Sanekpakpa Lɛ Kɛhamɔ Kɛ—Revelation Climax Wolo Lɛ
1 Korabii lɛ ŋma yɛ Yehowa he akɛ: “Nɛkɛ Nyɔŋmɔ nɛɛ ji wɔ-Nyɔŋmɔ kɛyaa naanɔ; lɛ nɔŋŋ eeetsɔɔ wɔ gbɛ kɛaatee naanɔ.” (Lala 48:15) Nɛkɛ hii anɔkwafoi nɛɛ kɛ amɛhiɛ fɔ Yehowa nɔ kwraa kɛmɔ shi, ni amɛha amɛshihilɛ fɛɛ kɛ Nyɔŋmɔ gbɛtsɔɔmɔ kpa gbee. Mɛɛ nɔkwɛmɔ nɔ fɛfɛo amɛfee amɛfɔ shi amɛha wɔ nɛkɛ! Mɛi ni Yehowa kudɔɔ amɛ ŋmɛnɛ lɛ naa hejɔɔmɔ kɛ niiashishinumɔ kpakpa mli ŋɔɔmɔ. (Yes. 58:11) Amɛtsiɔ amɛhe kɛjɛɔ nɔ ni baaba mɛi ni nyiɛɔ nibii agbɛjianɔtoo fɔŋ nɛɛ mli ‘gbɛtsɔɔlɔi shwilafoi,’ ni nyiɛɔ amɛsɛɛnyiɛlɔi lɛ ahiɛ kɛyaboteɔ awerɛho kɛ yiŋfutumɔ “bu” mli lɛ anɔ lɛ he.—Mat. 15:14.
2 Ŋwɛi gbɛtsɔɔmɔ he miihia waa ŋmɛnɛ yɛ be mli ni jeŋ ni ebɔle wɔhe nɛɛ tsɔɔ nɔ ni yiŋ efutu babaoo kɛ nɔ ni yɔɔ oshara babaoo hu lɛ. Mɛi babaoo ehao ni amɛmiitao hetooi ni haa mɔ tsui nyɔɔ emli. Belɛ kwɛ bɔ ni eja jogbaŋŋ akɛ wɔɔwo amɛ hewalɛ ni amɛkane Revelation Climax wolo lɛ! Nɛkɛ wolo nɛɛ kɛ ŋwɛi gbɛtsɔɔmɔ haa kɛtsɔɔ nibii ni baa ni hosoɔ je lɛ yɛ wɔgbii nɛɛ amli, yɛ Kpojiemɔ wolo lɛ mli gbalɛi lɛ ashishinumɔ naa lɛ mlitsɔɔmɔ nɔ. Saji ni tamɔ nɛkɛ lɛ haa mɔ he jɔɔ lɛ ni ekɛ gbɛtsɔɔmɔ ni hi jogbaŋŋ haa yɛ bɔ ni aaafee ni gbɔmɛi ni yɔɔ ŋmɛnɛ lɛ aaahi shi yɛ gbɛ ni saa Nyɔŋmɔ hiɛ nɔ lɛ he.
Revelation Climax Wolo Lɛ Kɛ Nitsumɔ
3 Nɔ kome ni sa kadimɔ waa yɛ Revelation Climax wolo lɛ he ji emli mfonirii, ni yeɔ ebuaa nitsɔɔmɔ waa lɛ. Okɛ nɛkɛ mfonirii nɛɛ atsu nii jogbaŋŋ kɛmɔ shi yɛ be mli ni okɛ wolo lɛ haa yɛ shiɛmɔ mli lɛ. Akɛ nɔkwɛmɔ nɔ lɛ, afee Maŋtsɛyeli jɔɔmɔi lɛ ahe mfoniri ni mli ka shi faŋŋ yɛ baafa 302. Enɛ ji nɔ ni awie he yɛ 2 Petro 3:13 kɛ Kpojiemɔ 21:4 lɛ, ni ji ŋmalɛi enyɔ ni wɔkɛtsuɔ nii yɛ wɔ Saneyitso Kɛha Sanegbaa lɛ mli lɛ he mfoniri ni atɛŋ.
