Biblia lɛ—Miishɛjemɔ kɛ Hiɛnɔkamɔ Jɛɛhe yɛ Jeŋ ni Ehao Mli
1 Je nɛɛ yaa nɔ ehaa adesai bajeɔ nɔnyɛɛ ni mli wa shishi ni éha miishɛjemɔ kɛ hiɛnɔkamɔ he miihia. Biblia lɛ pɛ ji anɔkwa miishɛjemɔ jɛɛhe. Ekɛ jalɛ jeŋ hee he hiɛnɔkamɔ haa. (Rom. 15:4; 2 Pet. 3:13) Insight wolo lɛ, Kpo 1, baafa 311, kɛɛ akɛ: “Eji Biblia lɛ bɛ kulɛ, wɔbaleŋ Yehowa, wɔbaleŋ sɛɛnamɔi ni yɔɔ naakpɛɛ ni jɛɔ Kristo kpɔmɔ afɔleshaa lɛ mli baa lɛ, ni wɔbanáŋ taomɔ nii ni sa akɛ ashɛ he, bɔni afee ni ana naanɔ wala yɛ Nyɔŋmɔ jalɛ Maŋtsɛyeli lɛ mli, loo yɛ eshishi lɛ he shishinumɔ.”
2 Wɔbaagbala jwɛŋmɔ krɛdɛɛ ko kɛba nɔ ni Nyɔŋmɔ Wiemɔ, ni ji Biblia lɛ tsuɔ yɛ yelikɛbuamɔ ni ekɛhaa mɛi koni akɛdamɔ je lɛŋ nɔnyɛɛi lɛ anaa lɛ nɔ yɛ November. Wɔkɛ New World Translation of the Holy Scriptures lɛ kɛ The Bible—God’s Word or Man’s? wolo lɛ baaha. Mɛni wɔbaanyɛ wɔkɛɛ ni baaye ebua mɛi ni sumɔɔ jalɛ lɛ koni amɛhiɛ asɔ sɛɛnamɔ ni yɔɔ Biblia lɛ he lɛ?
3 Beni ojie ohe kpo sɛɛ lɛ, obaanyɛ okɛɛ nɔ ko nɛkɛ:
◼ “Ekolɛ okɛ mi aaakpa gbee akɛ naagbai ni feɔ tamɔ nɔ ni haaa wɔna jwɛŋmɔŋ toiŋjɔlɛ lɛ ebɔle wɔ kɛkpe. Nɛgbɛ wɔbaanyɛ wɔna ŋaawoo ni akɛbaatsu nii ni baatsɔɔ wɔ bɔ ni wɔɔfee wɔdamɔ naagbai nɛɛ anaa lɛ yɛ? [Ha ni eha hetoo.] Nɔ ni mina yɛ Biblia lɛ he ji akɛ ehaa anaa nɔmimaa yɛ he, ejaakɛ etsɔɔ bɔ ni wɔɔfee wɔna miishɛɛ. [Kanemɔ Luka 11:28.] Yiŋtoo ni yɔɔ wɔ nitsumɔ lɛ sɛɛ ji ni wɔwo mɛi ahewalɛ ni amɛkane Biblia lɛ koni amɛna emli ŋaawoo lɛ he sɛɛ. Wolo ni ji The Bible—God’s Word or Man’s? nɛɛ ni yeɔ buaa Biblia lɛ kasemɔ lɛ, baanyɛ eye ebua bo ni ofee nakai. Kadimɔ nɔ ni ekɛɔ yɛ nɔ ni kɛ je lɛŋ naagbai babaoo baa lɛ he lɛ. [Kanemɔ wiemɔ kakadaŋŋ ni ji enyɔ lɛ yɛ baafa 187 lɛ kuku 9.] Mana he miishɛɛ akɛ mashi wolo nɛɛ maha bo koni oha mi ₵800.00 akɛ nɔ ko fioo ni okɛmiiye kɛbua.”
