Obaanyɛ Ohi Shi Wolo lɛ ni Akɛaaje Biblia Mli Nikasemɔ Shishi

¹ Esa akɛ suɔmɔ ni wɔyɔɔ kɛha gbɔmɛi lɛ atsirɛ wɔ ni wɔku wɔsɛɛ ni wɔyaye wɔbua mɛi ni anɔkwale lɛ he hɔmɔ kɛ kumai yeɔ amɛ lɛ. (Mat. 5:⁠6) Kɛji wɔsumɔɔɔ ni miishɛɛ lɛ sɛɛ afo lɛ, no lɛ esa akɛ wɔkadi mɛi ni naa he miishɛɛ fioo lɛ po, koni wɔha amɛmiishɛɛ lɛ aya hiɛ. Hesaamɔ ji gbɛ titri ni atsɔɔ nɔ ayeɔ omanye.

² Esa akɛ Biblia mli nikasemɔ shishijee afee oti ni ma wɔ­hiɛ. (Mat. 28:20) Obaanyɛ Ohi Shi wolo lɛ klɛŋklɛŋ nii ni akala lɛ hiɛ nɛkɛ hiɛkpamɔ wiemɔ nɛɛ akɛ: “Lɛlɛŋ, wolo ni hi jogbaŋŋ diɛŋtsɛ nɛ, ni abaanyɛ akɛ mɔ fɛɛ mɔ akase, gbekɛbii kɛ onukpai fɛɛ, ni bɔ ni amɛwoloŋlee ji lɛ kɔɔɔ he eko.” Gbɛ ni atsɔ nɔ aŋma lɛ haa ekɛ Biblia mli nikasemɔ feemɔ feɔ mlɛo kwraa, ni ehaa shiɛ­lɔi heei po naa mli gbɛfaŋnɔ. Omanye ni wɔɔye yɛ nikasemɔi heei ashishijee mli lɛ damɔ bɔ ni wɔɔfee sɛɛsaramɔi jogbaŋŋ kɛmɔ shi lɛ nɔ.

³ Te Wɔɔfee Tɛŋŋ Wɔje Nikasemɔi Ashishi?: Kɛ wɔku wɔsɛɛ lɛ, bei pii lɛ, ehi akɛ wɔkɛ wɔsanegbaa lɛ atsa oti loo sanebimɔ ko ni wɔtsĩ tã yɛ wɔ klɛŋklɛŋ saramɔ lɛ mli lɛ nɔ. Ekolɛ nyɛsusu shihilɛ ni gbohii lɛ yɔɔ mli lɛ he, ni oshi sanebimɔ nɛɛ oha lɛ, akɛ, “Mɛɛ hiɛnɔkamɔ yɔɔ kɛha wɔsuɔlɔi ni amɛgboi lɛ?” Gbalamɔ mli otsɔɔ lɛ akɛ gbohiiashitee lɛ jeee hiɛnɔkamɔ ni bɛ nɔdaamɔ nɔ; Biblia lɛ eŋmala gbohiiashiteei babaoo ni eba momo lɛ ahe saji babaoo eshwie shi. Nyɛsusua mfonirii ni yɔɔ baafa 167-9 lɛ ahe. No sɛɛ lɛ, nyɛ­gbaa nɔ ni awie yɛ kuku 1 kɛ 2, yɛ baafa 166 lɛ he sane. Kɛji eyɛ he miishɛɛ lɛ, kɛɛmɔ lɛ akɛ obaasumɔ ni obasara lɛ ekoŋŋ, koni nyɛ­tsa sanegbaa lɛ nɔ.

⁴ Ekolɛ okɛ fɔlɔ ko ni miisusu bɔ ni gbekɛbii atsɔsemɔ he naagbai lɛ yaa nɔ efaa babaoo lɛ ahe lɛ egba sane. Obaanyɛ owie nɔ ko tamɔ nɛkɛ, yɛ bo diɛŋtsɛ owiemɔ mli akɛ:

◼ “Fɔlɔi fɛɛ sumɔɔ ni amɛna nɔ ni hi fe fɛɛ amɛha amɛbii. Gbɛ­tsɔɔ­mɔi yɛ Biblia lɛ mli ni baanyɛ aye abua fɔlɔi ni amɛtsɔse amɛbii lɛ, koni amɛle bɔ ni amɛaafee amɛna miishɛɛ shihilɛ ni shishinumɔ kɛ yiŋtoo yɔɔ sɛɛ. No hewɔ lɛ, wɔmiijie yi waa akɛ wekui fɛɛ afee kome kɛkase Biblia lɛ kutuu. [Gbalamɔ ejwɛŋmɔ kɛya kuku 23 yɛ baafa 246.] Nilee ni amɛaana lɛ baanyɛ ekɛ naanɔ jɔɔmɔi abaha weku muu lɛ fɛɛ.” Kanemɔ Yohane 17:⁠3. Ha amɛle akɛ oosumɔ ni oku osɛɛ obasara amɛ ekoŋŋ, koni otsɔɔ amɛweku lɛ gbɛ ni amɛbaatsɔ nɔ amɛje amɛ­nika­semɔ lɛ shishi.

⁵ Kɛji shiɛlɔ ni edako loo shiɛlɔ hee ji bo, ni owie Para­dei­so hiɛnɔkamɔ lɛ he kuku beni otee mɔ lɛ ŋɔɔ klɛŋklɛŋ kwraa lɛ, obaanyɛ ogbele wolo lɛ baafa 3, ni owie kuku kɛkɛ akɛ:

◼ “Biblia lɛ woɔ shi akɛ mɛi ni feɔ Nyɔŋmɔ suɔmɔnaa nii lɛ baanyɛ akpa gbɛ akɛ amɛbaahi jeŋ ni tamɔ nɛkɛ mli, he ni miishɛɛ kɛ toiŋ­jɔ­lɛ baahi. Wolo nɛɛ tsɔɔ nɔ ni esa akɛ wɔfee koni wɔna nakai jɔɔmɔ lɛ mli ŋɔɔmɔ.” Tsɔɔmɔ lɛ bɔ ni wɔfeɔ nikasemɔ lɛ wɔhaa lɛ kuku, koni okɛ wolo lɛ aha lɛ.

⁶ Akɛ Yesu kaselɔi lɛ, sɔ̃ ka wɔnɔ akɛ wɔye wɔbua mɛi. (Rom. 10:14) Kɛ wɔkɛ woji ha aloo wɔkɛ mɛi gba sane ni yɔɔ miishɛɛ lɛ, sɔ̃ kã wɔnɔ akɛ wɔha miishɛɛ lɛ aya hiɛ babaoo. (Mat. 9:​37, 38) Kɛ wɔ­tsu nitsumɔ nɛɛ jogbaŋŋ lɛ, wɔ fɛɛ wɔbaanyɛ wɔna jɔɔmɔi ni baajɛ mli aba lɛ mli gbɛfaŋnɔ.​—⁠1 Tim. 4:⁠16.