Mɛi Krokomɛi ni Wɔɔye Wɔbua Amɛ ni Amɛyoo Ojarawatɛi Kpakpai
1 Kɛ wɔshiɛ Maŋtsɛyeli lɛ he sanekpakpa lɛ wɔtsɔɔ mɛi krokomɛi lɛ, esa akɛ wɔyiŋtoi ni wɔhiɛ lɛ ateŋ ekome afee akɛ ni wɔye wɔbua mɛi fɛɛ ni hiɛ tsui kpakpa lɛ ni amɛle bɔ ni Nyɔŋmɔ Wiemɔ lɛ jara wa ha. (Fil. 3:8) Wɔ-Biblia Kasemɔ he woji lɛ tsuɔ fa ko ni he hiaa waa yɛ Maŋtsɛyeli lɛ he sane lɛ gbɛɛ-kɛ-shwamɔ mli. Wɔkɛ True Peace and Security-How to Find It kɛ “Let Your Kingdom Come” woji enyɔ nɛɛ baaha yɛ September nyɔŋ lɛ mli. True Peace kɛ “Kingdom Come” woji lɛ eha mɛi akpei ohai abɔ anilee efa babaoo, ni ewo amɛ hewalɛ ni amɛkɛ anɔkwayeli asɔmɔ Yehowa.
2 Babaoo yɛ ni wɔbaatsu yɛ wɔsɔɔmɔ lɛ mli, fe ni wɔɔshi wolo wɔha mɔ fɛɛ mɔ ni sumɔɔ lɛ kɛkɛ. Esa akɛ wɔkɛ shɛɛsane lɛ aha kɛ miishɛɛ, ni wɔkɛ sanesɛɛkɔmɔ abo nɔ ni shiatsɛ lɛ kɛɔ lɛ toi, ni wɔfee klalo akɛ wɔkɛ lɛ ‘aaayiyii yɛ ŋmalɛi lɛ amli’ titri lɛ, yɛ be ni akɛ woji enyɔ haa nɛɛ mli.—Bɔf. 17:2.
3 Mɛɛ Gbɛ nɔ Abaatsɔ Afee Enɛ Yɛ?
Wɔhiɛkpamɔ wiemɔi lɛ baanyɛ awo shiatsɛmɛi lɛ hewalɛ ni amɛhe woji enyɔ ni wɔkɛhaa lɛ.
Akɛ nɔkwɛmɔ nɔ lɛ, kɛ okɛ woji enyɔ lɛ miiha, ni ooma “Kingdom Come” wolo lɛ nɔ mi lɛ, obaanyɛ okɛɛ akɛ:
“Wɔmiisara mɛi koni wɔkɛ amɛ agba nɔ ni nibii ni yaa nɔ yɛ je lɛŋ ŋmɛnɛ lɛ tsɔɔ lɛ he sane. Mɛi babaoo bɛ Nyɔŋmɔ jalɛ tɛi ni efolɔ eshwie shi kɛha shihilɛ ni atsɔɔ yɛ Biblia lɛ mli lɛ he miishɛɛ dɔŋŋ. Enɛ ena bɔ ni amɛkɛ mɛi krokomɛi yeɔ haa lɛ nɔ hewalɛ waa. Ani okadi nɔ ko ni tamɔ nɛkɛ? [Ŋmɛɛ lɛ gbɛ ni ewie. Obaanyɛ oha lɛ nɔkwɛmɔ nii pɔtɛɛ komɛi.] Ofainɛ kadimɔ mɛi ni atsi amɛ ta yɛ 2 Timoteo 3:1-5 lɛ ajeŋba, ni okɛɛ mi kɛji anaa enɛ yɛ je lɛ mli ŋmɛnɛ?” [Kanemɔ; ŋmɛɛ lɛ gbɛ ni ewie.] Ani odaseyeli kpakpa ko yɛ ni tsɔɔ akɛ shihilɛ lɛ baahi wɔsɛɛ ko?” Agbɛnɛ lɛ tsɔɔmɔ lɛ saji otii ni sa ni yɔɔ “Kingdom Come” wolo lɛ yitso 12 lɛ mli lɛ eko, ni ogbala jwɛŋmɔ kɛya akrabatsa ni yɔɔ baafa 115 lɛ ni tsɔɔ bɔ ni awie afi 1914 he lɛ nɔ, ni okɛ woji enyɔ lɛ aha. Kɛ aheee woji lɛ eko lɛ, no lɛ abaanyɛ akɛ Toiŋjɔlɛ Jeŋ Hee dɛhiɛmɔ wolo lɛ aha.
