Wɔ Gbɛnaa Nii Akɛ Wɔfee Mɛi Krokomɛi Ejurɔ Lɛ He Nii Ni Wɔɔtsu
1 Bɔfo Paulo wo klɛŋklɛŋ afii oha lɛ mli Kristofoi lɛ ŋaa akɛ: “Ejurɔfeemɔ kɛ nikee lɛ, nyɛhiɛ akɛkpaa nɔ.” (Heb. 13:16) Amɛ mɔdɛŋbɔɔ koni amɛye amɛbua amɛnyɛmimɛi yɛ shihilɛi ni mli wawai ashishi po lɛ baawo suɔmɔ ni amɛyɔɔ kɛha Nyɔŋmɔ kɛ amɛhe Iɛ mli hewalɛ. (Yoh. 13:35) Awoɔ wɔ hewalɛ hu koni wɔfee ejurɔ ni wɔkɛ mɛi krokomɛi aja nii ni wɔyɔɔ.
2 Yɛ enɛ hewɔ lɛ, Yehowa eto gbɛjianɔ kɛha wɔ koni alɛ wɔ jogbaŋŋ yɛ mumɔŋ ni awula wɔ jogbaŋŋ hu. Mɛɛ saji kpakpa babaoo wɔyɔɔ yɛ Buu-Mɔɔ lɛ kɛ Awake! lɛ eko fɛɛ eko mli nɛkɛ! Mɛɛ miishɛɛ po wɔnaa yɛ eko fɛɛ eko ni baa ni wɔkaneɔ amrɔ nɔŋŋ ni wɔnine shɛɔ nɔ lɛ mli nɛkɛ! Kɛ wɔjwɛŋ emli saji ni damɔ Ŋmalɛi lɛ anɔ lɛ he lɛ, wɔbaanyɛ wɔkadi saji otii ni wɔbaanyɛ wɔkɛtsu nii yɛ sɔɔmɔ lɛ mli kɛ agbɛnɛ yɛ wɔkɛ mɛi krokomɛi asanegbaa mli. Nakai nɔŋŋ hu esa akɛ wɔhe beni wɔkɛsaa wɔhe kɛha kpee fɛɛ kpee, ni titri lɛ kɛha daa otsi Buu-Mɔɔ lɛ kasemɔ, Nyɔŋmɔ Wiemɔ lɛ ni wɔ diɛŋtsɛ wɔkaseɔ yɛ teemɔŋ lɛ yeɔ ebuaa wɔ ni wɔnaa “Kristo Jwɛŋmɔ” ni eyeɔ ebuaa wɔ ni wɔkɛ nɔ ni hi haa mɛi ni wɔkɛkpeɔ Iɛ.—1 Kor. 2:14-16; Lala 19:15.
3 Gbɛnaa Nii ni Esa Akɛ Wɔkpɛlɛ Nɔ: Mɛi fɛɛ ni basumɔɔ Yehowa lɛ jɔɔ amɛwala nɔ amɛhaa lɛ. Kɛ wɔkpɛlɛ gbɛnaa nii ni fataa henɔjɔɔmɔ he baa lɛ anɔ lɛ, wɔtsɔɔ akɛ wɔyɛ kɛha Yehowa ni wɔtsi wɔhe kɛjɛ Satan je lɛ kɛ egbɛ̀i gbohii lɛ ahe. Kɛ wɔnyiɛ okadi ni Kristo Yesu to fɔ shi kɛha wɔ lɛ sɛɛ lɛ, wɔfeɔ nɔkwɛmɔ nɔ kpakpa wɔhaa mɛi krokomɛi (1 Pet. 2:21) Kpokpaa nɔ kpeei ahe gbɛjianɔ ni ato aha 1992 sɔɔmɔ afi lɛ, ni eyitso ji “Wɔ Diɛŋtsɛ Wɔ Gbɛnaa Nii lɛ He Jatsu lɛ ni Wɔɔtere” lɛ woɔ wɔ hewalɛ ni wɔhi shi yɛ wɔ henɔjɔɔmɔ lɛ naa.
4 Asafoŋ kpeei ni wɔɔya daa lɛ haa wɔkɛ wɔhe gbaa susumɔi kpakpai ahe sane. Wɔ teemɔŋ nikasemɔ kɛ hesaamɔ kɛha kpeei lɛ haa wɔnaa saji babaoo ni wɔkɛ mɛi krokomɛi baagba he sane. Mɛi krokomɛi ahe miishɛɛ ni wɔɔna nɛkɛ lɛ haa miishɛɛ kɛ weku mumɔ ni naanyobɔɔ yɔɔ mli baa. Kɛ wɔkɛ wɔhe wo kpeei lɛ ashishi nifeemɔi amli lɛ, wɔtsɔɔ akɛ wɔkɛ Paulo wiemɔi ni yɔɔ Hebribii 10: 24, 25 lɛ kpaa gbee diɛŋtsɛ ni wɔkpɛlɛɔ wɔgbɛnaa nii akɛ wɔwo mɛi krokomɛi hewalɛ lɛ nɔ.
