1995 “Miishɛɛ Yijielɔi” Yehowa Odasefoi a-Kpokpaa Wulu nɔ Kpee
1 Mɛɛ miishɛɛ eji nɛkɛ akɛ ofata mɛi 123,520 ni tee 1994 “Nyɔŋmɔ Gbeyeishemɔ” Kpokpaa Wulu nɔ Kpeei ni afee yɛ Ghana nitsumɔ he nine lɛ shikpɔŋkuku mli lɛ ahe! Mɛi 2,296 jie Nyɔŋmɔ gbeyeishemɔ kpakpa kpo kɛtsɔ baptisimɔ nɔ. Kwɛ bɔ ni ewoɔ mɔ hewalɛ akɛ aaabua he naa kɛha 1995 gbii etɛ “Miishɛɛ Yijielɔi” Kpokpaa Wulu nɔ Kpeei lɛ! Esa akɛ nakai saneyitso ni teɔ miishɛɛ shi lɛ akanya wɔ lɛlɛŋ ni wɔbɔ mɔdɛŋ fɛɛ ni wɔɔnyɛ ni wɔkɛ wɔ Biblia mli nikaselɔi aya. Gbɛjianɔtoo lɛ baafee mumɔŋ hejɔɔmɔ jɛɛhe diɛŋtsɛ kɛha wɔ fɛɛ yɛ be mli ni wɔkɛ anɔkwayeli yaa nɔ wɔsɔmɔɔ Yehowa yɛ naagbee be nɛɛ mli lɛ.
2 Kwɛmɔ ni oto okpeeyaa lɛ he gbɛjianɔ jogbaŋŋ kɛtsɔ hiɛ, koni oba jɛmɛ ni onyɛ ona gbii etɛ lɛ fɛɛ mli mumɔŋ wiemɔi ni ŋɔɔ, ni ato he gbɛjianɔ lɛ mli ŋɔɔmɔ, kɛjɛ be ni akɛ sɔlemɔ jeɔ shishi lɛ nɔ kɛyashi be ni akɛ sɔlemɔ aaakpa. Okɛ suɔmɔ atsu nii koni okɛ mɛi ni yelikɛbuamɔ he baahia amɛ lɛ afata ogbɛjianɔtoi lɛ ahe, titri lɛ mɛi heei ni yɔɔ wiemɔ lɛ he miishɛɛ lɛ, bɔni afee ni amɛ hu amɛnyɛ amɛbabo kpee lɛ fai sɔrɔtoi lɛ fɛɛ toi. Ebaaye ebua waa akɛ okɛ Biblia mli nikaselɔi fɛɛ ni baato gbɛjianɔ ni amɛya lɛ aaasusu sane ni yɔɔ nɔ ni aŋma ahɔ mli nɛɛ he. (Gal. 6:6, 10) Wiemɔi ahe gbɛjianɔtoo lɛ kɛ lala baaje shishi Sohaa leebi, 9:50 ni ebaaba naagbee aaafee shwane 5:00. Gbɛjianɔtoo lɛ baaje shishi Hɔɔ leebi, 9:50 ni akɛ lala kɛ sɔlemɔ baagbe naa aaafee shwane 4:50. Hɔgbaa leebi gbɛjianɔtoo lɛ baaje shishi leebi 9:50, ni gbi lɛ gbɛjianɔtoo lɛ baaba naagbee kwraa aaafee shwane 4:10. Saji ni nyiɛ sɛɛ nɛɛ baaye abua bo yɛ gbɛjianɔ ni otoɔ kɛtsɔɔ hiɛ lɛ mli.
Ŋaawoi Kɛha Tsu Taomɔ
3 Akɛ “Room Request” woji lɛ eko emaje asafo fɛɛ asafo. Ofainɛ ni oŋma “Room Request” wolo lɛ eko nɔ nii, kɛ ootao wɔɔ he kɛtsɔ kpee he gbɛjianɔtoo lɛ nɔ, koni okɛha asafo lɛ woloŋmalɔ lɛ ni ema nɔ mi, koni no sɛɛ lɛ okɛmaje kpee ni obaaya lɛ. ESAAA ni akɛ tsubimɔ woji kɛ kpee he woji krokomɛi ni aŋmalaa lɛ majeɔ nitsumɔ he nine ni yɔɔ Accra lɛ.
