Okɛ Biblia Lɛ Atsu Nii Yɛ Shiɛmɔ Mli
1 Biblia lɛ mli wiemɔi ni jɛ mumɔŋ lɛ baanyɛ ana hewalɛ kpakpa yɛ gbɔmɛi anɔ. Yɛ yiŋtoo nɛɛ hewɔ lɛ, klɛŋklɛŋ afii oha lɛ mli Kristofoi lɛ kɛ Ŋmalɛi lɛ tsu nii jogbaŋŋ beni amɛjajeɔ sanekpakpa lɛ. Paulo ‘susu saji ahe kɛjɛ Ŋmalɛi lɛ amli,’ ni etsɛ ŋmalɛi lɛ asɛɛ ni ekɛgbala ewiemɔ mli ni ekɛma nɔ mi hu. (Bɔfoi 17:2, 3) Beni Apolo yeɔ Yudafoi lɛ odase lɛ. “ekɛ ŋmalɛi lɛ tsɔɔ amɛ faŋŋ akɛ Yesu ji Kristo lɛ.”—Bɔfoi 18:24-28.
2 Yehowa Odasefoi nyiɛɔ nɔkwɛmɔ nɔ nɛɛ sɛɛ ŋmɛnɛ. Taakɛ ajaje yɛ March 1, 1986 Watchtower lɛ baafa 26 lɛ: “Kɛ amɛkɛ amɛhe miiwo maŋ shiɛmɔ nitsumɔ lɛ mli lɛ, amɛmiitao ni gbɔmɛi lɛ ayoo akɛ shɛɛ sane ni amɛjajeɔ lɛ jɛɛɛ amɛ diɛŋtsɛ amɛŋɔɔ shi moŋ ejɛ Nyɔŋmɔ Wiemɔ lɛ diɛŋtsɛ mli. No hewɔ lɛ amɛkɛ Biblia lɛ tsuɔ nii tɛɛ, ni amɛkaneɔ amɛhaa mɛi krokomɛi be fɛɛ be ni eeehi nakai feemɔ.” Akɛni naatsii lɛ he naagba lɛ eba shi kwraa hewɔ lɛ, shiɛlɔi pii hiɛɔ amɛ Bibliai lɛ kɛ amɛmiiya shiɛmɔ. Ani okɛ Biblia lɛ miitsu nii jogbaŋŋ kɛ nilee yɛ osɔɔmɔ nitsumɔ lɛ mli?
NƆ HEWƆ NI EKƐ NITSUMƆ MƆƆ SHI LƐ
3 Mɛni hewɔ Biblia lɛ kɛ nitsumɔ mɔɔ shi jogbaŋŋ nakai lɛ? Ejaakɛ eji Nyɔŋmɔ Wiemɔ ni “eji tsuiiaŋ susumɔi kɛ jwɛŋmɔi lɛ akojolɔ.” (Heb. 4:12) Kɛ mɔ lɛ tsuiŋ kanyamɔi diɛŋtsɛ lɛ ba Ŋmalɛ naa anɔkwalei lɛ ahiɛ lɛ, ehaa ejeɔ kpo faŋŋ ni anaa. Ni egbalaa gbɔmɛi ni yɔɔ tsui krɔŋŋ lɛ kɛbaa he. Akɛ nɔkwɛmɔ nɔ lɛ, abi gbalashihilɛ mli hefatalɔi komɛi ni tee amɛhiɛ oyayaayai yɛ Yehowa sɔɔmɔ mli lɛ nɔ hewɔ ni amɛkpɛlɛ sanekpakpa lɛ nɔ oya nakai lɛ. Mɛni hetoo amɛha? “Ejɛ Biblia lɛ.” Beni shiɛlɔi ni tee amɛŋɔɔ lɛ gbala amɛjwɛŋmɔ kɛtee Biblia lɛ nɔ lɛ, amɛyoo “tookwɛlɔ kpakpa” lɛ gbee.—Yoh. 10:14; wGA 12/78 bf. 9-10.