5 Taomɔ Gbɛnaa Nii Krokomɛi Ofata He: Ani wɔbaanyɛ wɔtao gbɛnaa nii krokomɛi wɔfata he yɛ 1992 sɔɔmɔ afi lɛ mli, tamɔ gbɛgbalɔi awamɔ loo daa gbɛgbamɔ sɔɔmɔ lɛ? Ni wɔɔma ŋmɛlɛtswaa taomɔ nii lɛ nɔ mi babaoo bɔ ni esaaa lɛ, mɛni hewɔ ogbalaaa ojwɛŋmɔ kɛyaaa hegbɛ babaoo ni ooona ni okɛ ohe awo naabuamɔ nitsumɔ lɛ mli lɛ nɔ? (Yoh. 4:35, 36) Ni wɔkɛ shiɛlɔi kɛ gbɛgbalɔi ni he esa aaatsu nii daa lɛ baaha wɔ hesaa yɛ sɔɔmɔ lɛ mli lɛ aya hiɛ. Gbɛgbalɔi awalɔi ayifalɛ hu haa asafo lɛ naa mumɔŋ hewalɛ. Kɛ aaahi lɛ, mɛni hewɔ obiii gbɛ akɛ daa gbɛgbalɔ aloo ni oooto gbɛjianɔ ni ofee gbɛgbalɔi awalɔ daa aloo shii abɔ ni ooonyɛ yɛ afi nɛɛ mli?
6 Akɛ gbɛnaanii woɔ hii ni yɔɔ asafo lɛ mli ni amɛjɔɔ amɛhe nɔ ni abaptisi amɛ ni sa lɛ adɛŋ oya.(1 Tim. 3:1-10,12,13) Mɔ fɛɛ mɔ baanyɛ ajie suɔmɔ ni eyɔɔ akɛ eesɔmɔ lɛ kpo kɛtsɔ hetooi ni asusuɔ he jogbaŋŋ dani ahaa yɛ kpeei ashishi, Teokrase sɔɔmɔ skul lɛ mli ni akɛ he woɔ, kɛ nɔkwɛmɔ nii ni akpɛlɛɔ efeemɔ loo Sɔɔmɔ kpee lɛ mli nibii krokomɛi ni aaakwɛ nɔ lɛ nɔ. Gbekɛbii po baanyɛ afee mɛi ni feɔ nɔkwɛmɔ nɔ kpakpa yɛ nɛkɛ gbɛi nɛɛ anɔ kɛ agbɛnɛ yɛ amɛjeŋba mli yɛ Maŋtsɛyeli Asa lɛ nɔ. Amɛbaanyɛ amɛye amɛbua yɛ amɛ nikasemɔ kuu lɛ ni amɛ kɛ amɛ aaatsu nii yɛ be mli ni amɛsaa Maŋtsɛyeli Asa lɛ nɔ loo amɛkwɛɔ hiamɔ nibii komɛi ni tamɔ nɛkɛ nɔ lɛ mli.—km 7/76 bf. 1, 3.
7 Yesu tsɔɔ bɔ ni esumɔɔ akɛ eeekpɛlɛ gbɛnaa nii akɛ efee mɛi krokomɛi ejurɔ lɛ nɔ kɛ wiemɔi ni ji: “Miisumɔ.” (Luka 5: 12, 13) Kɛ wɔnyiɛ enɔkwɛmɔ nɔ lɛ sɛɛ lɛ, wɔ hu wɔbaanyɛ wɔwo wɔnyɛmimɛi, mɛi ni yɔɔ wiemɔ lɛ he miishɛɛ, kɛ gbɔmɛi anɔkwafoi ni wɔkɛ amɛ kpeɔ yɛ shiɛmɔ mli lɛ hewalɛ ni wɔye wɔbua amɛ ni amɛkɛ Yehowa gbɛjianɔtoo lɛ abɔ daa. Wɔ gbɛnaa nii akɛ “wɔfea mɛi fɛɛ ejurɔ” lɛ ni wɔɔkpɛlɛ nɔ lɛ biɔ mɔdɛŋbɔɔ kɛ faishitswaa kɛ ekolɛ he-kɛ-afɔleshaa yɛ wɔgbɛfaŋ (Gal. 6:10) Shi kɛ wɔna ekpakpa ni atsu loo ejurɔ ni afee lɛ, wɔbaanyɛ wɔkɛ Paulo, ni kɛɛ: “Nakai afɔlei saa Nyɔŋmɔ hiɛ Jogbaŋŋ” lɛ akpa gbee.—Heb. 13:16.