Ani Oka Gbɛkɛnaashi Odaseyeli Okwɛ?

¹ Wɔ fɛɛ wɔnaa miishɛɛ yɛ yibii ni wɔwoɔ yɛ wɔ nitsumɔ mli lɛ hewɔ. Yɛ gbɛ kroko nɔ lɛ, kɛ wɔnyɛɛɛ wɔna akɛ wɔmiiwo yibii kpakpai lɛ, nitsumɔ lɛ tsumɔ baanyɛ afee tɔlɛ kɛ nɔ ni anyɛɛɛ atsu. Nitsumɔ ni shishinumɔ yɔɔ mli lɛ he baa sɛɛnamɔ kɛhaa mɔ, ni eji jɔɔmɔ. (Okɛto Jajelɔ 3:10-13 he.) Wɔbaanyɛ wɔkɛ shishitoo mla nɛɛ atsu wɔ shiɛmɔ nitsumɔ lɛ he nii. Niiashikpamɔ eha wɔle akɛ kɛ wɔtee shinaai anaa ni wɔnyɛ wɔkɛ mɛi gba Biblia lɛ he sane lɛ, wɔbaa shia akɛ mɛi ni ená hewalɛ yɛ mumɔŋ. Wɔnuɔ he akɛ wɔtsu nɔ ko lɛlɛŋ.

² Yɛ hei komɛi lɛ ewa waa akɛ aaana mɛi yɛ shia yɛ gbi lɛ mli ŋmɛlɛtswai lɛ ekomɛi amli. Amaniɛbɔi tsɔɔ akɛ yɛ hei pii lɛ, gbɔmɛi lɛ ayifalɛ fe 100 mlijaa 50 bɛ shia, beni wɔtee amɛŋɔɔ leebi mra lɛ. Asafoi babaoo etsu naagba nɛɛ he nii kɛtsɔ gbɛjianɔ sɔrɔtoi ni atoɔ kɛhaa gbɛkɛnaashi odaseyeli lɛ nɔ, ni amɛye omanye jogbaŋŋ diɛŋtsɛ. Shiɛlɔi bɔɔ amaniɛ akɛ, kɛ amɛtee mɛi aŋɔɔ gbɛkɛnaashi lɛ, amɛnaa mɛi babaoo yɛ shia, ni bei pii lɛ, etamɔ nɔ ni mɛi lɛ miijɔɔ amɛhe, ni amɛmiisumɔ waa akɛ amɛaabo Maŋtsɛyeli shɛɛ sane lɛ toi. Ani oka gbɛkɛnaashi odaseyeli yɛ nyɛ shikpɔŋkuku lɛ mli okwɛ pɛŋ?—Okɛto Marko 1:32-34 he.

³ Nyɛtoa Gbɛkɛnaashi Odaseyeli he Gbɛjianɔ: Yɛ hei komɛi lɛ áfĩ kpeei kɛha shiɛmɔyaa ni afeɔ beni je ebɔi namɔ lɛ sɛɛ jogbaŋŋ. Abaanyɛ asusu shiɛlɔi ni darako ni jɛɔ skul amɛbaa shwane kɛ onukpai ni ejɛ amɛ heloonaa nitsumɔ amɛba gbɛkɛnaashi lɛ ahe. Shiɛlɔi komɛi ni nyɛɛɛ aya shiɛmɔ yɛ otsii lɛ anaagbee lɛ naa akɛ, gbɛkɛnaashi odaseyeli yɛ otsi lɛ mli lɛ ji gbɛ kpakpa ni amɛtsɔɔ nɔ amɛkɛ amɛhe woɔ shiɛmɔ nitsumɔ lɛ mli daa.

⁴ Nitsumɔi sɔrɔtoi babaoo yɛ ni obaanyɛ otsu yɛ gbɛkɛnaashi odaseyeli lɛ mli. Obaanyɛ okɛ woji tɛtrɛbii aye odase yɛ shia kɛ shia loo ni okɛ woji ni akɛhaa yɛ nyɔŋ lɛ mli lɛ atsu nii. Gbɛkɛnaashi ji be ni hi ni aaaya mɛi ni bɛ shia beni shiɛlɔi kɛtee amɛŋɔɔ leebi mra loo yɛ otsii lɛ anaagbee lɛ aŋɔɔ. Ekolɛ abaanyɛ ana shikpɔŋkuku ni woɔ yibii hu kɛha gbɛjegbɛ nɔ odaseyeli, ni eha okɛ mɛi ni jɛɔ nitsumɔ amɛbaa shia lɛ agba sane. Mɛi babaoo naa akɛ gbɛkɛnaashi ji be ni hi fe fɛɛ ni akɛaafee sɛɛsaramɔi yɛ mɛi ni ejie miishɛɛ kpo amɛtsɔɔ lɛ anɔ.

⁵ Nyɛkwɛa Nyɛhe nɔ Jogbaŋŋ ni Nyɛkɛ Nilee Atsua Nii: Ni aaaje kpo beni eshwɛ fioo ni duŋ aaawo, loo beni duŋ ewo kwraa lɛ baanyɛ afee oshara yɛ hei komɛi. Eeefee nɔ ni nilee yɔɔ mli akɛ nyɛaanyiɛ enyɔnyɔ loo akɛ kui yɛ gbɛjegbɛi ni kanei ekpɛ nɔ jogbaŋŋ lɛ anɔ ni nyɛya shiai loo tsũi ni nyɛyɔɔ nɔmimaa akɛ efeŋ oshara kɛhaŋ nyɛ lɛ pɛ amli. Kɛ nyɛtswa shinaa lɛ, nyɛdamɔa he ni abaanyɛ ana nyɛ yɛ, ni nyɛjie nyɛhe shi nyɛtsɔɔ yɛ faŋŋ mli. Nyɛkɛ sanesɛɛkɔmɔ atsua nii. Kɛ nyɛyɔse akɛ nyɛba yɛ be ni esaaa mli, tamɔ be mli ni weku lɛ miiye nii lɛ, nyɛkɛɛa amɛ akɛ nyɛbaaba be kroko. Bei pii lɛ, nɔ ni hi fe fɛɛ ji ni nyɛaaye odase beni jeŋ ebɔi namɔ, moŋ fe ni nyɛaaya beni je ena kwraa ni ekolɛ shiatsɛmɛi lɛ miisaa amɛhe ni amɛwɔ gbɛkɛ lɛ.

⁶ Yɛ hei pii lɛ, esa jogbaŋŋ akɛ aaaye odase gbɛkɛ beni nyɔŋtsere la kpɛɔ lɛ. Eka shi faŋŋ akɛ, Yehowa baajɔɔ wɔ mɔdɛŋbɔi lɛ anɔ, yɛ be mli ni ‘wɔjaa lɛ nyɔŋ kɛ shwane lɛ.’—Kpoj. 7:15.