Jiemɔ Adebɔɔ Nyɔŋmɔ Iɛ Yi
1 Shikpɔji ashikamɔ fɛfɛo, hulu shinyɔɔ, ŋulamii ni eje fɛfɛo yɛ gbɛkɛnaashi, loofɔji alala kɛ ŋɔɔmɔ-namɔ okɛ nɛkɛ nibii ni haa mɔ miishɛɛ nɛɛ he yijiemɔ haa? Hɛɛ, etsirɛɔ wɔ ni wɔjie adebɔɔ Nyɔŋmɔ lɛ yi. Wɔkɛ sane jajemɔ ni yɔɔ Kpojiemɔ 4:11 lɛ kpaa gbee kɛmɔɔ shi. Akɛni lɛ ebɔ nibii fɛɛ hewɔ lɛ, Yehowa Nyɔŋmɔ sa wɔ yijiemɔ.
2 Yɛ Nyɔŋmɔ adebɔɔ nitsumɔi lɛ ahe odaseyeli ni yɔɔ lɛ fɛɛ sɛɛ lɛ, gbɔmɛi ewo susumɔ ni akɛba akɛ wala ba kɛtsɔ oshara loo sutsakemɔ nɔ lɛ he hewalɛ. Nɛkɛ amale wulu agbo nɛɛ egbe gbɔmɛi ahe guɔ ni eha amɛnijiaŋ eje wui, ni eji musubɔɔ kɛ heguɔgbee hu ni akɛba wɔ Bɔlɔ Kpeteŋkpele lɛ nɔ.—Jaj. 12:1; Rom. 1:20, 25.
3 Akɛ Yehowa tsuji anɔkwafoi lɛ, wɔna hegbɛ yɛ October mli akɛ wɔkɛ anɔkwale ni kɔɔ wɔ-Bɔlɔ lɛ kɛ enaakpɛɛ nitsumɔi ahe lɛ aaaha mɛi krokomɛi. Wɔkɛ Life—How Did It Get Here? By Evolution or by Creation? wolo lɛ baaha mɛi fɛɛ ni jieɔ anɔkwa miishɛɛ kpo yɛ anɔkwalei ni kɔɔ wala shishijee he kɛ yiŋtoo ni yɔɔ sɛɛ lɛ he nikasemɔ mli lɛ. Nɛkɛ wolo nɛɛ wajeɔ wɔ koni wɔnyɛ wɔkɛ ekaa afa anɔkwale ni kɔɔ wala shishijee he lɛ he
4 Shikpɔŋkukuji Krɛdɛɛi: Kɛfata shia kɛ shia odaseyeli he lɛ, wɔbaanyɛ wɔbɔ mɔdɛŋ waa ni wɔkɛ gbɔmɛi ni yɔɔ miishɛɛ krɛdɛɛ yɛ sutsakemɔ loo adebɔɔ he sane lɛ he lɛ agba sane, ni wɔya amɛ ŋɔɔ yɛ amɛnitsumɔ hei aloo yɛ skul. Akɛ nɔkwɛmɔ nɔ lɛ, Odasefoi obalaŋtai eye omanye babaoo yɛ Creation wolo lɛ kɛhamɔ mli akɛni amɛkɛtsɔɔ amɛ skul tsɔɔlɔi lɛ hewɔ. Odasefonyo gbekɛyoo ko kɛ Creation wolo lɛ ekome ha askul tsɔɔlɔ, ni efee lɛ naakpɛɛ akɛ, jeee kasemɔ kɛkɛ tsɔɔlɔ lɛ je gbɛ ekase wolo lɛ jogbaŋŋ, shi moŋ ekɛbɔi nitsumɔ po akɛ enɔdaamɔ nɔ kɛha nitsɔɔmɔ yɛ klas. (w90 9/1 bf. 32; w86 10/1 bf. 32) Mɛni hewɔ okɛ wolo nɛɛ eyaaa otsɔɔlɔi kɛ oklasbii ni osusuɔ akɛ amɛbaana ekanemɔ he miishɛɛ lɛ ateŋ mɔ fɛɛ mɔ ŋɔɔ okwɛɛɛ.
5 Abaanyɛ akɛ mɔdɛŋbɔɔ krɛdɛɛ atsu nii kɛyashɛ nikasemɔ hei wuji amli nikaselɔi kɛ tsɔɔlɔi ni yɔɔ nyɛshikpɔŋkuku lɛ mli aloo amɛtsuɔ nii yɛ mli lɛ aŋɔɔ. Woloŋlelɔi tamɔ lɔyafoi kɛ datrɛfoi ahiɛ esɔ niiamlitaomɔ kɛ sane naatsɔɔmɔ ni yɔɔ Creation wolo lɛ mli lɛ waa diɛŋtsɛ. (yb87 bf . 54) Ekolɛ mɛi ni okɛ amɛ gbaa sane lɛ hu baasumɔ ni amɛna nɛkɛ wolo ni mfonirii fɛfɛji yɔɔ mli nɛɛ eko kɛha amɛ niiamlitaomɔ
6 Wɔbaajɛ nilee mli wɔkɛ Creation wolo lɛ aha mɔ fɛɛ mɔ ni wɔkɛkpeɔ ni jieɔ miishɛɛ kpo yɛ sane lɛ he lɛ. Be mli ni nyɛgbaa wolo lɛ mli oti kome loo otii saŋŋ ni anyɛɔ akaseɔ nii kɛjɛɔ mli, ni haa anaa hemɔkɛyeli hu yɛ Bɔlɔ lɛ mli lɛ ahe sane lɛ, no baaha ona gbɔmɛi ni yɔɔ he miishɛɛ lɛlɛŋ ni amɛmiisumɔ ni amɛkase nii babaoo hu lɛ. Wɔmiisumɔ ni wɔkɛ Creation wolo lɛ aha gbɔmɛi ni tamɔ nɛkɛ, ni kɛ ebaahi lɛ, wɔkɛ amɛ ato nikasemɔ he gbɛjianɔ yɛ mli.
7 Eba akɛ jeee akɛ nɛkɛ dɛŋdade kpakpa nɛɛ baaye abua mɛi babaoo ni amɛna bɔ ni nilee bɛ sutsakemɔ tsɔɔmɔ lɛ mli lɛ kɛkɛ, shi moŋ ni eye ebua amɛ hu ni amɛna hiɛsɔɔ amɛha nikeenii ni ji wala lɛ. Nɛkɛ wolo nɛɛ baakanya miishɛɛ yɛ amɛmli akɛ amɛaahi shi kɛya naanɔ kɛwo wala Halɔ kɛ ‘ŋwɛi kɛ shikpɔŋ Feelɔ’ lɛ hiɛ nyam.—Lala 146:6.