4 Kɛ wɔna mɔ ko ni yɔɔ wiemɔ lɛ he miishɛɛ yɛ shia-kɛ-shia nitsumɔ lɛ mli lɛ, wɔbaanyɛ wɔgbala shiatsɛ lɛ jwɛŋmɔ kɛba Revelation Climax wolo lɛ kɛ bɔ ni egbalaa saji amli jogbaŋŋ lɛ nɔ. Yɛ sɛɛ mli lɛ, wɔbaanyɛ wɔkɛ wolo lɛ aya ni wɔkɛ lɛ agba emli saji sɔrɔtoi lɛ ahe sane, ekolɛ kɛtsɔ hiɛkpamɔ wiemɔ ni nyiɛ sɛɛ nɛɛ kɛ nitsumɔ nɔ: “Jeŋ yinɔsane miiya nɔ yɛ gbɛ ni yɔɔ miishɛɛ nɔ yɛ wɔgbii nɛɛ amli. Je lɛŋ hiɛnyiɛlɔi lɛ ekomɛi nuɔ he akɛ wɔmiihe wɔbote toiŋjɔlɛ yinɔ hee ko mli. Ani bo hu onuɔ he akɛ nakai eji? [Ŋmɛɛ shiatsɛ lɛ gbɛ ni eha hetoo.] Eyɛ mli akɛ etamɔ nɔ ni nɔyelii lɛ miibɔ mɔdɛŋ amɛmiina maŋkwramɔŋ naagbai lɛ ekomɛi anaa moŋ, shi kɛlɛ yɛ bei babaoo mli lɛ, bɔ ni gbɔmɛi kɛ amɛhe yeɔ haa kɛ bɔ ni awuiyeli yaa nɔ babaoo lɛ fiteɔ mɔdɛŋ ni adesai bɔɔ ni amɛkɛ toiŋjɔlɛ aba lɛ kwraa. Shi, Biblia lɛ maa shikpɔŋ hee nɔ shihilɛ ni baahi shi yɛ ŋwɛi nɔyeli shishi lɛ nɔ mi kɛhaa wɔ yɛ 2 Petro 3:13. [Kanemɔ ŋmalɛ lɛ ni ogbele wolo lɛ kɛya baafa 302.] Naa nɔ ni ŋmalɛ nɛɛ wieɔ he lɛ he mfoniri ni atɛŋ. Mɛni ji nɔ ni onaa he miishɛɛ waa yɛ mfoniri nɛɛ mli? [ Ŋmɛɛ lɛ gbɛ ni eha hetoo.] Biblia lɛ wieɔ shihilɛi ni baahi shikpɔŋ nɔ lɛ he, yɛ Kpojiemɔ 21:4 [kanemɔ ŋmalɛ lɛ kɛjɛ baafa 303, kuku 6]. Gbele tete po nyɛŋ afite toiŋjɔlɛ ni Nyɔŋmɔ baato ama shi lɛ.” Ekolɛ nyɛbaana hiɛkpamɔ wiemɔi sɔrɔtoi ni sa kɛha nyɛ shikpɔŋkuku lɛ yɛ Reasoning wolo lɛ baafai 9-15.
5 Eyɛ mli akɛ wɔmiisumɔ ni wɔma Maŋtsɛyeli jɔɔmɔi lɛ anɔ mi babaoo yɛ sanekpakpa lɛ kɛhamɔ mli moŋ, shi ehe miihia ni wɔye wɔbua mɛi ni yɔɔ wiemɔ lɛ he miishɛɛ lɛ ni amɛyoo bɔ ni shɛɛ sane ni Yesu Kristo jaje yɛ Kpojiemɔ wolo lɛ mli lɛ he hiaa waa ha lɛ hu. No hewɔ lɛ, wɔbaasumɔ ni wɔmu wɔsanegbaa lɛ naa kɛ wiemɔ ni kanyaa mɔ kɛ hegbɛ hu ni wɔkɛaaha mɛi ni yɔɔ tsui krɔŋŋ lɛ koni wɔkɛye wɔbua amɛ ni amɛyoo akɛ etsɛŋ ni abaatsu kojomɔ he nii yɛ nibii agbɛjianɔtoo nɛɛ kɛ mɛi ni fiɔ esɛɛ lɛ fɛɛ anɔ.
6 Gbalɛi ni yɔɔ Kpojiemɔ wolo lɛ mli lɛ ji hejɔɔmɔ kɛ miishɛɛ jɛɛhe kpele. Yehowa miifɔ mɛi fɛɛ ni yɔɔ tsui krɔŋŋ lɛ nine ni amɛbanyiɛ esɛɛ koni etsɔ sɛɛnamɔ kɛha amɛ. Nyɛhaa wɔkɛ Revelation Climax wolo lɛ ahaa kɛ ekaa koni Yehowa gbɛtsɔɔmɔ ni nilee yɔɔ mli lɛ atsɔɔ mɛi fɛɛ gbɛ.