Sanebimɔ He

◼ Mɛni hewɔ esa akɛ wɔjɛ wɔsuɔmɔ mli wɔye too kɛha Asafo Maŋtsɛyeli Asa Tsumaa Shika lɛ?

Yɛ nɔyaa ni baa oyayaayai yɛ je lɛŋ fɛɛ lɛ hewɔ lɛ, daa afi lɛ, ayaa nɔ agbeleɔ nitsumɔ he niji lɛ amli ni amamɔɔ eheei hu afataa he. Kɛfata he lɛ, ayɛ Betel nitsulɔi fe 11,000 kɛ be-fɛɛ nitsulɔi krɛdɛɛ krokomɛi hu akpei abɔ ni esa akɛ aye abua amɛ.

Amrɔ nɛɛ, wɔyɛ asafoi 612 yɛ Ghana, ni amɛteŋ babaoo bɛ amɛ diɛŋtsɛ amɛ-Maŋtsɛyeli Asai. Beni asafoi lɛ ayifalɛ yaa hiɛ lɛ, nakai nɔŋŋ ehe hiaa ni wɔna Maŋtsɛyeli Asai pii hu. Amrɔ nɛɛ shika gbɛfaŋ naagba ni yɔɔ asafoi pii amli lɛ biɔ hiɛmiamɔ kɛ mɔdɛŋbɔɔ diɛŋtsɛ dani amɛaana shika kɛha Maŋtsɛyeli Asai amaamɔ. Yiŋtoo nɛɛ hewɔ ni Asafo lɛ je MAŊTSƐYELI ASA TSUMAA SHIKA he gbɛjianɔtoo lɛ shishi yɛ September 1988 mli lɛ. Kɛbashi amrɔ nɛɛ, tooyeli ni wɔnine eshɛ nɔ kɛha Shika nɛɛ baanyɛ amamɔ Maŋtsɛyeli Asai pɛmpɛbii etɛ. Eyɛ faŋŋ akɛ enɛ he miihia waa amrɔ nɛɛ, titri lɛ kɛji wɔsusu he akɛ yɛ hei komɛi lɛ, asafoi aaashɛ ejwɛ loo enumɔ po kpeɔ yɛ Maŋtsɛyeli Asa kome mli lɛ. Yɛ be mli ni Yehowa haa nitsumɔ lɛ yaa nɔ oyayaayai lɛ, ani wɔhiɛ sɔɔ gbɛfaŋnɔ ni wɔyɔɔ tsumɔ aŋkroaŋkro kɛ hegbɛ ni wɔna akɛ wɔfi teokrase nɔyaa lɛ sɛɛ kɛtsɔ wɔtooyeli nɔ lɛ?​—1 Tim. 6:​18, 19; Yes. 60:⁠22.

Obaanyɛ okɛ tooyeli ni ooojɛ osuɔmɔ mli okɛha lɛ amaje tɛɛ kɛbaha Asafo lɛ aloo obaanyɛ okɛtsɔ asafo ni okɛbɔɔ lɛ nɔ, yɛ bɔ ni onyɛmɔ ji kɛ bɔ ni otsui shweɔ akɛ oha lɛ naa. (2 Kor. 8:​10-15; 9:​6-14) Too ni wɔyeɔ lɛ hu naa gbɛfaŋnɔ yɛ Maŋtsɛyeli lɛ he nibii krokomɛi ni wɔtsuɔ he nii yɛ wɔ asafoi amli, yɛ wɔmaji amli, kɛ maji krokomɛi anɔ lɛ fɛɛ mli. Mɛi komɛi nyɛɔ amɛyeɔ too daa otsi, mɛi krokomɛi hu, daa nyɔŋ nɔ, loo nɔ. Bɔ fɛɛ bɔ ni oookpɛ oyiŋ akɛ obaafee lɛ, feemɔ, “ni ekajɛ ŋkɔmɔyeli aloo fimɔ mli; ejaakɛ tsuijurɔnaa halɔ Nyɔŋmɔ sumɔɔ.”​—2 Kor. 9:⁠7.