4 Kɛ fɔlɔ ko baje shinaa lɛ naa yɛ be mli ni wɔkɛ “True Peace” wolo Iɛ haa lɛ, wɔbaanyɛ wɔje wɔsanegbaa lɛ shishi akɛ: “Wɔkɛ mɛi fɛɛ ni yɔɔ miishɛɛ yɛ bɔ ni wɔɔnyɛ wɔtsu weku shihilɛ mli naagbai ahe nii wɔha yɛ gbɛ ni hi nɔ lɛ miiwie. Wɔfɛɛ wɔmiibɔ mɔdɛŋ wɔtsu bɔ ni wɔɔnyɛ moŋ, shi kɛ nɔ ko yɛ ni baanyɛ aye abua wɔ ni wɔye omanye babaoo lɛ, wɔyɛ he miishɛɛ, aloo jeee nakai? [Ŋmɛɛ lɛ gbɛ ni ewie.] Biblia lɛ kɛ gbɛtsɔɔmɔ haa yɛ sane nɛɛ mli tamɔ bɔ ni eyɔɔ Kolosebii 3:12-14 lɛ. [Kanemɔ.] Nɔ hewɔ lɛ, mɛni he hiaa koni wɔna weku shihilɛ ni yeɔ omanye mli ŋɔɔmɔ? Kadimɔ nɔ ni akɛɛ yɛ wolo nɛɛ mli sane yitso ni ji ‘Respect for Authority Essential for Peaceful Living’ yɛ yitso fioo ni ji ‘Authority Within the Home’ shishi lɛ.” Obaanyɛ okane kukuji 16 kɛ 17 lɛ, aloo ni okane otii komɛi kɛjɛ yitso 13 ni yɔɔ True Peace wolo lɛ mli ni baaha shiatsɛ lɛ anya he lɛ, koni no sɛɛ lɛ, okɛ woji enyɔ lɛ aha. Kɛ shiatsɛ lɛ bɛ deka loo etsuuu he nɔ ko amrɔ nɔŋŋ lɛ, bɔɔ mɔdɛŋ ni okɛ wolo tɛtrɛɛ hee ko ni wieɔ weku saji ahe loo Na Weku Shihilɛ Mli Ŋɔɔmɔ dɛhiɛmɔ wolo lɛ eko aha.
5 Wɔsumɔɔɔ ni wɔkuɔ wɔhiɛ wɔshwieɔ yiŋtoo ni wɔhiɛ akɛ wɔɔye Maŋtsɛyeli lɛ he odase kɛmɔ shi lɛ nɔ. (Mat. 24:14) Enɛ feemɔ tsɔɔ akɛ wɔmiisumɔ ni wɔna woji lɛ fɛɛ he sɛɛ, ni ememeji lɛ fata he, yɛ shɛɛsane ni jara wa waa ni yɔɔ mli lɛ hewɔ. Be mli ni wɔkɛ Biblia lɛ kɛ teokrase woji ni akɛha wɔ yɛ naakpɛɛ gbɛ nɔ lɛ tsuɔ nii ni sɛɛnamɔ aba he lɛ, wɔbaanyɛ wɔkɛ wɔhe afɔ Yehowa nɔ ni ejɔɔ wɔ ni wɔtsu esuɔmɔnaa nii ahe nii yɛ bei ni he hiaa nɛɛ amli.—Gal. 6:9.