Sanekpakpa Lɛ Kɛhamɔ—Yɛ Gbɛkɛnaashi
1 Yudafoi osɔfonukpa lɛ kɛɛ Yesu Kristo mra be mli kaselɔi lɛ ateŋ mɛi komɛi akɛ, “Nyɛha Yerusalem eyi obɔ kɛ nyɛtsɔɔmɔ lɛ.” (Bɔfoi 5:28) Eka shi faŋŋ akɛ nyɛmimɛi lɛ etsu odaseyeli nitsumɔ babaoo yɛ nakai maŋtiase lɛ mli, ni ŋwanejee ko bɛ he akɛ amɛtsu nii waa kɛ ekaa bɔni afee ni amɛnine ashɛ mɛi fɛɛ ni yɔɔ amɛshikpɔŋkuku lɛ mli lɛ anɔ. Amɛtee nɔ amɛye odase ni emɔ shi jogbaŋŋ yɛ jɛmɛ kɛ hei krokomɛi hu.—Bɔfoi 8:25.
2 Yɛ hei pii ŋmɛnɛ hu lɛ, wɔkɛ anɔkwale lɛ tsɔɔmɔ lɛ ewo wɔshikpɔŋkuku lɛ fɛɛ mli obɔ. Shiɛlɔi ayifalɛ lɛ etee hiɛ babaoo diɛŋtsɛ ni eha asafoi lɛ hu ayifalɛ etee hiɛ nakai nɔŋŋ. Eha shikpɔŋkukuji ni atsuɔ nii yɛ mli lɛ efee bibii ni anyɛɔ atsu mli nii fɛɛ kɛgbeɔ naa shii abɔ. No hewɔ lɛ ehe ebahia akɛ wɔlɛɛ wɔshikpɔŋkuku lɛ mli bɔni afee ni wɔkɛ sanekpakpa lɛ ashɛ mɛi pii aŋɔɔ lolo.
SƐƐNAMƆI NI JƐƆ GBƐKƐNAASHI ODASEYELI MLI BAA
3 Amrɔ nɛɛ je lɛŋ bii pii tsɔɔ bɔ ni amɛnuɔ he waa amɛhaa Yehowa Odasefoi yɛ maŋ nɛɛ mli. Yɛ enɛ hewɔ lɛ, shiɛlɔi pii ena akɛ amɛbaanyɛ amɛtsɔ enɛ nɔ amɛkɛlɛɛ amɛshikpɔŋkuku lɛ mli kɛtsɔ mɛi lɛ aŋɔɔ ni amɛaaya gbɛkɛnaashi lɛ nɔ. Amɛnine nyɛɔ eshɛɔ shiatsɛmɛi pii ni efɔɔ kaa akɛ amɛbɛ shia yɛ gbi lɛ mli lɛ anɔ yɛ nakai beaŋ. Shiɛlɔi komɛi ebɔ amaniɛ akɛ amɛnaa mɛi yɛ shia fɛɛ shia mli yɛ amɛshikpɔŋkuku lɛ mli kɛ amɛtee jɛmɛ gbɛkɛnaashi. Ni jeee akɛ mɛi pii yɛ shia kɛkɛ, shi mɛi ni amɛkɛkpeɔ yɛ nakai beaŋ lɛ hu miijɔɔ amɛhe, ni no hewɔ lɛ amɛsumɔɔ ni amɛbo wɔsane lɛ toi. Kpokpaa nɔkwɛlɔi lɛ enyɛ amɛye amɛbua asafoi komɛi ni amɛnyɛ amɛto gbɛkɛnaashi shiɛmɔ he gbɛjianɔ yɛ amɛkui lɛ amli. Aawo shiɛlɔi fɛɛ hewalɛ ni amɛfi nɛkɛ daa Shɔ gbɛkɛnaashi gbɛjianɔtoo nɛɛ sɛɛ yɛ kpokpaa nɔkwɛlɔ lɛ saramɔ be lɛ mli.
4 Ani oka gbɛkɛnaashi odaseyeli yɛ oshikpɔŋkuku lɛ mli okwɛ da? Akɛni wɔmiikpa gbɛ akɛ wɔkɛ mɛi pii baakpe ni amɛmiijɔɔ amɛhe yɛ gbɛkɛnaashi hewɔ lɛ, ehaa wɔnaa hegbɛ ni wɔkɛyeɔ be babaoo fe bɔ ni ekolɛ wɔto ni wɔbaaye. Abaanyɛ akɛ gbɛkɛnaashi be lɛ fa atsu shia-kɛ-shia odaseyeli kɛ nilee aloo ni akɛya mɛi ni bɛ shia lɛ aŋɔɔ. Kɛkɛ Iɛ, ekolɛ sɛɛ mli yɛ nakai gbɛkɛnaashi lɛ, wɔbaanyɛ wɔya sɛɛsaramɔi aloo wɔyafee Biblia mli nikasemɔ. Ni kɛ sɛɛ mli yɛ afi lɛ mli ni wɔnyɛɛɛ wɔkɛ jetsɛremɔ belɛ atsu nii babaoo po lɛ, wɔbaanyɛ wɔkɛ gbɛkɛnaashi mra be lɛ atsu shia-kɛ-shia odaseyeli. Shi eji anɔkwale akɛ, ehe miihia waa ni wɔkɛ hiɛshikamɔ atsu nii ni wɔtsɔɔ nilee hu, titri lɛ kɛji wɔmiitsu nii yɛ hei ni ebɛ shweshweeshwe akɛ anyiɛɔ yɛ duŋ mli lɛ.
