Ye Obua Amɛ ni Amɛbo Toi “Be Kroko Hu”
1 “Wɔbaabo nɔ ni jɛ nyɛŋɔɔ nɛɛ toi be kroko hu.” (Bɔf. 17:32, NW) Nakai ji bɔ ni mɛi komɛi here Paulo maŋshiɛmɔ ni ale waa ni eha yɛ Areopago lɛ nɔ amɛha. Ŋmɛnɛ hu, mɛi komɛi sumɔɔ ni amɛbo Maŋtsɛyeli shɛɛ sane ni wɔkɛ amɛ gba he sane beni wɔyasra amɛ klɛŋklɛŋ lɛ toi pii lolo.
2 Be ni wɔkɛtsɔɔ nii titri ji beni wɔkuɔ sɛɛ koni wɔyatee miishɛɛ shi lɛ. Hesaamɔ kpakpa baaye abua wɔ koni ewo yibii kpakpai. School Guidebook lɛ baafa 51 lɛ woɔ ŋaa akɛ: “Klɛŋklɛŋ lɛ ha saji ni baatsɔɔ naa pɛpɛɛpɛ ni fiɔ sane lɛ sɛɛ lɛ afee faŋŋ yɛ ojwɛŋmɔ mli. Bɔɔ mɔdɛŋ ni ona nɔ hewɔ ni akɛ sane lɛ tsuɔ nii lɛ. Kwɛmɔ kɛji obaanyɛ otsɔɔ jwɛŋmɔ ni hɔ sɛɛ lɛ yɛ bo diɛŋtsɛ owiemɔ mli. Kwɛmɔ ni onu Ŋmalɛ mli odaseyelii lɛ shishi jogbaŋŋ. Saamɔ ohe koni okɛ ŋmalɛi lɛ atsu nii jogbaŋŋ.”
3 Kɛ okɛ “The Bible—God’s Word or Man’s?” wolo lɛ ha lɛ, ekolɛ obaasumɔ ni okɛɛ nɔ ko nɛkɛ:
◼ “Beni wɔgba sane be ko lɛ, wɔsusu saji ahewɔ ni wɔbaanyɛ wɔna hekɛnɔfɔɔ yɛ Biblia lɛ mli lɛ he. Wolo ni mishi miha bo lɛ tee sanebimɔ lɛ shi akɛ, ‘Mɛni Hewɔ Esa akɛ Okane Biblia Lɛ?’ [Kanemɔ hiɛkpamɔ wiemɔ ni yɔɔ baafa 5, ni oŋmɛ gbɛ koni eha naagbee sanebimɔ lɛ hetoo.] Biblia lɛ kɛɔ wɔ akɛ etsɛŋ kwraa ni Nyɔŋmɔ diɛŋtsɛ kɛ adesai anaagbai ni mli wa nɛɛ fɛɛ anaa tsabaa baaba, ni etsɔɔ wɔ gbɛ ni sa akɛ wɔtsɔ nɔ ni wɔna nakai miishɛɛ be lɛ mli jɔɔmɔi lɛ amli ŋɔɔmɔ. [Kanemɔ Lala 119:105.] Ato wolo nɛɛ he gbɛjianɔ koni eye ebua ni akɛ Biblia lɛ afee teemɔŋ nikasemɔ kɛ weku nikasemɔ. Ebaaŋɔɔ minaa akɛ matsɔɔ bo bɔ ni akɛaatsu nii aha.”
4 Yɛ hei ni oshi “Nɔ Hewɔ ni Obaanyɛ Okɛ Ohe Afɔ Biblia lɛ Nɔ” wolo bibioo lɛ yɛ lɛ, ooonyɛ okɛɛ akɛ:
◼ “Wɔ fɛɛ wɔyɛ nɔ ni baaba wɔsɛɛ lɛ he miishɛɛ. Yɛ ŋmɛnɛŋmɛnɛ je lɛŋ shihilɛi ni yaa nɔ lɛ ahewɔ lɛ, mɛni osusuɔ akɛ ebaaba? [Ha ni eha hetoo.] Yɛ be mli ni adesai baanyɛ asusu nɔ ni baaba wɔ sɛɛ lɛ he kɛkɛ lɛ, Nyɔŋmɔ le nɔ ni baaba diɛŋtsɛ. [Kanemɔ Yesaia 46:10.] Eeefee bo naakpɛɛ akɛ ooole akɛ Biblia lɛ gbaa akɛ etsɛŋ ni wɔbaana paradeiso jeŋ hee lɛ mli jɔɔmɔi amli ŋɔɔmɔ. [Kanemɔ kuku etɛ yɛ baafa 4.] Ha makɛɛ bo shiwoo ni yɔɔ naakpɛɛ nɛɛ he nibii babaoo.”
5 Kɛ oofee sɛɛsaramɔ yɛ “New World Translation” lɛ ni okɛha hewɔ lɛ, ekolɛ obaana ŋaawoo nɛɛ he sɛɛ:
◼ “Nyɛsɛɛ nɛɛ, mishi Biblia lɛ eko miha bo, ni miwo bo shi akɛ maku misɛɛ ni mabaye mabua bo ni ona ekɛ nitsumɔ he sɛɛ jogbaŋŋ. Bei komɛi lɛ wɔɔsusu bɔ ni wɔɔfee ni wɔnyɛ wɔhiɛ wɔkɛ mɛi krokomɛi ateŋ naanyobɔɔ mli. Biblia lɛ yɛ ŋaawoo kpakpa ni ekɛaaha, ni New World Translation lɛ haa wɔnaa nɔ ni wɔtaoɔ lɛ mra. [Gbelemɔ 1984 nɔ, ní yɔɔ, ni wiemɔi ni tsɛɔ saji asɛɛ fata he lɛ baafa 1595, ni okwɛ saneyitso ni ji “Love(s)” shishi. Gbalamɔ jwɛŋmɔ kɛya ŋmalɛi tamɔ 1 Korintobii 13:4; Kolosebii 3:14; kɛ 1 Petro 4:8 lɛ nɔ. Tsɔɔmɔ bɔ ni shishitoo mlai ni aaanyɛ akɛtsu nii lɛ baanyɛ awo yibii kpakpai lɛ mli kuku.] Nɔkwɛmɔ nɔ ni tsɔɔ bɔ ni Biblia lɛ kɛ wɔ naagbai lɛ anaa tsabaa haa ni abaanyɛ akɛtsu nii lɛ ekome nɛ. Masumɔ akɛ matsɔɔ bo gbɛ kroko ni Biblia lɛ baanyɛ aye abua wɔ ni wɔna miishɛɛ kɛ jwɛŋmɔŋ toiŋjɔlɛ be kroko hu.”
6 Jwetri ko kwraa bɛ ni da fe Nyɔŋmɔ Wiemɔ lɛ he anɔkwa nilee ni wɔbaanyɛ wɔha mɛi krokomɛi anine ashɛ nɔ lɛ. Nilee ni tamɔ nɛkɛ lɛ baanyɛ atsɔɔ mɛi Yehowa gbeyeishemɔ ni ewo amɛ hewalɛ ni amɛnyiɛ yɛ egbɛ ni kɛ naanɔ jɔɔmɔi baa lɛ nɔ.—Abɛi 2:20, 21.