4 Abaana wɔɔ hei lɛ ekomɛi yɛ mɛi ashiai amli. Esa akɛ mɛi ni ahãa amɛ tsũi yɛ nɛkɛ gbɛ nɔ lɛ akai akɛ efeŋ nɔ ni sa akɛ amɛkɛ amɛ gbɔfeelɔi lɛ agbɔfeemɔ aaatsu nii yɛ gbɛ ni ejaaa nɔ kɛtsɔ gbɛ ni amɛaakpa akɛ amɛbaahi tsu lɛ mli be kakadaŋŋ fe gbii pɔtɛɛ ni atsɔɔ yɛ “Room Request” wolo lɛ nɔ lɛ nɔ. Akɛ tsũi nɛɛ ha kɛha kpee be lɛ PƐ. Mɛi ni nine shɛɔ wɔɔ hei ni tamɔ nɛkɛ nɔ lɛ akwɛ koni amɛ kɛ amɛbii lɛ atsɔɔ bulɛ yɛ amɛ gbɔfeelɔ lɛ shia mli nibii ahe, ni jeee akɛ amɛaagbɛlɛ gbɔfeelɔ lɛ nibii amli loo ni amɛaafite enɛɛmɛi loo ni amɛaabote shia lɛ mli hei komɛi ni esaaa akɛ mɛi krokomɛi boteɔ jɛmɛ lɛ. Kɛ shiatsɛmɛi ná naagbai yɛ enɛ gbɛfaŋ lɛ, esa akɛ aha tsu taomɔ he nɔkwɛlɔi ni yɔɔ kpee lɛ shishi lɛ ale enɛɛmɛi oya nɔŋŋ, ni ebaana he miishɛɛ akɛ eeeye ebua.
Hiamɔ Nii Krɛdɛɛ
5 Nɛkɛ gbɛjianɔtoo nɛɛ yɛ kɛha shiɛlɔi ni feɔ nɔkwɛmɔ nɔ kpakpa, kɛ amɛbii ni baa amɛjeŋ jogbaŋŋ ni Asafo Sɔɔmɔ Ajinafoi Akuu lɛ kpɛlɛɔ amɛnɔ lɛ pɛ. Esa akɛ asafo ni mɛi ni yɔɔ hiamɔ nii krɛdɛɛ yɔɔ mli lɛ ato gbɛjianɔ ni amɛye amɛbua amɛ fe nɔ ni amɛkɛ gbɛnaa nii nɛɛ aaafɔ kpee gbɛjianɔtoo lɛ nɔ. Onukpai kɛ mɛi krokomɛi ni le mɔ aŋkro lɛ hiamɔ nii lɛ baanyɛ aye abua nakai mɔ lɛ yɛ suɔmɔ mli. Bei pii lɛ, enɛ biɔ ni shiɛlɔi asusu mɛi ni yɔɔ be-fɛɛ sɔɔmɔ lɛ mli, mɛi ni edara yɛ afii amli, mɛi ni bɛ gbɔmɔtsoŋ hewalɛ, kɛ ekolɛ mɛi krokomɛi lɛ ahiamɔ nii ahe. Shiɛlɔi lɛ baanyɛ aye abua kɛtsɔ ya ni amɛkɛ mɛi ni tamɔ nɛkɛ aaaya loo amɛhiamɔ nii ni amɛaatsu he nii yɛ gbɛi krokomɛi anɔ lɛ nɔ.—Yak. 2:15-17; 1 Yoh. 3:17, 18.
6 Shi kɛlɛ, Rooming Department lɛ baabɔ mɔdɛŋ ni amɛna wɔɔ hei ni sa kɛha shiɛlɔi ni yɔɔ hiamɔ nii krɛdɛɛ lɛ kɛ́ asafo lɛ mli bii nyɛŋ aye abua. Shiɛlɔi nɛɛ kɛ asafo lɛ woloŋmalɔ lɛ baagba amɛhiamɔ nii ahe sane. Esa akɛ woloŋmalɔ lɛ kɛ Asafo Sɔɔmɔ Ajinafoi lɛ awie he koni ekwɛ kɛji asafo lɛ baanyɛ aye abua aŋkroaŋkroi nɛɛ koni amɛna amɛ diɛŋtsɛ amɛ wɔɔ he. Kɛ asafo lɛ nyɛŋ ekɛ yelikɛbuamɔ ni he hiaa aha lɛ, mɔ ni taoɔ tsu lɛ baaŋma “Room Request” wolo lɛ nɔ nii, ni no sɛɛ lɛ ekɛha woloŋmalɔ lɛ ekoŋŋ, ni lɛ hu ebaakwɛ kɛji nɔ fɛɛ nɔ ja yɛ nɔ lo, kɛ shihilɛ mli ni mɔ lɛ yɔɔ ni ehe hiaa akɛ atao tsu aha lɛ lɛ. Esa akɛ woloŋmalɔ lɛ aŋma wolo ni EKƐTSƆƆ MLI FITSOFITSO. Esa akɛ afee enɛɛmɛi fɛɛ kɛtsɔ hiɛ kwraa dani kpee be lɛ ashɛ. Kɛkɛ lɛ woloŋmalɔ lɛ kɛ tsubimɔ wolo lɛ baaha Rooming Department. Abaana mɔ ni biɔ tsu lɛ tɛɛ koni aha ni ele wɔɔ he lɛ he gbɛjianɔtoo.
