Sɛɛnamɔ Ni Yɔɔ Biblia Lɛ He Yɛ Ŋmɛnɛ Je Nɛɛ Mli
1 Mɛi pii buɔ Biblia lɛ ŋmɛnɛ akɛ ebe eho be ehe bɛ sɛɛnamɔ. Eyɛ mli akɛ no ji wolo ni aja fe fɛɛ, kɛ wolo ni atsɔɔ shishi fe fɛɛ yɛ yinɔsane fɛɛ mli moŋ, shi mɛi fioo pɛ kaneɔ, ni mɛi fioo nɔŋŋ hu pɛ nyiɛɔ egbɛtsɔɔmɔ sɛɛ.
2 Nɔ ni tamɔɔɔ nakai lɛ, wɔbuɔ Biblia lɛ akɛ Nyɔŋmɔ Wiemɔ. Anɔkwa saji lɛ tsɔɔ akɛ eji anɔkwale yɛ yinɔsane naa. Nɔ ni fe enɛ lɛ, bɔ ni ekɛ ehe kpaa gbee waa, egbalɛi, enilee, kɛ bɔ ni eji kanyamɔ nɔ ni naa hewalɛ kpakpa yɛ gbɔmɛi ashihilɛi amli lɛ fɛɛ feɔ lɛ faŋŋ akɛ Biblia lɛ jɛ “Nyɔŋmɔ mumɔ” mli. (2 Tim. 3:16) Esa akɛ wɔ diɛŋtsɛ wɔ niiashikpamɔ kɛ hiɛsɔɔ ni wɔyɔɔ kɛha nɛkɛ naakpɛɛ nikeenii nɛɛ akanya wɔ ni wɔwo mɛi krokomɛi hewalɛ ni amɛtao sɛɛnamɔ diɛŋtsɛ ni yɔɔ he lɛ mli amɛkwa
3 Gbɛ kome baanyɛ afee akɛ: “Yɛ naagbai ni mli wawai ni adesai kɛkpeɔ lɛ hewɔ lɛ, ewa kɛha mɛi pii akɛ amɛaahe Nyɔŋmɔ nɔ amɛye, aloo amɛjeɔ Nyɔŋmɔ nyɛmɔ ni ekɛaana naagbai ni wɔkɛkpeɔ lɛ anaa lɛ he ŋwane. Te onuɔ he ohaa tɛŋŋ? [Ŋmɛɛ gbɛ ni eha hetoo.] Kadimɔ nɛkɛ dɛhiɛmɔ wolo nɛɛ yitso lɛ, Nɔ Hewɔ ni Obaanyɛ Okɛ Ohe Afɔ Biblia lɛ Nɔ.” Gbalamɔ ejwɛŋmɔ kɛya mfoniri ni yɔɔ sɛɛ lɛ nɔ, no sɛɛ lɛ kanemɔ klɛŋklɛŋ kukuji enyɔ lɛ yɛ baafa 2. Kɛ shiatsɛ lɛ jie miishɛɛ kpo lɛ, nyɛbaanyɛ nyɛkane ŋmalɛi ni atsɛ yɛ kuku ni ji enyɔ lɛ mli lɛ ni nyɛsusu he. Too gbɛjianɔ kɛha sɛɛkuu koni nyɛsusu dɛhiɛmɔ wolo lɛ he lolo, ekolɛ kɛ emli yitsei bibii lɛ ekome kɛ nitsumɔ, yɛ sanebimɔ gbɛ nɔ, koni okɛtee emiishɛɛ shi.
4 Gbɛ kroko hu baanyɛ afee no ko tamɔ nɛkɛ: “Ani okɛ mi kpaaa gbee akɛ gbɛtsɔɔmɔ he miihia adesai kɛha shihilɛ mli naagbai ahe nitsumɔ? [Ŋmɛɛ gbɛ ni eha hetoo.] Tsutsu ko lɛ, gbɔmɛi kwɛɔ Biblia lɛ gbɛ waa kɛhaa gbɛtsɔɔmɔ, shi nibii etsake kwraa. Ani osusuɔ akɛ Biblia lɛ he yɛ sɛɛnamɔ diɛŋtsɛ ŋmɛnɛ? [Ŋmɛɛ gbɛ ni eha hetoo.] Kadimɔ nɔ ni ajaje yɛ 2 Timoteo 3:16 lɛ. [Kanemɔ.] Jeee akɛ Nyɔŋmɔ Wiemɔ ni aŋma lɛ yeɔ ebuaa wɔ ni wɔkpɛɔ wɔyiŋ yɛ nilee mli kɛkɛ, shi moŋ ehaa wɔ hiɛnɔkamɔ kpakpa hu kɛha wɔsɛɛ.” Kanemɔ Yohane 17:3. Kɛ shiatsɛ lɛ jie naa jogbaŋŋ lɛ, okɛ lɛ asusu oti kome loo otii enyɔ komɛi ni otsɔ hiɛ ohala momo kɛjɛ The Bible—God’s Word or Man’s? wolo lɛ mli lɛ he ni okɛfee bɔ ni Biblia lɛ he yɔɔ sɛɛnamɔ ha lɛ he mfoniri
5 Ekolɛ hiɛkpamɔ wiemɔi ni atsɔɔ yɛ Reasoning wolo lɛ baafa 10, yɛ yitso bibioo ni ji ‘Biblia/Nyɔŋmɔ’ shishi lɛ ekomɛi kɛ nitsumɔ baanyɛ aye abua bo. Akɛ saji krokomɛi hu eha yɛ baafai 58-68 ni baanyɛ aye abuɔ yɛ shiatsɛmɛi asanebimɔi ahetoohamɔ mli, aloo kɛha amɛshitee-kɛ-woo wiemɔi anɔyeli.
6 New World Translation Iɛ Kɛhamɔ: Na jwɛŋmɔ kpakpa yɛ New World Translation Biblia lɛ kɛhamɔ he. Obaanyɛ obi shiatsɛ lɛ kɛji eyɛ Biblia, kɛ agbɛnɛ kɛji ekanemɔ yɛ mlɛo kɛha lɛ. Daamɔ bɔ ni ebaaha hetoo lɛ nɔ ogbala ejwɛŋmɔ kɛba New World Translation lɛ mli nibii komɛi ni he yɔɔ sɛɛnamɔ lɛ anɔ. Obaanyɛ oma oti kome loo otii enyɔ komɛi anɔ mi kɛjɛ Reasoning wolo lɛ baafa 276-80.
7 Ohiɛ ahi ohe nɔ yɛ hegbɛi ni onaa ni okɛaawo mɛi ahewalɛ ni amɛkane Biblia lɛ ahe. Ye Obua mɛi ni yɔɔ he miishɛɛ lɛ ni amɛna bulɛ kɛ suɔmɔ amɛha Nyɔŋmɔ Wiemɔ ni aŋma lɛ. Kɛ amɛkɛ eshishitoo mlai lɛ tsu nii yɛ amɛ diɛŋtsɛ amɛshihilɛi amli ni amɛna anɔkwale lɛ he nilee lɛ, amɛbaana sɛɛ babaoo bianɛ kɛ agbɛnɛ yɛ wɔsɛɛ be mli hu.—Lala 119:105.