Feemɔ Biblia Mli Nikasemɔi Yɛ Obaanyɛ Ohi Shi Kɛya Naanɔ Wolo Lɛ Mli
1 Yoo ko kɛ miishɛɛ wie Obaanyɛ Ohi Shi Kɛyaa Naanɔ wolo lɛ he waa akɛ: “Yɛ Biblia lɛ diɛŋtsɛ sɛɛ lɛ, wolo nɛɛ ji wolo ni mina akɛ eja, ewoɔ mɔ hewalɛ, ni ekanyaa mɔ hu, fe wolo fɛɛ wolo ni mikane da!” Wɔ fɛɛ wɔkpɛlɛɔ nɔ akɛ wolo nɛɛ ji woji kpakpai ni akala koni eye ebua gbɔmɛi ni amɛnu Biblia lɛ shishi, kɛ titri lɛ, koni ekanya mɛi ni amɛtsɔmɔ Yehowa yijielɔi ni yɔɔ ekaa lɛ ateŋ ekome.
2 Yɛ 1982, ni ji afi mli ni ajie Obaanyɛ Ohi Shi wolo lɛ kpo lɛ, no mli lɛ shiɛlɔi 22,494 miifee Biblia mli nikasemɔi 24,960 yɛ Ghana. Amrɔ nɛɛ, shiɛlɔi 37,676 miifee Biblia mli nikasemɔi 58,590. Kɛbashi amrɔ nɛɛ, akala Obaanyɛ Ohi Shi Kɛya Naanɔ wolo lɛ akpekpei 62 yɛ wiemɔi 115 mli. Mɛɛ hewalɛ kpele nɛkɛ wolo nɛɛ naa yɛ wɔ jeŋ muu fɛɛ nitsumɔ lɛ nɔ nɛkɛ!
3 Okɛ Otii Amamɔ Ohiɛ: Nɛkɛ shweremɔ ni sa kadimɔ waa nɛɛ jɛ Yehowa jɔɔmɔ kɛ shwe ni ewebii shweɔ akɛ amɛkɛ Biblia mli shɛɛ sane ni hereɔ mɔ yiwala lɛ aaye abua anɔkwafoi lɛ. (Rom.10:13-15; 1 Tim. 2:4) Wɔyooɔ bɔ ni wɔ bei nɛɛ ahe hiaa waa ha, kɛ bɔ ni ehe hiaa hu ni wɔkɛ ekaa ajaje Nyɔŋmɔ Maŋtsɛyeli lɛ.
4 Eyɛ mli akɛ asafo lɛ miiya ehiɛ moŋ, shi te wɔmɔdɛŋbɔɔ akɛ aŋkroaŋkroi lɛ yɔɔ ha tɛŋŋ? Ani wɔtswa wɔfai shi akɛ wɔɔna kaselɔ-feemɔ nitsumɔ ni he hiaa lɛ mli gbɛfaŋnɔ kɛmɔ shi? Kɛ wɔɔnyɛ wɔfee enɛ lɛ, no lɛ esa akɛ wɔkɛ otii amamɔ wɔhiɛ. Ani wɔkɛ mɔdɛŋbɔɔ babaoo baadi mɛi ni yɔɔ he miishɛɛ lɛ asɛɛ? Mɛni hewɔ okɛ oti nɛɛ emaaa ohiɛ, akɛ obaaje Biblia mli nikasemɔ hee shishi yɛ March nyɔŋ nɛɛ nɔ?
5 Namɔ Baanyɛ Afee Biblia Mli Nikasemɔ?: Shiɛlɔi pii ni jɛ shihilɛi sɔrɔtoi amli ena miishɛɛ babaoo akɛ amɛfeɔ Biblia mli nikasemɔ yɛ Obaanyɛ Ohi Shi Kɛya Naanɔ wolo lɛ mli. Bɔ ni eshishinumɔ waaa lɛ haa ekɛ nikasemɔ feemɔ feɔ mlɛo, ni ehaa shiɛlɔi heei po nyɛɔ amɛnaa nitsumɔ ni he hiaa nɛɛ mli gbɛfaŋnɔ. Kɛfata he lɛ, wɔteŋ mɛi pii ekase wɔha wɔ diɛŋtsɛ wɔhe, no hewɔ lɛ wɔle emli saji jogbaŋŋ. Shiɛlɔ ko ni kɛ Obaanyɛ Ohi Shi Kɛya Naanɔ wolo lɛ eko efeko Biblia mli nikasemɔ pɛŋ da lɛ kɛ hiɛsɔɔ ŋma akɛ: “Miyɛ nikaselɔi etɛ, kɛ nɔ ni ji ejwɛ ni wɔbaaje shishi. Minyɛŋ nyɛ shi mada bɔ ni sa yɛ Biblia mli nikasemɔ feemɔ ni nyɛfee lɛ mlɛo nɛɛ hewɔ.”
6 Gbekɛbii hu miiná Biblia kasemɔ nitsumɔ lɛ mli gbɛfaŋnɔ ni mɔɔ shi kɛtsɔ Obaanyɛ Ohi Shi Kɛya Naanɔ wolo lɛ kɛ nitsumɔ nɔ. Nyɛminuu fioo ko shiɔ wolo lɛ yɛ ekpɔlɔ nɔ yɛ skul. Enɛ egbele gbɛ kɛha sanegbaai kpɛkpɛi kɛ Biblia mli nikasemɔi babaoo. Gbekɛbii lɛ ekomɛi kɛ gbɛ ni yɔɔ tɛɛ etsu nii, kɛtsɔ gbɛ ni amɛbiɔ fɔlɔi ni amɛkɛkpeɔ yɛ shia-kɛ-shia sɔɔmɔ nitsumɔ lɛ mli lɛ, koni amɛkɛ amɛbii lɛ akase Biblia lɛ nɔ. Wɔbii lɛ bɛ bibii tsɔ bɔ ni amɛnyɛŋ amɛwie Yehowa shiwoo ni kɔɔ naanɔ wala yɛ paradeiso shikpɔŋ nɔ he lɛ he.
7 Gbekɛbii jio, onukpai jio, miishɛɛ wuji ni mɔ ko aaanyɛ ana yɛ sɔɔmɔ nitsumɔ lɛ mli lɛ ekome ji Biblia mli nikasemɔ feemɔ. No hewɔ lɛ nyɛhaa wɔteŋ mɔ fɛɛ mɔ asɔlea abia Yehowa yelikɛbuamɔ ni wɔkɛ hegbɛ fɛɛ hegbɛ ni wɔnaa lɛ atsua nii kɛjajea wɔ hiɛnɔkamɔ lɛ faŋŋ. Okɛ Obaanyɛ Ohi Shi Kɛya Naanɔ wolo lɛ atsu nii ni okɛye obua mɛi krokomɛi ni amɛle bɔ ni amɛaafee amɛbafata he ni wɔkɛjie wɔ-Nyɔŋmɔ, Yehowa yi.—Lala 148:12, 13.