4 Ekolɛ obaasumɔ ni okɛ gbɛ kuku tamɔ nɛkɛ atsu nii:
◼ “Wɔyɛ he miishɛɛ akɛ wɔɔwo hewalɛ koni ana bulɛ ni mli kwɔ aha Nyɔŋmɔ Wiemɔ, ni ji Biblia lɛ. Masumɔ ni mikɛ dɛhiɛmɔ wolo ni ji Nɔ Hewɔ ni Obaanyɛ Okɛ Ohe Afɔ Biblia lɛ Nɔ nɛɛ eko aha bo. Etsɔɔ nɔ hewɔ ni wɔbaanyɛ wɔkɛ wɔhiɛ afɔ Biblia lɛ nɔ kɛha jeŋ ni hi lɛ he hiɛnɔkamɔ ni ma shi shiŋŋ namɔ. [Gbelemɔ baafa 6, ni okane Lala 37:29 kɛ naagbee kuku lɛ hu.] Bo diɛŋtsɛ kanemɔ wolo bibioo nɛɛ, ni kɛ mibasara bo be kroko lɛ, ha male nɔ ni osusuɔ yɛ hiɛnɔkamɔ ni Biblia lɛ kɛhaa lɛ he.”
5 Ekolɛ shiɛlɔi komɛi baasumɔ ni amɛkɛ gbɛ ni yɔɔ tɛɛ nɛɛ atsu nii koni amɛkɛje Biblia mli nikasemɔ shishi:
◼ “Miiba oŋɔɔ koni mikɛ bo ato shia Biblia mli nikasemɔ he gbɛjianɔ ni aheee nɔ ko. Biblia lɛ jɛ Nyɔŋmɔ mumɔ lɛŋ, ni emli ŋaawoo lɛ baanyɛ aye ebua wɔ koni wɔkɛjaje nibii. Ato New World Translation of the Holy Scriptures ni aŋma yɛ ŋmɛnɛŋmɛnɛ blɔfo wiemɔ mli lɛ he gbɛjianɔ kɛha mɔ diɛŋtsɛ teemɔŋ nikasemɔ. Biblia kanelɔi akpekpei abɔ ni yɔɔ jeŋ fɛɛ lɛ yɛ eko. Ha matsɔɔ bo bɔ ni ooofee ni onyɛ okɛtsu nii lɛ kuku. [Kɛ ohiɛ 1984 nɔ, ni̇́ yɔɔ, ni wiemɔi ni tsɛɔ saji asɛɛ fata he lɛ eko lɛ, gbelemɔ baafa 1653, ni ogbala jwɛŋmɔ kɛya 23A. Kwɛmɔ ŋmalɛi ni atsɛ sɛɛ lɛ ekome loo enyɔ ni nyɛsusu otii ni ajie kpo atsɔɔ lɛ he, yɛ bɔ ni ejieɔ miishɛɛ kpo etsɔɔ lɛ naa. Tsɔɔmɔ bɔ ni ŋmalɛi ni atsɛ sɛɛ lɛ mli kwɛmɔ baajie nɔ ni Nyɔŋmɔ eto eyiŋ akɛ ebaatsu he nii kɛtsɔ e-Maŋtsɛyeli lɛ nɔ lɛ kpo otsɔɔ.] Mana he miishɛɛ akɛ maku misɛɛ koni wɔbasusu Maŋtsɛyeli hiɛnɔkamɔ lɛ he lolo kɛya hiɛ.”
6 Biblia lɛ ji miishɛjemɔ kɛ hiɛnɔkamɔ jɛɛhe kɛ anɔkwale hu ni baanyɛ ekɛ wɔ aya naanɔ wala mli. (Yoh. 17:3, 17) Ni wɔkɛ mɛi krokomɛi aaagba Biblia mli nilee he sane lɛ ŋɔɔ Nyɔŋmɔ ni “sumɔɔ akɛ ehere gbɔmɛi fɛɛ yiwala” lɛ naa.—1 Tim. 2:4.