Ha Mɛi Krokomɛi Hu Ana Yesu Kristo He Anɔkwa Nilee
1 Wolo ni wɔkɛbaatsu nii yɛ wɔ shiɛmɔ nitsumɔ lɛ mli, yɛ January mli ji Gbɔmɔ ni Fe Mɔ Fɛɛ Mɔ ni Ehi Shi Pɛŋ wolo lɛ. Mɛni obaakɛɛ ni okɛje Biblia mli sanegbaa shishi yɛ be ni sa mli, ni te obaafee tɛŋŋ okɛ nɛkɛ wolo fɛfɛo nɛɛ aha hu?
2 Wɔ Dɛhiɛmɔ Woji Hee Lɛ Kɛ Nitsumɔ: Shiɛlɔi komɛi eye omanye yɛ dɛhiɛmɔ woji lɛ kɛ nitsumɔ mli ni amɛkɛtee miishɛɛ shi yɛ Maŋtsɛyeli sane lɛ he ni amɛtsa nɔ amɛkɛ wolo kroko eha. Mɛɛ gbɛ nɔ aaatsɔ aye abua wɔ ni wɔfee enɛ? Kɛtsɔ wɔ dɛhiɛmɔ wolo hee, Ani Je Nɛɛ Baaya nɔ Ahi Shi? lɛ kɛ nitsumɔ nɔ.
Beni oŋa lɛ jogbaŋŋ sɛɛ lɛ, obaanyɛ okɛɛ akɛ:
◼ “Wɔmiibi mɛi kɛji amɛbaakpɛlɛ nɔ akɛ Yesu Kristo ji gbɔmɔ ni fe mɔ fɛɛ mɔ ni ehi pɛŋ. [Ŋmɛɛ gbɛ ni eha hetoo.] Lɛlɛŋ, gbɔmɛi babaoo ena adesai ashihilɛ mli saji anɔ hewalɛ, ni amɛteŋ mɛi komɛi eye ebua adesai aweku lɛ hiɛyaa, shi kadimɔ nɔ ni haa esoroɔ Yesu Kristo kwraa yɛ mɛi krokomɛi lɛ fɛɛ he lɛ. [Kanemɔ Yohane 17:3.] Mɔ kroko ko bɛ ni yɔɔ hewalɛ ni ekɛaaha adesai naanɔ wala. [Gbelemɔ dɛhiɛmɔ wolo lɛ baafa 3.] Beni Yesu yɔɔ shikpɔŋ nɛɛ nɔ lɛ, etsɔɔ nibii ni baatsɔ hiɛ aba dani je lɛ hiɛkpatamɔ aba lɛ mli. Shi ewo ekaselɔi lɛ hewalɛ hu ni amɛmii ashɛ amɛhe, ejaakɛ nɛkɛ nibii ni baaba nɛɛ baatsɔɔ akɛ amɛkpɔmɔ miibɛŋkɛ.” Kɛji nyɛsusu ba ni Kristo eba lɛ he okadi lɛ mli otii komɛi ahe kuku sɛɛ lɛ, gbalamɔ ejwɛŋmɔ kɛya wolo lɛ sɛɛ, he ni tsɔɔ jɔɔmɔi ni baajɛ e-Maŋtsɛyeli nɔyeli lɛ mli aba lɛ ekomɛi lɛ.
3 Shiɛlɔ ni ji gbekɛ loo mɔ hee loo mɔ ni bɛ niiashikpamɔ lɛ baanyɛ ekɛ mfonirii ni yɔɔ dɛhiɛmɔ wolo lɛ mli lɛ atsu nii kɛkpa esane lɛ hiɛ.
Kɛ akɛ dɛhiɛmɔ wolo “Ani Je Nɛɛ Baaya nɔ Ahi Shi?” lɛ miitsu nii lɛ, shiɛlɔ lɛ baanyɛ agbele baafai 3 kɛ 4 ni ekɛɛ akɛ:
◼ “Kwɛmɔ nɛkɛ mfonirii enyɔ nɛɛ, ekome lɛ, kɔɔyɔŋ lɛlɛ ni miiŋmɛɛ okpɛlɛmii ahe yɛ tawuu be mli, kɛ ekroko lɛ, gbekɛ ko ni hɔmɔ eye lɛ aahu.[Gbelemɔ baafa 5.] Kwɛmɔ mfonirii nɛɛ hu ni miitsɔɔ shikpɔŋhosomɔ, kɛ nuu ko ni he miiye ni eka helatsamɔ he lɛ. [Mɛɛ fioo.] Biblia lɛ tsɔɔ akɛ etsɛŋ ni nɛkɛ jaramɔ shihilɛi nɛɛ fɛɛ sɛɛ baafo.”
4 Kɛ etamɔ nɔ ni mɔ lɛ yɛ wiemɔ lɛ he miishɛɛ lɛ, kanemɔ Kpojiemɔ 21:3, 4 kɛjɛ Biblia lɛ mli tɛɛ aloo taakɛ atsɛ yisɛɛ yɛ dɛhiɛmɔ wolo lɛ baafa 6 lɛ. Obaanyɛ odamɔ bɔ ni emiishɛɛ lɛ fa ha lɛ nɔ omamɔ saji krokomɛi anɔ mi ofata he. Kɛ ejie miishɛɛ kpo lɛ, obaanyɛ okɛ Gbɔmɔ ni Fe Fɛɛ wolo lɛ aha shiatsɛ lɛ, ni oto gbɛjianɔ kɛha sɛɛsaramɔ.
5 Too Gbɛjianɔ Kɛha Wɔsɛɛ Be Saramɔ: Shi kɛlɛ, kɛ dɛhiɛmɔ wolo wɔshi jio, Gbɔmɔ ni Fe Fɛɛ wolo lɛ, aloo wolo kroko wɔkɛha aloo sane kɛkɛ wɔkɛ lɛ gba kɛ miishɛɛ jio, wɔbaanyɛ wɔkɛɛ akɛ: “Be kroko kɛ miba lɛ, masumɔ ni mikɛ bo asusu anɔkwa sane ko he, nɔ ni kɔɔ maŋtiase mli ni afɔ Yesu yɛ lɛ he.” Kaimɔ ni okadi sɛɛsaramɔ lɛ jogbaŋŋ kɛ sane ni ena he miishɛɛ lɛ, ni okase wolo lɛ yitso 5 lɛ kɛsaa ohe jogbaŋŋ dani oya sɛɛsaramɔ lɛ feemɔ.
6 Maŋtsɛyeli lɛ pɛ kɛ hiɛnɔkamɔ kpakpa haa adesai. Nyɛhaa wɔjiea suɔmɔ ni mli wa ni wɔyɔɔ lɛ kpo akɛ wɔɔha mɛi fɛɛ ni wɔkɛkpeɔ lɛ ana “Nyɔŋmɔ teemɔŋ sane krɔŋkrɔŋ lɛ, ni ji Kristo he anɔkwa nilee.”—Kol. 2:2, NW.