4 Ani bei komɛi lɛ onuɔ he akɛ onyɛɛɛ okɛ o-Biblia lɛ atsu nii jogbaŋŋ yɛ shiɛmɔ mli? Teemɔŋ nikasemɔ he gbɛjianɔtoo kpakpa, kɛ hesaamɔ kɛ asafoŋ kpeei fɛɛ ni oooya lɛ, baawaje bo kɛha nitsumɔ kpakpa fɛɛ nitsumɔ kpakpa ni eeeha ekaa ni oyɔɔ lɛ mli awa. (2 Tim. 3:16, 17) Mɛi ni fataa ohe yɛ sɔɔmɔ nitsumɔ lɛ mli kɛ oweku lɛ mlibii baanyɛ amɛkɛ bo ati Saneyitso Kɛha Sanegbaa lɛ mli. Agbɛnɛ hu, hiɛkpamɔ wiemɔi ni yɔɔ Reasoning wolo lɛ baafai 9-15 lɛ amli babaoo biɔ ŋmalɛ kanemɔ yɛ sanegbaa lɛ shishijee nɔŋŋ. Mɛni hewɔ okaaa enɛɛmɛi ekomɛi okwɛɛɛ? Okɛ nɔ ni anyɛɔ akɛtsuɔ nii ni egbalaa gbɔmɛi ni yɔɔ oshikpɔŋkuku lɛ mli lɛ ajwɛŋmɔ lɛ atsu nii.
OKƐ NIIAHESUSUMƆ JOGBAŊŊ ATSU NII
5 Eshɛɔ bei komɛi ni ekolɛ wɔbaasumɔ ni wɔha shiatsɛ lɛ akɔ lɛ diɛŋtsɛ e-Biblia koni enyɛ ekane ŋmalɛi lɛ kɛnyiɛ wɔsɛɛ. Esa akɛ wɔkɛ niiahesusumɔ jogbaŋŋ atsu nii yɛ shihilɛi ni tamɔ nɛkɛ mli. (Kwɛmɔ Reasoning wolo lɛ, baafa 67, kuku 3, kɛ baasa 279, kuku 2.) Kɛ ehe miihia ni wɔto wɔwiemɔ lɛ kuku lɛ, no lɛ wɔbaasumɔ ni wɔkane Saneyitso Kɛha Sanegbaa lɛ mli ŋmalɛi lɛ ekome pɛ. Kɛ wɔna faŋŋ akɛ shiatsɛ lɛ bɛ deka aloo wɔna akɛ ehiii akɛ wɔɔkane ŋmalɛ kɛjɛ Biblia lɛ mli yɛ shihilɛ lɛ hewɔ lɛ, no lɛ wɔbaanyɛ wɔwie ŋmalɛ lɛ mli wiemɔ ni sa lɛ he kuku, ni wɔha shiatsɛ lɛ ale akɛ ejɛ Biblia lɛ mli. Yesu kɛ ebɔfoi lɛ bɛ Hebri Ŋmalɛi lɛ eko ni ji amɛ diɛŋtsɛ amɛnɔ ni amɛaahiɛ beni amɛshiɛɔ lɛ. Shi kɛlɛ amɛtsɛ wiemɔi asɛɛ shii abɔ kɛjɛ mli. Esa akɛ wɔ hu wɔbɔ mɔdɛŋ ni wɔle ŋmalɛi lɛ yɛ wɔyitsoŋ koni wɔnyɛ wɔkai ni wɔkɛtsu nii yɛ wɔsɔɔmɔ nitsumɔ lɛ mli.
6 Paulo wo Timoteo ŋaa ni ‘enyɛ eja anɔkwale wiemɔ lɛ mli pɛpɛɛpɛ.’ (2 Tim. 2:15) Nakai ŋaawoo lɛ kɔɔ wɔ hu wɔhe ŋmɛnɛ. Wɔmiisumɔ ni wɔkase Yesu kɛ bɔfoi lɛ kɛtsɔ Biblia lɛ ni wɔkɛaatsu nii be fɛɛ be yɛ wɔ shiɛmɔ nitsumɔ lɛ mli lɛ nɔ. Kanemɔ kɛ ebaahi nakai feemɔ, shi kɛ ehe miihia hu lɛ, tsɛ emli wiemɔi asɛɛ kɛjɛ ojwɛŋmɔ mli. Kɛ wɔfee enɛ ni emɔ shi jogbaŋŋ lɛ, ebaafee lɛ faŋŋ akɛ wɔji Nyɔŋmɔ sɔɔlɔi, ni akɛ wɔ shɛɛ sane lɛ damɔ e-Wiemɔ lɛ nɔ shiŋŋ.