Sanebimɔ He

● Te wɔɔfee tɛŋŋ wɔye wɔbua ni ana asafoŋ sɔɔmɔ akɔntaabuu ni yeɔ emuu?

Ŋwanejee ko bɛ he akɛ kɛ wɔkane nɔyaa babaoo ni Yehowa haa ebaa yɛ jeŋ muu fɛɛ sɔɔmɔ nitsumɔ lɛ mli lɛ, ehaa wɔmli filiɔ wɔ yɛ wɔtsuii amli. (Okɛto Bɔfoi Lɛ Asaji 11:18 he.) Wɔ fɛɛ wɔnaa gbɛfaŋnɔ yɛ daa nyɔŋ nɔ akɔntaabuu lɛ ni wɔɔha efee nɔ ni ja lɛ mli.​—Kwɛmɔ Our Ministry wolo lɛ, baafa 102-104.

Akɛ shiɛlɔi lɛ, ehe miihia ni wɔto be kɛha shiɛmɔyaa daa otsi ni wɔkai ni wɔŋmala nɔ ni wɔtsu yɛ gbi lɛ mli wɔshwie shi be fɛɛ be. Kɛ nyɔŋ lɛ ba naagbee pɛ lɛ, esa akɛ wɔteŋ mɔ fɛɛ mɔ kɛ ekɔntaabuu lɛ aha kuu lɛ nɔkwɛlɔ lɛ aloo mɔ ni ahala lɛ ni ehe enɛɛmɛi lɛ. Kɛ oooto gbɛjianɔ ni ofa gbɛ dani nyɔŋ lɛ agbo lɛ, belɛ kwɛmɔ ni okɛ okɔntaabuu lɛ aha dani ofa gbɛ lɛ. Aawo wekuyitsei lɛ fɛɛ hewalɛ ni amɛkɛ amɛweku lɛ mlibii lɛ aya shiɛmɔ daa nyɔŋ nɔ ni amɛye amɛbua amɛ ni amɛbu akɔntaa amrɔ nɔŋŋ. Sɛɛnamɔ ni fata nɔ ni jɛɔ enɛ fɛɛ mli baa lɛ he ji akɛ no haa eleɔ mɔdɛŋ ni weku lɛ mlibii lɛ ateŋ mɔ fɛɛ mɔ bɔɔ yɛ sɔɔmɔ lɛ mli lɛ ni ekɛ yelikɛbuamɔ haa yɛ he ni ehe miihia yɛ lɛ.​—Efes. 5:​28; 6:4 okɛto 1 Timoteo 3:4 he.

Onukpai kɛ asafoŋ sɔɔlɔi fɛɛ yɛ gbɛfaŋnɔ ko ni he hiaa yɛ asafoŋ akɔntaabuu lɛ ni aaaha eye emuu lɛ mli. Kɛ kui anɔkwɛlɔi lɛ to gbɛjianɔ ni amɛkɛ kuu Iɛ mlibii lɛ ateŋ mɔ ko tee shiɛmɔ daa otsi, ni amɛgbala amɛjwɛŋmɔ kɛtee mɛi ni efɔɔɔ shiɛmɔyaa daa nyɔŋ nɔ lɛ anɔ lɛ, ewoɔ mɔ hewalɛ waa. Ehe baahia ni akɛ mɛi heei loo mɛi ni egbɔjɔ yɛ kuu lɛ mli Iɛ awo gbɛgbalɔi kɛ shiɛlɔi ni edara yɛ mumɔŋ lɛ adɛŋ koni amɛye amɛbua amɛ yɛ sɔɔmɔ lɛ mli kɛ amɛ daa nyɔŋ nɔ akɔntaabuu hu mli. Esa akɛ kuu lɛ nɔkwɛlɔ lɛ aha ehiɛ ahi gbɛjianɔtoo nɛɛ nɔ koni eya nɔ be fɛɛ be. (Lala 78:72) Wɔbaasumɔ jogbaŋŋ akɛ mɔ ni akɛ akɔntaabuu lɛ anaabuamɔ ewo edɛŋ lɛ kɛ hiɛdɔɔ aaatsu he nii, daa nyɔŋ nɔ. Mɛi komɛi kɛ akɔntaabuu ni amɛbua naa lɛ fɛɛ woɔ wolo kotoku mli, koni ekɛ fɛɛ aha woloŋmalɔ lɛ, ni wɔmiiwo enɛ feemɔ he hewalɛ.

Asafoŋ woloŋmalɔ lɛ baabu fɛɛ he akɔntaa ekɛmaje Asafo yitso lɛ yɛ nyɔŋ lɛ nɔ gbi ni ji ekpaa lɛ nɔ. Esa akɛ woloŋmalɔ lɛ akwɛ akɛ Congregation Report (S-1) ni eŋmala nɔ lɛ ja pɛpɛɛpɛ lo dani ekɛ ewaonaa gbɛi awo shishi ni ekɛmaje loo ebashi yɛ he ni eshiɔ yɛ lɛ. Onukpai akuu lɛ baanyɛ ahala onukpa kroko loo asafoŋ sɔɔlɔ ni he esa koni eye ebua lɛ yɛ akɔntaabuu lɛ naabuamɔ kɛ ehe nitsumɔ mli. Kɛ wɔteŋ mɔ fɛɛ mɔ fee egbɛfaŋnɔ koni wɔkɛna akɔntaabuu ni ja loo eyeɔ emuu daa nyɔŋ nɔ lɛ, wɔbaanyɛ wɔya nɔ ni wɔmli afili wɔ yɛ Teokrase lɛ nɔyaa lɛ he sanekpakpa lɛ mli, nɔ ko ni hi jogbaŋŋ lɛ he sanekpakpa lɛ.​—Yes. 52:⁠7.