Kaimɔ ni Oku Osɛɛ Oya Jɛmɛ Ekoŋŋ

¹ “Mikane [Creation wolo lɛ]shii ejwɛ yɛ afii enyɔ ni eho lɛ mli, ni miyaa nɔ minaa nikasemɔ, woloŋlee, kɛ sane naatsɔɔmɔ ni akɛtsu wolo nɛɛ feemɔ he nii lɛ he miishɛɛ waa diɛŋtsɛ. Nyɛfainɛ nyɛyaa nɔ nyɛfea. Etsa akɛ mɔ fɛɛ mɔ ni yɔɔ je lɛŋ ana nɛkɛ wolo nɛɛ eko. Ni kɛji ebalɛ nakai lɛ, no lɛ wiemɔi ni awieɔ ashiɔ kɛ yiŋfutumɔi ni yɔɔ wɔ shishijee he, kɛ mɛi ni kɛɔ akɛ Nyɔŋmɔ bɛ lɛ ahemɔkɛyelii lɛ fɛɛ asɛɛ baafo amrɔ nɔŋŋ.” Nɛkɛ ji bɔ ni mlalelɔ ko ni eba hejɔɔmɔ fioo ko lɛ ŋma, taakɛ abɔ amaniɛ yɛ April 22, 1992 Awake! lɛ baafa 32 lɛ.

² Kɛji ajie wolo nɛɛ yi kɛ wiemɔi ni tamɔ nɛkɛ lɛ, ani esaaa akɛ wɔteŋ mɔ fɛɛ mɔ sumɔɔ akɛ wɔɔje wɔtsui fɛɛ mli wɔye wɔbua ni Creation wolo lɛ ayashɛ mɛi ni yɔɔ wiemɔ lɛ he miishɛɛ lɛ ateŋ mɛi babaoo adɛŋ bɔ ni wɔɔnyɛ? No lɛ esa akɛ wɔkai ni wɔya sɛɛsaramɔi, ni wɔkanya wolo ni ekaaa nɛɛ he miishɛɛ ni mɛi baana lɛ ni eya nɔ.

³ Jeee wɔteŋ mɛi babaoo enyɛ ekase wiemɔi babaoo ni sutsakemɔ tsɔɔlɔi kɛmamɔ shi lɛ ahe nii jogbaŋŋ. Shi kɛlɛ, no he ehiaaa dani wɔnyɛ wɔkɛ odaseyeli aha gbɔmɛi ni yɔɔ jalɛ tsuii lɛ, ni baanyɛ ana amɛnɔ hewalɛ akɛ sutsakemɔ tsɔɔmɔ lɛ ji gbe kroko hu ni Satan kɛtsuɔ nii ni ekɛgbeɔ adesai a-Bɔlɔ, Yehowa Nyɔŋmɔ he guɔ. Kaashashao shi akɛ oooku osɛɛ oya jɛmɛ ekoŋŋ, yɛ gbeyei ni osheɔ akɛ ekolɛ onyɛŋ oha saji ni mli wawai ni shiatsɛmɛi lɛ baabi bo lɛ ahetoo lɛ hewɔ. Wolo lɛ diɛŋtsɛ haa odaseyeli babaoo ni eŋmala yɛ nɔ fɛɛ nɔ ni ewieɔ lɛ he.

⁴ Kɛfata he lɛ, saji ni sɛɛnamɔ babaoo yɔɔ he jɛɔ shishi kɛjɛɔ yitso 16 lɛ nɔ kɛyaa ni etsaa nɔ aahu kɛyashiɔ yitso 20 ni wieɔ Ŋmalɛ mli tsɔɔmɔi ni yɔɔ shiŋŋ yɛ adesai ashishijee he. Nyɔŋmɔ yiŋtoo kɛha shikpɔŋ nɛɛ kɛ gbɔmɔ adesa kɛ nibii ni jwere adesai ahiɛ ŋmɛnɛ ni amɛbaahala emli nɔ ni amɛsumɔɔ lɛ. No hewɔ lɛ saji babaoo yɛ mli ni abaanyɛ akɛfee sɛɛsaramɔ

⁵ Kɛji oshashaoɔ shi fioo yɛ sɛɛsaramɔi ni oooye yɛ mɛi ni okɛ wolo eha amɛ lɛ he lɛ, no lɛ ekolɛ obaanyɛ oha asafo lɛ mli mɔ ko ni yɔɔ niiashikpamɔ babaoo aloo eyɔɔ sutsakemɔ tsɔɔmɔ lɛ he nilee babaoo bɔ ni sa lɛ afata ohe kɛya. Ebaanyɛ efee nyɛminuu loo nyɛmiyoo ko ni miiya skul, ni ekɛ be saŋŋ ekase nɛkɛ sane nɛɛ he nii babaoo beni eyaa skul lɛ, ni no hewɔ lɛ ele sutsakemɔ tsɔɔmɔ lɛ he wiemɔi heei ni akaa yiŋ awieɔ lɛ fɛɛ jogbaŋŋ Aloo yɛ gbɛ kroko nɔ lɛ,ekolɛ mɔ ko yɛ nyɛ asafo lɛ mli ni tsutsu ko lɛ eheɔ sutsakemɔ eyeɔ, shi agbɛnɛ ebakase Biblia mli anɔkwale lɛ, ni amrɔ nɛɛ ebaanyɛ eye ebua waa ni akɛku sutsakemɔ epasa tsɔɔmɔi lɛ anaa

⁶ Kaashashao shi akɛ ooogbala jwɛŋmɔ kɛya Creation wolo lɛ yitso 19 lɛ nɔ, ni okɛ Biblia mli hiɛnɔkamɔ kɛha wɔsɛɛ lɛ atsu nii akɛ nɔdaamɔ nɔ kɛha osɛɛsaramɔ lɛ. Otii babaoo yɛ nakai yitso lɛ mli ni abaanyɛ akɛtsu nii ni akɛwo mɔ hewalɛ ni eha ejwɛŋmɔ ahi shiwooi ni Biblia lɛ kɛhaa kɛha wɔsɛɛ lɛ nɔ. Ekolɛ obaanyɛ okɛ fa ni jeɔ shishi kɛjɛɔ baafa 236 kɛ yitso bibioo ni ji ‘Atsake Shikpɔŋ Lɛ,’ kɛ nɔ ni tsara nɔ ni ji ‘Ohia Naagbee,” kɛ ‘Hela Bɛ Dɔŋŋ, Gbele Bɛ Dɔŋŋ,’ ni yɔɔ baafai 238-9 lɛ atsu nii.

⁷ Nɛkɛ wolo fɛfɛo nɛɛ eye ebua mɛi babaoo ni amɛbana gbɛ ni yaa wala mli lɛ. Ni wɔbaanyɛ wɔye wɔbua mɛi krokomɛi hu lolo kɛtsɔ hewalɛ ni wɔɔwo amɛ koni amɛkane Creation wolo lɛ ni amɛsusu nɔ ni eyɔɔ kɛɛmɔ yɛ wala kɛ bɔ ni fee ni ebaje biɛ lɛ he lɛ nɔ.