7 Kɛ mɛi ni yɔɔ hiamɔ nii krɛdɛɛ lɛ shɛ he ni afeɔ kpee lɛ yɛ amrɔ nɔŋŋ lɛ, amɛfata Asafo Sɔɔmɔ Ajinafoi lɛ ateŋ mɔ kome loo onukpa kroko he koni amɛyabi enɛ he sane yɛ Rooming Department kɛha amɛtsu ni akɛbaaha amɛ lɛ.
8 Ogbeekpamɔ He Miihia: Omanye ni nɛkɛ tsu taomɔ he gbɛjianɔtoo nɛɛ baaye lɛ damɔ mɛi fɛɛ ni ekɔɔ amɛhe lɛ agbeekpamɔ nɔ. (Heb. 13:17) No hewɔ lɛ, wɔmiibi ni mɔ fɛɛ mɔ kɛ Asafo lɛ tsu taomɔ he gbɛjianɔtoo lɛ atsu nii kɛmɔ shi ni amɛhi hei ni akɛha amɛ lɛ koni akafa tsɔ yɛ he kome.
He ni Obaaya Yɛ
9 Yɛ shihilɛi fɛɛ mli lɛ, he ni ato he gbɛjianɔ aha bo ni oya ji nɔ ni bɛŋkɛ asafo mli ni oyɔɔ lɛ fe fɛɛ lɛ. Gbɛjianɔ ni atoɔ koni ana sɛii ni fa, woji, wɔɔ hei, kɛ ekrokomɛi lɛ damɔ jwɛŋmɔ ni ahiɛ akɛ shiɛlɔi lɛ ateŋ mɛi ni fa baaya kpee lɛ yɛ he ni akɛha asafo ni amɛyɔɔ mli lɛ nɔ. Akɛ he ni akɛha ni aya yɛ lɛ mli saji titrii lɛ eha yɛ nɔ ni aŋma ahɔ mli nɛɛ baafa 6. Belɛ, ehe miihia ni asafoi lɛ fɛɛ abɔ mɔdɛŋ ni amɛkɛ gbɛjianɔtoo ni atsɔɔ lɛ atsu nii. Titri lɛ yɛ asafoi ni yɔɔ maŋtiasei amli lɛ gbɛfaŋ.
