Nya Yehowa Kromɔ Bi lɛ He!
1 Yɛ Hɔgbaa, Nisan 9, afi 33 Ŋ.B. lɛ, asafo babaoo ko ni hiɛ blɛoi yɛ amɛdɛŋ nya Yehowa kromɔ Bi, Nuŋtsɔ Yesu Kristo he akɛ “Maŋtsɛ ni baa yɛ Nuŋtsɔ [Yehowa] gbɛi anɔ lɛ!” (Luka 19:38; Heb. 1:6) Ju kɛ Jufɔ, ni ji Nisan 10 kɛ 11 lɛ, Yesu kɛ ehe wo emaŋ sɔɔmɔ nitsumɔ lɛ mli waa, ni ekɛha nakai enaagbee gbii lɛ fee nɔ ni ekɛtsu nii waa yɛ eshikpɔŋ nɔ shihilɛ mli lɛ ekomɛi.
2 Ŋmɛnɛ, asafo babaoo ni fe nakai, ni amɛhiɛ mfonirifeemɔŋ blɛoi yɛ amɛdɛŋ kɛ gbee ni wa bolɔɔ akɛ: “Yiwalaheremɔ lɛ ji wɔ-Nyɔŋmɔ ni ta maŋtsɛsɛi lɛ nɔ lɛ, kɛ Toobi lɛ nɔ.” (Kpoj. 7:9, 10) Yɛ March 26 lɛ, wɔbaakpe ni wɔye Kristo gbele Kaimɔ lɛ he gbijurɔ. Beni nakai gbi lɛ bɛŋkɛɔ lɛ, ani wɔbaanyɛ wɔwo wɔmɔdɛŋbɔɔ lɛ mli hewalɛ yɛ sɔɔmɔ nitsumɔ lɛ mli ni wɔkɛha nɛkɛ jeŋ muu fɛɛ yijiemɔ bolɔmɔ nɛɛ ajije waa?
3 a Shiɛmɔ Nitsumɔ lɛ Aya Hiɛ: Shiɛlɔi pii eŋmala gbɛbimɔ woji momo akɛ gbɛgbalɔi awalɔi kɛha March. Ani obaasumɔ ni ofata amɛhe? Kɛ nakai lɛ, no lɛ okɛ ogbɛbimɔ wolo lɛ aha oya. Onukpai lɛ ateŋ mɔ ko baana he miishɛɛ akɛ eeeha saji ni ekolɛ obaasumɔ ni obi yɛ nitsumɔ lɛ he lɛ ahetoo.
4 Kɛ obaanyɛ osɔmɔ akɛ gbɛgbalɔi awalɔ jio, onyɛŋ osɔmɔ jio, kɛlɛ obaasumɔ ni ona sɔɔmɔ nitsumɔ lɛ mli gbɛfaŋnɔ kɛmɔ shi yɛ March mli. Ekolɛ asafo lɛ baanyɛ ato kutuu odaseyeli he gbɛjianɔ daa gbi yɛ nyɔŋ lɛ mli. Esa akɛ ato shikpɔŋkuku ni da bɔ ni sa he gbɛjianɔ kɛha enɛ feemɔ.
5 Esa akɛ asafoi fɛɛ ato gbɛjianɔ kɛha kpee krɛdɛɛ kɛha shiɛmɔyaa yɛ Hɔɔ, March 26. Eyɛ mli akɛ nibii babaoo yɛ ni sa akɛ afee ni akɛsaa he kɛha Kaimɔ lɛ moŋ, shi wɔmiijie yi akɛ mɔ fɛɛ mɔ ni baanyɛ afee nakai lɛ kɛ ehe awo shiɛmɔ nitsumɔ lɛ mli Hɔɔ leebi. Kɛfata nitsumɔ yɛ shia kɛ shia lɛ he lɛ, kwɛmɔ akɛ ani mɛi ni ofɔ amɛ nine ni amɛba Kaimɔ lɛ shishi lɛ kaiɔ gbi, kɛ be, kɛ he ni abaakpe yɛ lɛ jogbaŋŋ lo.
6 Fɔɔ Mɛi Krokomɛi Anine ni Owo Amɛ Hewalɛ: Yesu fa esɛɛnyiɛlɔi lɛ akɛ: “Nyɛfea enɛ ni nyɛŋɔkai mi.” (1 Kor. 11:24) Beni Yesu sɛɛnyiɛlɔi ni afɔ amɛ mu lɛ boɔ nakai famɔ lɛ toi lɛ, belɛ aafɔ̃ Yehowa tsulɔ fɛɛ tsulɔ hu nine ni eba ni ebaye Kaimɔ gbijurɔ lɛ he odase. Esa akɛ ofɔ Biblia kaselɔi, owekumɛi, mɛi ni okɛ amɛ egba Biblia mli sane dã, gbalashihilɛ mli hefatalɔi ni heee yeee, kɛ mɛi ni ole amɛ jogbaŋŋ yɛ onitsumɔ he lɛ anine ofata mɛi krokomɛi ni ooofɔ amɛ nine lɛ ahe [Meaning: people you know from your secular work]. Ŋmalamɔ amɛgbɛi koni ohiɛ akakpa mɔ ko nɔ.
7 Hegbɛi krokomɛi hu baaba kɛha mɛi ni yɔɔ wiemɔ lɛ he miishɛɛ lɛ ahewalɛwoo yɛ Kaimɔ lɛ shishi. Kwɛmɔ ni oshɛ jɛmɛ mra koni onyɛ oŋa mɛi heei ni no ji klɛŋklɛŋ kwraa ni amɛbaa jɛmɛ lɛ. Kɛji o-Biblia kaselɔi lɛ ateŋ mɛi pii ba lɛ, ekolɛ eeehi akɛ shiɛlɔi krokomɛi kɛ amɛteŋ mɛi komɛi atara shi yɛ kpee lɛ shishi. Fɔ̃ɔ mɛi heei lɛ anine ni amɛku amɛsɛɛ amɛbabo asafoŋ Maŋshiɛmɔ ni baanyiɛ sɛɛ lɛ toi. Esa akɛ onukpa ni ahala ni baaha maŋshiɛmɔ lɛ asaa ehe jogbaŋŋ koni eha wiemɔ ni kanyaa mɔ.
8 Yɛ Kaimɔ lɛ naagbee, beni wɔ fɛɛ wɔkɛ wɔgbee fataa he ni wɔlaa lala 105, ni ji ‘Nyɛnyaa Yehowa Kromɔ Bi lɛ He!’ lɛ, eba akɛ wɔɔnyɛ wɔkwɛ nyɔŋ ni eho ni wɔkɛ ekaa etsu teokrase nitsumɔ yɛ mli kɛjie Yehowa yi lɛ kɛ miishɛɛ!