[PAGE 1]Okɛ Hesaa Atsu Anɔkwale Wiemɔ Lɛ He Nii
1 Hesaa ni wɔkɛtsuɔ Nyɔŋmɔ Wiemɔ lɛ he nii lɛ baanyɛ asa bɔ ni gbɔmɛi hereɔ sanekpakpa lɛ nɔ amɛhaa lɛ he. Enɛ hewɔ lɛ, Paulo wo hewalɛ ni aha he asa yɛ sɔɔmɔ nitsumɔ lɛ mli, akɛ: “Bɔɔ mɔdɛŋ ni okɛ ohe adamɔ Nyɔŋmɔ hiɛ akɛ mɔ ko ni sa, nitsulɔ ni hiɛ gbooo, ni jaa anɔkwale wiemɔ lɛ mli pɛpɛɛpɛ.”—2 Tim. 2:15.
2 Esa akɛ ana hesaa yɛ Biblia lɛ kɛ nitsumɔ mli. Beni aaato ama shia aha teemɔŋ nikasemɔ kɛ Kristofoi akpeeiyaa he miihia. Shi esa akɛ wɔkɛ nii ni wɔkaseɔ lɛ atsu nii kɛtsɔ Biblia lɛ ni wɔkɛaatsu nii be fɛɛ be yɛ sɔɔmɔ lɛ mli lɛ nɔ. Enɛ biɔ mɔdɛŋbɔɔ yɛ be fɛɛ mli yɛ be mli ni wɔtaoɔ Nyɔŋmɔ yelikɛbuamɔ kɛ gbɛtsɔɔmɔ lɛ.—1 Yoh. 3:22.
3 Gbalamɔ Jwɛŋmɔ Kɛya Nyɔŋmɔ Wiemɔ lɛ Nɔ: Ehe miihia ni gbɔmɛi ayɔse akɛ wɔ shɛɛ sane lɛ jeee wɔ diɛŋtsɛ wɔ nɔ, shi moŋ ejɛ Nyɔŋmɔ Wiemɔ ni aŋma lɛ mli. (Yoh. 7:18) Ni oootsɔɔ mɔ ko nɔ ni Nyɔŋmɔ kɛɔ yɛ sane ko he yɛ Biblia lɛ mli lɛ baanyɛ ana mɔ lɛ nɔ hewalɛ waa. Egbalaa gbɔmɛi ni hiɛ tsuijurɔ lɛ kɛbaa Biblia mli sane ni mli wa lɛ he.Yɛ be mli ni wɔkɛ Ŋmalɛi lɛ tsuɔ nii babaoo lɛ, wɔhe saa babaoo ni wɔbaanyɛ wɔha mɛi krokomɛi ale Nyɔŋmɔ wiemɔ lɛ babaoo, ni enɛ he baaba sɛɛnamɔ aha amɛ.
4 Mɛi pii leee Biblia lɛ. No hewɔ lɛ kɛ wɔkɛmiitsu nii lɛ, esa akɛ wɔfee babaoo fe ŋmalɛi akanemɔ kɛkɛ. Hesaamɔ ni asusu saji ahe jogbaŋŋ yɛ mli he miihia koni ale bɔ ni aaakpa ŋmalɛ ko hiɛ aha. Abaanyɛ akɛ sanebimɔi loo sane ko ni mli wa atsu nii ni akɛtee miishɛɛ shi. Agbɛnɛ esa akɛ wɔsusu nɔ ni wɔkɛɔ yɛ be mli ni wɔkane ŋmalɛ lɛ sɛɛ lɛ he. Ekolɛ gbɔmɔ lɛ nyɛŋ anu sane oti lɛ shishi yɛ ŋmalɛ kome pɛ kanemɔ sɛɛ. Wiemɔi loo saji otii anɔmimaa kɛ saji ahe ni akɛtoɔ baaha nɔ ni awieɔ he lɛ abote ejwɛŋmɔŋ.—Kwɛmɔ School Guidebook, nikasemɔi 24 kɛ 26.