SUSUMƆ MƐI KROKOMƐI AHE
5 Kɛ wɔɔye omanye yɛ gbɛkɛnaashi odaseyeli mli lɛ, no lɛ ehe miihia ni wɔha otii pɔtɛɛ komɛi ahi wɔjwɛŋmɔ mli. Akɛ nɔkwɛmɔ nɔ lɛ, akɛni ekolɛ mɛi ni yɔɔ hei komɛi lɛ naaa mɛi ni basaraa amɛ trukaa yɛ gbɛkɛnaashi lɛ he miishɛɛ tsɔ hewɔ lɛ, wɔbaasumɔ ni wɔ hiɛkpamɔ wiemɔ lɛ aŋɔɔ ni naanyobɔɔ su ahi mli koni wɔha mɔ lɛ ale yiŋtoo hewɔ ni wɔba jɛmɛ lɛ amrɔ nɔŋŋ, ni wɔkɛ teokrase ŋaalee atsu nii. Kɛji wɔɔnyɛ wɔtsɔɔ bɔ ni wɔkɛ anɔkwayeli susuɔ shiatsɛmɛi lɛ ashihilɛ he wɔhaa lɛ jogbaŋŋ lɛ, no lɛ ebaaha amɛna wɔhe miishɛɛ ni ebaaha amɛwie yɛ wɔkɛ amɛ sanegbaa lɛ mli.
6 Yɛ hei komɛi lɛ, shiatsɛmɛi lɛ efee nibii komɛi bɔni afee ni amɛkɛbu amɛshweshweeshwe-feemɔ he. Ekolɛ enɛ baabi ni wɔtswa ŋmɛlɛ yɛ agbo lɛ sɛɛ, aloo nɔ kroko tamɔ nakai, yɛ bɔ ni shikpɔŋkuku lɛ ji lɛ naa. Kɛ wɔjie bulɛ kpo yɛ gbɛjianɔ ni shiatsɛ lɛ eto lɛ he lɛ, ebaaha ekpɛlɛ nɔ akɛ ebaabo anɔkwalei ni wɔtaoɔ wɔkɛ lɛ aja lɛ toi.
7 Asafoi pii eto kutuu odaseyeli he gbɛjianɔ yɛ gbɛkɛnaashi kome loo nɔ ni fe nakai amli yɛ otsi lɛ mli. Enɛ eha shiɛlɔi ni kɛ amɛbe fɛɛ tsuɔ heloonaa nitsumɔ lɛ ena hegbɛ babaoo ni amɛkɛ amɛhe ewo sɔɔmɔ nitsumɔ lɛ mli ni amɛnyɛ amɛkɛ shiɛlɔi ni amɛkɛ amɛ tsuko nii da akɛni amɛbe he gbɛjianɔtoo kɛ amɛnɔ kpaaa gbee lɛ po fɛɛ etsu nii. Gbɛkɛnaashi odaseyeli hu eha shiɛlɔi komɛi enyɛ amɛha be ni amɛyeɔ yɛ shiɛmɔ mli lɛ etee hiɛ, ni enɛ eha amɛbatsɔmɔ mɛi ni he esa yɛ sanekpakpa lɛ kɛ mɛi krokomɛi ahamɔ mli. Agbɛnɛ hu, anyɛ aje Biblia mli nikasemɔi pii ashishi yɛ nine ni nyɛ eshɛ mɛi ni boko Yehowa Odasefoi atoi da lɛ anɔ lɛ hewɔ.
8 Ani eeenyɛ eba akɛ obaanyɛ okɛ ohe awo gbɛkɛnaashi odaseyeli mli ni ona nɛkɛ hegbɛ ni akɛfata he nɛɛ mli ŋɔɔmɔ ni “[o]tsu sanekpakpa jajemɔ nitsumɔ lɛ”? (2 Tim. 4:5) Kɛji wɔteŋ mɛi babaoo baanyɛ aha nakai sanebimɔ lɛ hetoo akɛ hɛɛ lɛ, no lɛ ekolɛ wɔ hu wɔɔtsu nitsumɔ kpakpa ni ji anɔkwale lɛ ni wɔkɛaawo wɔshikpɔŋkuku lɛ fɛɛ mli obɔ.