10 Kɛ abaafee kpeei enyɔ yɛ wiemɔ kome too lɛ nɔŋŋ mli yɛ maŋtiase ko mli lɛ, nyɛmimɛi komɛi baasumɔ ni amɛya kpeei enyɔ lɛ fɛɛ. Yɛ be mli ni ŋwanejee ko bɛ he akɛ enɛ baaha amɛna hegbɛ kɛha hewalɛwoo babaoo lɛ, fɛɛ sɛɛ lɛ ekɛ naagbai baa yɛ nibii ni akɛtsuɔ nii ni akɛfeɔ kpee lɛ gbɛfaŋ, ni no haaa yiŋtoo hewɔ ni asumɔɔ ni mɛi ayifalɛ lɛ afee nɔ ni sa koni nitsumɔ ni tsɔɔ kpee lɛ hiɛ kɛ nɔ ni atsuɔ yɛ kpee lɛ sɛɛ lɛ akafa tsɔ lɛ aye omanye. Yɛ enɛ hewɔ lɛ wɔmiibi ni nyɛmimɛi ni yɔɔ maŋtiasei amli lɛ aya kpee ni ato aha amɛ yɛ nakai maŋtiase lɛ mli lɛ pɛ. Kɛ amɛmiitao ni amɛya kpee ni ji enyɔ, shi jeee yɛ maŋtiase nɛɛ nɔŋŋ mli lɛ, no lɛ ejeee naagba kɛha wɔ. Yɛ nyɛmimɛi ni akɛ kpee shishi nitsumɔi komɛi ni he hiaa woɔ amɛdɛŋ ni amɛtsuɔ he nii ni no hewɔ lɛ amɛnaaa hegbɛ ni amɛbo wiemɔi lɛ fai komɛi atoi lɛ agbɛfaŋ lɛ, aŋmɛɔ amɛ gbɛ ni amɛya kpee ni ji enyɔ ni abaafee yɛ nakai maŋtiase lɛ nɔŋŋ mli lɛ. Kɛfata he lɛ, kɛji wiemɔ he naagba hewɔ lɛ, nyɛmimɛi komɛi baasumɔ ni amɛya kpee lɛ yɛ maŋtiase kroko mli, shi jeee he ni atsɔɔ ni amɛ asafo lɛ aya lɛ, no hu gbɛ yɛ akɛ amɛfeɔ nakai.
11 Yɛ asafoi ni yɔɔ shɔŋŋ lɛ agbɛfaŋ lɛ, ekolɛ nibii tamɔ wiemɔ, gbɛ lɛ jɛkɛmɔ, kɛ tsɔne ni akɛbaaya lɛ baaha efee nɔ ni hi waa akɛ amɛaaya kpee lɛ yɛ he kroko moŋ fe he ni ato ni amɛya lɛ. Asafoi ni yɔɔ shihilɛ ni tamɔ nɛkɛ mli lɛ yɛ hegbɛ ni amɛhalaa he ni amɛbaaya. Shi kɛlɛ, esa akɛ asafoi ni baakpɛ yiŋ akɛ amɛbaaya kpee kroko ni jeee nɔ ni ato ni amɛya lɛ atswa kpokpaa nɔkwɛlɔ lɛ adafi kɛtsɔ hiɛ kwraa koni ekato amɛsaramɔ be he gbɛjianɔ kɛmiiha nakai otsi ni amɛbaaya kpee lɛ.
12 Tamale Kpee: Abaafee “Miishɛɛ Yijielɔi” Kpokpaa Wulu nɔ Kpeei ni atoɔ he gbɛjianɔ lɛ naagbee nɔ yɛ Tamale kɛjɛ January 5 kɛyashi 7, 1996. Abaawie Frafra kɛfata Twi wiemɔ lɛ he, taakɛ afee nyɛsɛɛ ko lɛ. Aawo nyɛmimɛi fɛɛ ni jɛ wuoyigbɛ ni baanyɛ aya lɛ hewalɛ ni amɛya kpee nɛɛ. Kɛ Asafo lɛ baato tsɔne he gbɛjianɔ krɛdɛɛ kɛha gbɛfaa lɛ yɛ afi nɛɛ mli hu lɛ, no lɛ abaaha nyɛle yɛ be ni sa mli. Aawo mɛi ni toɔ gbɛjianɔ koni amɛya lɛ hewalɛ ni amɛye odase tɛɛ ni amɛfee trukaa odaseyeli hu beni amɛyɔɔ Tamale lɛ. Wɔmiiwo mɛi fɛɛ ni yɔɔ he miishɛɛ akɛ amɛaaya lɛ hewalɛ koni amɛbɔi amɛhe saamɔ kɛha kpee lɛ.
Kpee He Saji Krokomɛi
13 Nitsumɔ ni Tsɔɔ Kpee Hiɛ: Hiɛ esɔ enɛ he nii ni nyɛtsu yɛ be ni eho lɛ mli lɛ jogbaŋŋ. Taakɛ afɔɔ feemɔ lɛ, abaama agba, abaatao wɔɔ hei, kɛ nitsumɔi krokomɛi. Wɔyɛ hiɛnɔkamɔ akɛ mɛi fɛɛ ni yɔɔ he ni abaafee kpee lɛ yɛ kɛ asafoi ni bɛŋkɛ jɛmɛ fɛɛ lɛ baato amɛ nitsumɔi ahe gbɛjianɔ koni amɛfata he kɛtsu nitsumɔ ni he hiaa nɛɛ kɛmɔ shi yɛ otsii lɛ anaagbee kɛ otsi lɛ mli gbii lɛ amli. Mɛi pii ni kɛ amɛhe baawo volunteer nitsumɔ lɛ mli koni amɛye amɛbua lɛ ahe baahia hu yɛ kpee lɛ shishi, no hewɔ lɛ okɛ oweku lɛ ato gbɛjianɔ koni nyɛfata he kɛtsu enɛ yɛ kpee ni nyɛbaaya lɛ shishi.
