɛ lɛɛlɛŋ lo, koni kɛ́ nakai ni lɛ, etsɔɔ bɔ ni wɔsɔɔmɔ nitsumɔ lɛ yɔɔ ha kɛ bɔ ni akɛ shika fĩɔ nitsumɔ lɛ sɛɛ ahaa. Kwɛmɔ koni oŋma miishɛɛ ni ajie atsɔɔ lɛ he nɔ ko fioo bɔni afee ni onyɛ ofee sɛɛsaramɔ.

¹⁰ Woji ajaa he gbɛjianɔtoo ni aha efee mlɛo lɛ yeɔ ebuaa mɔ fɛɛ mɔ koni ena akɛ akɛ wɔ Biblia mli tsɔsemɔ nitsumɔ lɛ yeee jara yɛ gbɛ ko gbɛ ko kwraa nɔ. Eyeɔ ebuaa wɔ hu koni wɔkɛ yiŋtoo ni wɔhiɛ yɛ Maŋtsɛyeli sanekpakpa lɛ shiɛmɔ kɛ Yesu Kristo kaselɔi afeemɔ mli lɛ aye klɛŋklɛŋ gbɛhe. Yɛ nɔ ni tamɔɔɔ gbɛjianɔtoi ni kɛ amɛhe woɔ “ejurɔfeemɔ he nibimɔ” mli kwraa lɛ, Yehowa Odasefoi yɛ he miishɛɛ akɛ amɛaakwɛ koni aha mɛi fɛɛ anine ashɛ woji anɔ ni abiii nyɔmɔwoo ko yɛ he. Abiii mɛi ni bɛ wɔ shɛɛ sane lɛ he miishɛɛ lɛɛlɛŋ lɛ kɔkɔɔkɔ akɛ amɛkɛ tooyeli aye abua jeŋ muu fɛɛ nitsumɔ lɛ. (Kwɛmɔ December 1, 1990 Buu-Mɔɔ [Vol. 111, No. 23GA] lɛ baafai 22 kɛ 23.) Akɛ tooyelii fɛɛ ni nine shɛɔ nɔ lɛ fĩɔ jeŋ muu fɛɛ Biblia mli tsɔsemɔ nitsumɔ nɛɛ sɛɛ, ejaakɛ nitsulɔi lɛ fɛɛ ji mɛi ni kɛ amɛhe eha ni ahaaa mɔ ko mɔ ko ni yɔɔ gbɛjianɔtoo lɛ mli lɛ nyɔŋgbele nyɔmɔwoo loo shika ko. Mɛi ni jieɔ miishɛɛ kpo yɛ wɔ nitsumɔ lɛ he ji mɛi pɛ ni wɔkɛ amɛ susuɔ sane ni tsɔɔ too ni ayeɔ koni akɛye abua jeŋ muu fɛɛ nitsumɔ lɛ he.

¹¹ Be mli ni wɔkɛ ekãa lɛɛɔ wɔ sɔɔmɔ nitsumɔ lɛ mli, ní wɔkɛ Asafo lɛ woji ni he yɔɔ sɛɛnamɔ lɛ tsuɔ nii yɛ nilee mli lɛ, Yehowa baaya nɔ eha nitsumɔ lɛ aya hiɛ. Mɛi ni yɔɔ hei srɔtoi fɛɛ ni hiɛ tsui kpakpa lɛ ahiɛ sɔɔ susumɔ ni jwɛŋmɔ yɔɔ mli ni wɔkɛhaa yɛ bɔ ni wɔsɔɔmɔ nitsumɔ lɛ yɔɔ ha lɛ he, ni amɛyɛ he miishɛɛ akɛ amɛaafĩ sɛɛ kɛtsɔ too ni amɛjɛɔ amɛsuɔmɔ mli amɛyeɔ lɛ nɔ.

[Akrabatsa ni yɔɔ baafa 4]

KAIMƆI

Shiɛlɔi:

◼ Nyɛjɛa anɔkwayeli mli nyɛkɛ tooyelii fɛɛ ni nine eshɛ nɔ yɛ shiɛmɔ nitsumɔ lɛ mli lɛ awoa adeka ni sa ni yɔɔ Maŋtsɛyeli Asa lɛ nɔ lɛ mli daa otsi.

◼ Nyɛnine ashɛa nyɛ woji tɛtrɛbii lɛ fɛɛ nɔ yɛ nyɛ asafo lɛ mli.

◼ Nyɛhaa mɛi fɛɛ ni shɛɔ woji tɛtrɛbii yɛ shiɛmɔ nitsumɔ lɛ mli ehee lɛ ashɛa nyɔji 6 kɛjea shishi dã.

◼ Nyɛkwɛa woji ni nyɛ diɛŋtsɛ nyɛyɔɔ lɛ anɔ jogbaŋŋ bɔni afee ni enɛɛmɛi akafite. Ákɛ nɔkwɛmɔ nɔ lɛ, ashĩɔ lala woji kɛ Bibliai babaoo yɛ Lost & Found Department (Nibii ni Elaaje ni Ana Ekoŋŋ Nitsumɔhe) lɛ yɛ kpee fɛɛ kpee shishi.

Asafoi:

◼ Ani nyɛyɛ wojiatoohe ni woji fɛɛ ni he hiaa yɔɔ mli daa yɛ Maŋtsɛyeli Asa lɛ nɔ bɔni afee ni shiɛlɔi fɛɛ anine ashɛ woji lɛ fɛɛ anɔ?

◼ Esa akɛ akã he ashɛ woji tɛtrɛbii ni ahaa efalɛ yaa hiɛ lɛ fiofio, ní atsɔɔ yibɔ pɔtɛɛ ni ataoɔ.

Onukpai/Asafoŋ sɔɔlɔi:

◼ Nyɛkwɛa koni akɛ nɔ ni akɛshɛɔ woji lɛ ayahaa woji anɔkwɛlɔ lɛ amrɔ nɔŋŋ yɛ nyɔŋ fɛɛ nyɔŋ nɔ.

◼ Esa akɛ woji anɔkwɛlɔ kɛ woloŋmalɔ lɛ akwɛ woji ashɛɛ fɛɛ ni baanyɛ atee sanebimɔ shi lɛ ni amɛma nɔ mi dani akɛ enɛɛmɛi aya nitsumɔhe nine lɛ.

◼ Esa akɛ akɛ woji ni atsɔɔ nɔ akɛ tooyelii bahaa lɛ amajea daa nyɔŋ nɔ—nyɛkatĩaa naa loo nyɛkafea nyɔji srɔtoi anɔ̃ lɛ fɛɛ ekome.