Sanebimɔ He
◼ Te esa akɛ abu sɔɔmɔ ni asɔmɔɔ akɛ gbɛgbalɔi awalɔ lɛ aha tɛŋŋ?
Esa akɛ abu gbɛgbalɔi awalɔi asɔɔmɔ lɛ akɛ hegbɛ kɛ gbɛnaa nii ni hiɛdɔɔ yɔɔ he waa. Daa nyɔŋ nɔ lɛ, ahalaa shiɛlɔi akpei nyɔŋmai abɔ koni amɛsɔmɔ akɛ gbɛgbalɔi awalɔi, ni mɛi komɛi feɔ nakai kɛtsaraa nɔ be saŋŋ. Wɔmiijie nɛkɛ shiɛlɔi ni yɔɔ ekaa, ni amɛshihilɛ ŋmɛɔ amɛ gbɛ daa nyɔŋ ni amɛkɛ ŋmɛlɛtswai 60 ni ataoɔ lɛ tsuɔ nii yɛ sɔɔmɔ nitsumɔ lɛ mli daa nyɔŋ nɔ ni amɛsɔmɔɔ akɛ gbɛgbalɔi awalɔi lɛ ayi. Esa akɛ onukpai lɛ kɛ mɛi krokomɛi fɛɛ awo shiɛlɔi ni biɔ gbɛ kɛha gbɛgbalɔi awalɔi asɔɔmɔ lɛ mlibotemɔ lɛ hewalɛ ni amɛkɛ hiɛdɔɔ asusu halamɔ ni aaahala amɛ lɛ he ni amɛkabu lɛ akɛ nitsumɔ ko ni he ehiaaa.
Taakɛ eji yɛ daa gbɛgbalɔi agbɛfaŋ lɛ, mɛi ni kɛ amɛhe woɔ gbɛgbalɔi awalɔi asɔɔmɔ lɛ mli nyɔŋ kome loo nɔ ni fa fe nakai lɛ asusu he tsutsu da.(Luka 14:28) Nɔ ni fata enɛ he ji kɛji amɛbaanyɛ amɛkɛ be ni ataoɔ lɛ atsu nii yɛ shiɛmɔ nitsumɔ lɛ mli, ni nakai feemɔ haŋ amɛku amɛhiɛ amɛshwie Kristofoi agbɛnaa nii krokomɛi anɔ lɛ hesusumɔ ni amɛaatsɔ hiɛ amɛfee. Esa akɛ mɔ ni kpɛɔ eyiŋ akɛ ekɛ ehe baawo gbɛgbalɔi awalɔi asɔɔmɔ lɛ mli lɛ afee nakai yɛ be mli ni etsɔ sɔlemɔ nɔ esusu eshihilɛ he lɛ sɛɛ da. Esaaa akɛ henumɔi tsirɛɔ lɛ akɛni mɛi krokomɛi kɛ amɛhe miiwo mli lɛ hewɔ. Esa akɛ efee yiŋkpɛɛ ni asusu he jogbaŋŋ, kɛ gbɛjianɔtoo ni fata he ni aŋma afɔ shi kɛha taomɔ nii lɛ ahe shɛɛ. Ehe miihia ni akane gbɛbimɔ wolo lɛ Jogbaŋŋ ni mɔ lɛ diɛŋtsɛ akpɛ eyiŋ yɛ etsui mli akɛ ebaanyɛ ekɛ anɔkwayeli akɛɛ hɛɛ, yɛ nɔ ni ataoɔ lɛ gbɛfaŋ
Shi kɛlɛ, hiɛmiamɔ babaoo baa sane lɛ mli. Afi lɛ mli nyɔji komɛi yeɔ buaa jogbaŋŋ ni amɛhaa obafeɔ ‘mɔ ni kɛ edeka fɛɛ tsuɔ nii’ yɛ sanekpakpa lɛ shiɛmɔ mli. (Bɔf. 18:5) Nɛkɛ nyɔji nɛɛ ekomɛi ji Kaimɔ be ni ji March kɛ April mli, kɛ nyɔji hu ni kpokpaa nɔkwɛlɔ lɛ kɛbasaraa asafo lɛ. Shiɛlɔi pii jɛɔ miishɛɛ mli amɛtsɔseɔ amɛhe koni amɛnyiɛ be he gbɛjianɔtoo ni yɔɔ kpɛŋŋ sɛɛ bɔni afee ni amɛna gbɛfaŋnɔ babaoo kɛfata he yɛ shiɛmɔ nitsumɔ lɛ mli yɛ nɛkɛ bei kɛha nitsumɔ krɛdɛɛ nɛɛ amli, ni amɛnaa akɛ bei pii lɛ, jɔɔmɔi babaoo jɛɔ mli baa. (2 Kor. 9:6) Shiɛlɔi pii bɔɔ mɔdɛŋ waa akɛ amɛaafee gbɛgbalɔi yɛ gbɛhamɔ nyɔji kɛ afi lɛ mli nyɔji krokomɛi ni hiɛ otsii anaagbee enumɔ lɛ amli. Shi beni amɛŋmala gbɛbimɔ wolo lɛ, amɛnaa akɛ ehe miihia ni amɛkpɛtɛ shishitoo mla nɛɛ he waa, akɛ Ha o—Hɛɛ afee Hɛɛ.’ ni amɛbɔɔ mɔdɛŋ waa bɔ ni amɛaanyɛ koni amɛna ŋmɛlɛtswai 60 loo nɔ ni fa fe nakai yɛ nyɔŋ fɛɛ nyɔŋ ni amɛkɛsɔmɔɔ akɛ gbɛgbalɔi awalɔi lɛ mli.—Mat. 5:37.
Shiɛlɔi ni nyɛŋ amɛfee gbɛgbalɔi lɛ baanyɛ amɛkɛ amɛhe aha ni amɛkɛ gbɛgbalɔi awalɔi lɛ atsu nii ni amɛkɛye amɛbua amɛ, kɛtsɔ gbɛjianɔ krɛdɛɛ ni amɛkɛ amɛ aaato lɛ nɔ. Eyeɔ ebuaa waa akɛ okɛ gbɛgbalɔi lɛ aaatsɛ yɛ shiɛmɔ mli kɛji eeehi nakai feemɔ. Ekolɛ gbɛgbalɔi lɛ ahiɛ baasɔ waa akɛ amɛaana shiɛlɔi krokomɛi lɛ asɛɛfimɔ leebi maaŋkpa, aloo shwane, aloo gbɛkɛnaashi bei amli. Gbɛgbalɔi awalɔi lɛ naa miishɛɛ kɛji afɔ amɛ nine ni amɛkɛ mɛi krokomɛi atsu nii yɛ sɛɛsaramɔ feemɔ kɛ shia Biblia mli nikasemɔi amli. Ni eka shi faŋŋ akɛ mɛi ni baanyɛ amɛfi gbɛgbalɔi awalɔi lɛ asɛɛ nɛkɛ lɛ baana miishɛɛ babaoo ni jɛɔ nihamɔ mli baa lɛ eko.—Bɔf. 20:35.
Wɔhiɛ sɔɔ ekaa ni gbɛgbalɔi awalɔi pii kɛtsuɔ nii lɛ waa diɛŋtsɛ. Mɛi ni baanyɛ afata amɛhe lɛ baanyɛ akpa jɔɔmɔi babaoo gbɛ. (Abɛi 10:4) Mɛɛ be, kroko hu obaanyɛ ona miishɛɛ ni jɛɔ nitsumɔ babaoo mli baalɛ mli gbɛfaŋ nɔ ekoŋŋ akɛ gbɛgbalɔi awalɔ?