14 Kpee Shishi Badge kɛ Nɔ ni Akɛhɔɔ Mli: Aawo asafo fɛɛ asafo ŋaa ni amɛkɛ “Literature Request Form” (S-14) lɛ atsu nii ni amɛkɛshɛ badge kɛ plastik ni akɛhɔɔ mli lɛ kɛha “Miishɛɛ Yijielɔi” Kpokpaa Wulu nɔ Kpeei lɛ. Nyɛfainɛ, nyɛkwɛa ni nyɛŋmaa nɔ fɛɛ nɔ fɛfɛo yɛ wolo lɛ nɔ ni nyɛkɛ klɛŋklɛŋ nɔ lɛ amajea Asafo lɛ AMRƆ NƆŊŊ koni anyɛ atsu nyɛ kpee lɛ he nibii ni nyɛtaoɔ lɛ ahe nii yɛ be ni sa mli. Nyɛhaa ahia nyɛjwɛŋmɔ mli akɛ nyɛnaŋ badge kɛ nɔ ni akɛhɔɔ mli lɛ eko yɛ kpeei lɛ ashishi.
15 Lalai: Lalai ni ato he gbɛjianɔ akɛ abaala yɛ kpee lɛ shishi lɛ nyiɛ sɛɛ nɛɛ, ni ato naa yɛ bɔ ni amɛbaatsara nɔ lɛ naa: 57, 33, 72, 3, 183, 148, 107, 38, 152, 106, 191, 42, 61, 200, 155, 85, 217, kɛ 45. Yɛ ŋaawoo ni akɛha yɛ Efesobii 5:19 lɛ hewɔ lɛ, aawo wɔ fɛɛ hewalɛ ni wɔfata he kɛla yɛ be mli ni atswaa saŋku-lalai lɛ yɛ kpeei lɛ ashishi lɛ.
16 Wiemɔi ni Amɔmɔɔ loo Video Mfoniri-Shamɔi: Asafo lɛ etoŋ gbɛjianɔ ko kɛhaŋ wiemɔi loo drama lɛ mɔɔmɔ yɛ kpaa nɔ. Esa akɛ aŋkroaŋkroi ni baamɔmɔ wiemɔi lɛ yɛ kpaai anɔ kɛha amɛhe lɛ afee nakai yɛ gbɛ ni gbaŋ mɛi ni eba kpee lɛ shishi lɛ anaa loo egbalaŋ amɛjwɛŋmɔ kɛjɛŋ wiemɔ lɛ nɔ. Titri lɛ, esaaa akɛ amɛtaa sarawa hewalɛ kpaa kɛ wiemɔ lɛ kpaai lɛ ahe. Wɔhiɛ baasɔ ekome ni nyɛkɛ wɔ aaafee yɛ enɛ mli lɛ waa diɛŋtsɛ.
17 Naagbee: Wɔnine baashɛ nitsɔɔmɔ kɛ hewalɛwoo babaoo nɔ yɛ wɔ “Miishɛɛ Yijielɔi” Kpokpaa Wulu nɔ Kpeei lɛ ashishi koni wɔkɛha yijiemɔ ni wɔkɛhaa Yehowa lɛ afa. Akɛ nitsɔɔmɔ ni tamɔ nɛkɛ baaha yɛ wiemɔi, nɔkwɛmɔ nii, kɛ drama kome mli, kɛfata niishikpamɔi ni abaagba lɛ ahe. Eba akɛ Yehowa tsulɔ fɛɛ tsulɔ aaato gbɛjianɔ amrɔ nɛɛ koni ehi “Miishɛɛ Yijielɔi” Kpokpaa Wulu nɔ Kpeei lɛ ashishi gbii etɛ lɛ fɛɛ kɛjɛ lala kɛ sɔlemɔ ni akɛgbeleɔ kpee lɛ nɔ yɛ Sohaa leebi kɛyashi naagbee sɔlemɔ lɛ nɔ yɛ Hɔgbaa shwane.