Okɛ Wɔwoji Lɛ Atsu nii Jogbaŋŋ Kɛmɔ Shi
1 Yehowa gbɛjianɔtoo ni anaa lɛ eha wɔ woji sɔrɔtoi babaoo koni eye ebua wɔ yɛ wɔshiɛmɔ kɛ nitsɔɔmɔ nitsumɔ lɛ mli. (Mat. 28:19, 20) Esa akɛ hiɛsɔɔ ni wɔtsɔɔ yɛ Asafo lɛ woji ahe lɛ atsirɛ wɔ ni wɔkɛtsu nii jogbaŋŋ kɛmɔ shi yɛ wɔsɔɔmɔ nitsumɔ lɛ mli.
2 Wɔmiisumɔ ni wɔye wɔbua mɛi ni tamɔ gwantɛŋi lɛ yɛ be mli ni wɔtsuɔ wɔsɔɔmɔ nitsumɔ lɛ he nii lɛ ni amɛbanyiɛ wala gbɛ lɛ nɔ. Ni woji lɛ baanyɛ aye ebua wɔ ni wɔfee nakai. Kɛ wɔkɛ mɔ ko ni yɔɔ wiemɔ lɛ he miishɛɛ miigba Ŋmalɛ lɛ he sane lɛ, ekolɛ wɔbaana akɛ enaa sane pɔtɛɛ ko he miishɛɛ. Kɛji wɔle wɔwoji sɔrɔtoi lɛ amli saji ni he yɔɔ sɛɛnamɔ babaoo lɛ jogbaŋŋ lɛ, no lɛ wɔbaanyɛ wɔtsake wɔsanegbaa lɛ mli ni wɔkɛ wolo ni wieɔ nɔ ni mɔ ni wɔkɛgbaa sane lɛ nyaa he waa lɛ aha lɛ. Enɛ baabi ni wɔkɛ wolo ni sa lɛ aya sɛɛsaramɔ.
Okɛ Nɔ Ni He Hiaa Lɛ Aha
3 Kɛ wɔtsu wɔshikpɔŋkuku lɛ mli nii jogbaŋŋ kɛmɔ shi lɛ, wɔkɛ gbɔmɛi ni yɔɔ Biblia lɛ he miishɛɛ diɛŋtsɛ ni amɛbaasumɔ ni amɛkase ehe nibii babaoo lɛ baakpe. Wɔwoji lɛ ateŋ eko fɛɛ eko baanyɛ aye abua amɛ ni amɛna Biblia lɛ he shishinumɔ. Shi kɛ wɔkɛ mɔ ko ni heee Biblia lɛ eyeee ni ekɛɔ akɛ eteɔ shi ewoɔ ehe ni ekɛ jeŋ nilee kpaa gbee hu lɛ miiwie lɛ, no lɛ ebaahi jogbaŋŋ akɛ wɔkɛ Is the Bible Really the Word of God? wolo lɛ aaaha lɛ, kɛji nyɛyɛ eko yɛ nyɛ asafo lɛ woji ahɔɔmɔ he lɛ. Nakai wolo lɛ kuɔ bɔ ni mɛi wieɔ shiɔ Biblia lɛ naa kwraa ni ekɛ naatsɔɔmɔ ni mli ka shi faŋŋ haa yɛ nɔ hewɔ ni esa akɛ akpɛlɛ Biblia lɛ nɔ akɛ Nyɔŋmɔ Wiemɔ lɛ he. Aloo obaanyɛ okɛ Mankind’s Search for God wolo lɛ aha, ni okɛ yitsei 15 kɛ 16 atsu nii.
4 Mɛi babaoo kɛ naagbai kpeɔ yɛ amɛ diɛŋtsɛ amɛshia shihilɛ mli. Ekolɛ Biblia mli ŋaawoo aloo bɔ ni amɛaafee amɛkɛtsu nii lɛ he nilee fioo ko pɛ amɛyɔɔ. Bɔni afee ni wɔye wɔbua amɛ ni amɛnyɛ amɛkpee shihilɛ mli naagbai lɛ anaa ni amɛna tsabaa ni anyɛɔ atsuɔ he nii lɛ, ekolɛ wɔbaanyɛ wɔkɛ Family Life wolo lɛ aha amɛ aloo ekolɛ wɔbaanyɛ wɔgbala amɛjwɛŋmɔ kɛya yitso 5 kɛyashi 8 nɔ yɛ Happiness wolo lɛ mli. Ekolɛ tsakemɔi lɛ baŋ oyayaayai be fɛɛ be, shi wɔbaanyɛ wɔma nɔ mi akɛ Biblia mli ŋaawoo lɛ tsuɔ nii lɛlɛŋ.
5 Kɛ wɔkɛ mɛi ni yɔɔ bii miigba sane lɛ, esa akɛ wɔsusu bɔ ni wɔɔfee wɔkɛ woji ni afee yɛ obalaŋtai ahewɔ titri lɛ aha amɛ lɛ he. Ekolɛ obaanyɛ okɛ Young People Ask wolo lɛ atsu nii. Shiɛlɔi babaoo enyɛ amɛye amɛbua fɔlɔi kɛ gbekɛbii fɛɛ kɛtsɔ My Book of Bible Stories lɛ aloo Tsɔɔlɔ Kpele lɛ Toiboo woji lɛ ni amɛkɛha amɛ lɛ nɔ.
6 Dɛhiɛmɔ woji lɛ hu hiɛmɔ waa, ni wɔbaanyɛ wɔkɛtsu nii ni wɔkɛje sanegbaa shishi yɛ be mli ni wɔtsuɔ nii yɛ shia kɛ shia kɛ agbɛnɛ yɛ be mli ni wɔyeɔ odase trukaa lɛ. Mɛɛ Hiɛnɔkamɔ Yɔɔ Kɛha Suɔlɔi ni Amɛgboi? lɛ ji dɛhiɛmɔ wolo ko ni shɛjeɔ mɔ mii waa, ni emli sane lɛ he yɛ sɛɛnamɔ. Ani ohiɛɔ dɛhiɛmɔ woji sɔrɔtoi lɛ fɛɛ eko be fɛɛ be? Ani ósaa wiemɔi óto ni okɛaawie he otsɔɔ mɛi?
7 Wɔmiisumɔ ni wɔkɛ wɔ Biblia kasemɔ he woji sɔrɔtoi ni “tsulɔ anɔkwafo kɛ nilelɔ” lɛ kɛha wɔ lɛ atsu nii jogbaŋŋ kɛmɔ shi yɛ be mli ni wɔkɛ mɛi krokomɛi jaa sanekpakpa lɛ. (Mat. 24:45-47) Nɛkɛ mumɔŋ niyenii babaoo ni wɔyɔɔ nɛɛ jieɔ bɔ ni Yehowa haa wɔ nibii babaoo kɛ bɔ ni esusuɔ adesai fɛɛ ahe jogbaŋŋ lɛ kpo etsɔɔ.