5 Wolo ni Akɛtsuɔ Nii: Kɛ wɔkɛ gbɔmɛi ni yɔɔ miishɛɛ diɛŋtsɛ kpe yɛ December mli lɛ, wɔkɛ New World Translation of the Holy Scriptures lɛ kɛ Is the Bible Really the Word of God? lɛ baatsu nii. Te wɔɔfee tɛŋŋ wɔkɛ wolo ni tamɔ nɛkɛ aya gbɔmɛi lɛ aŋɔɔ? Yɛ be mli ni wɔjie wɔhe kpo lɛ, wɔbaanyɛ wɔkɛɛ akɛ: “Ŋmɛnɛ, gbɔmɛi pii taoɔ gbɛtsɔɔmɔ kɛjɛɔ gbɔmɛi aŋkroaŋkroi adɛŋ kɛ woji amli. Te nɔ ni osusuɔ akɛ no ji gbɛtsɔɔmɔ ni anyɛɔ atsuɔ he nii ni hi fe fɛɛ lɛ? [Ŋmɛɛ gbɛ ni eha hetoo.] Susumɔ nɔ ni Biblia lɛ kɛɔ yɛ anɔkwa nilee jɛɛhe lɛ he. [Kanemɔ Abɛi 2:6, 7.] Adesa nilee efee shwɛm, ni nɔ ni ekɛbaa ji osharai kɛ nijiaŋwujee. Shi Nyɔŋmɔ nilee efee nɔ ni anyɛɔ akɛ he fɔɔ nɔ be fɛɛ be ni sɛɛnamɔ hu yɔɔ he. [Kanemɔ Yesaia 48:17, 18.] No hewɔ lɛ esa akɛ wɔkɛ wɔhiɛ afɔ Nyɔŋmɔ ni kɛ gbɛtsɔɔmɔ ni he hiaa wɔ koni wɔdamɔ naagbai ni wɔkɛkpeɔ anaa lɛ nɔ.” Kɛkɛ lɛ wɔbaanyɛ wɔgbele Is The Bible Really The World of God? lɛ yitso 11, ni wɔgbala ejwɛŋmɔ kɛya baafa 136 kuku 1 nɔ.
6 Yɛ be mli ni okɛ Abɛi 2:6, 7 atsu nii okɛma bɔ ni Nyɔŋmɔ nilee nɔ kwɔ ha sɛɛ lɛ, okɛ New World Translation lɛ atsɔɔ lɛ ni otsɔɔ shiatsɛ lɛ nɔ hewɔ ni ohiɛ sɔɔ ni agbɛnɛ obuɔ Biblia lɛ akɛ jwetri ko lɛ mli. Ha ele akɛ emli tsɔɔmɔi lɛ ahe baabi sɛɛnamɔ aha lɛ ni ekɛ wɔsɛɛ be he hiɛnɔkamɔ ni ma shi shiŋŋ hu baaha lɛ. Sanegbaa ni tamɔ nɛkɛ baanyɛ agbele gbɛ ni otsɔɔ lɛ Biblia lɛ mli ŋaawoo ni nilee mli ni kɔɔ daa gbi shihilɛ mli naagbai ahe lɛ ekomɛi, ni ekolɛ nɔ ni baajɛ mli aba ji Biblia lɛ kasemɔ.
7 Yesu gbalaa jwɛŋmɔ kɛyaa Ŋmalɛi lɛ anɔ be fɛɛ be koni ekɛye ebua mɛi ni yɔɔ tsuijurɔ lɛ ni ekɛku mɛi ni teɔ shi woɔ lɛ lɛ anaa. Nɔ ni Paulo fɔɔ feemɔ ji ni ‘ekɛ mɛi ayiyii ni etsɔɔ mɛi nii’ ni kɔɔ nibii ni etsɔɔ amɛ lɛ he. (Bɔf. 17:2, 3) Hekɛnɔfɔɔ kɛ miishɛɛ ni wɔyɔɔ yɛ sɔɔmɔ lɛ mli lɛ baaya hiɛ yɛ be mli ni wɔkɛ hiɛdɔɔ bɔɔ mɔdɛŋ ni wɔha wɔhe asa babaoo yɛ anɔkwale wiemɔ lɛ kɛ nitsumɔ mli lɛ.