Bɛ Obaanyɛ Okɛ Ohe Awo Gbɛkɛnaashi Odaseyeli Mli?
1. Taakɛ wolo ko tsɔɔ mli lɛ, mɛɛ be Paulo shiɛ yɛ shĩa kɛ shĩa?
1 Wolo ko (Daily Life in Bible Times) tsɔɔ mli akɛ ale bɔfo Paulo akɛ eshiɛ yɛ shĩa kɛ shĩa “kɛjɛ gbɛkɛnaashi ŋmɛji 4 kɛyashi jenamɔ tɔ̃ɔ.” Wɔleee kɛji Paulo je gbɛ eto eshiɛmɔ lɛ he gbɛjianɔ nɛkɛ lo, shi wɔle akɛ Paulo shwe waa koni ‘efee enɛ yɛ sanekpakpa lɛ hewɔ.’ (1 Kor. 9:19-23) Ekolɛ, nɔ ni baafata enɛ he ji ebe he gbɛjianɔ ni eto koni enyɛ eya shĩa kɛ shĩa be ni enine baanyɛ ashɛ mɛi babaoo anɔ.
2. Mɛni hewɔ gbɛkɛnaashi ji be ni hi jogbaŋŋ kɛha shiɛmɔ lɛ?
2 Yɛ hei babaoo lɛ, efɔɔ kaa akɛ shiɛlɔi yashiɛɔ yɛ shĩa kɛ shĩa daa leebi yɛ otsi lɛŋ. Kɛlɛ, ani be nɛɛ kã he eji be ni hi fe fɛɛ kɛha shiɛmɔ yɛ okutso lɛŋ? Gbɛgbalɔ ko wie eshikpɔŋkuku lɛ he akɛ: “Ewa akɛ abaana mɛi yɛ shĩa yɛ gbi lɛ mli. Shi, mɛi babaoo hiɔ shĩa gbɛkɛ.” Kɛ́ atee gbɛkɛnaashi shiɛmɔ lɛ, abaanyɛ ashiɛ sanekpakpa lɛ aha mɛi babaoo, titri lɛ, hii. Bei pii lɛ, mɛi ni wɔkɛkpeɔ yɛ shĩa lɛ náa dekã, ni amɛsumɔɔ ni amɛkɛ wɔ agba sane. Asafoŋ onukpai lɛ baanyɛ ato kpee kɛha shiɛmɔyaa he gbɛjianɔ gbɛkɛnaashi kɛ́ ebaahi.
3. Mɛɛ gbɛ nɔ wɔbaanyɛ wɔkɛ sɛɛyoomɔ atsu nii beni wɔshiɛɔ gbɛkɛnaashi lɛ?
3 Okɛ Sɛɛyoomɔ Atsu Nii: Ehe miihia ni wɔkɛ sɛɛyoomɔ atsu nii beni wɔshiɛɔ gbɛkɛnaashi lɛ. Akɛ nɔkwɛmɔnɔ lɛ, kɛ́ oyɔse akɛ be ni okɛtee mɔ lɛ ŋɔɔ lɛ ehiii haaa lɛ, ekolɛ beni eeye nii lɛ, ebaahi jogbaŋŋ akɛ obaakɛɛ lɛ akɛ obaaku osɛɛ oba be kroko. Kɛ́ duŋ ewo lɛ, daamɔ he ni mɔ lɛ baana bo jogbaŋŋ, ni ojie ohe shi otsɔɔ lɛ oya nɔŋŋ koni oha ele nɔ hewɔ ni oba. Nilee yɛ mli hu akɛ nyɛbaanyiɛ enyɔɔnyɔ loo akɛ kuu, ni nyɛnyiɛ hei ni kane yɔɔ jogbaŋŋ ni abaana nyɛ. Kaaya beni jenamɔ yi ewa koni okagba mɛi ni miihé ayakamɔ shi lɛ anaa. (2 Kor. 6:3) Kɛ́ akutso ko mli bɛ shweshweeshwe beni duŋ ewo lɛ, shiɛmɔ yɛ jɛmɛ beni duŋ woko.—Abɛi 22:3.
4. Mɛɛ jɔɔmɔi anáa kɛjɛɔ gbɛkɛnaashi odaseyeli mli?
4 Jɔɔmɔi: Wɔnáa miishɛɛ waa yɛ shiɛmɔ nitsumɔ lɛ mli kɛ́ wɔnyɛ wɔye mɛi odase. Babaoo ni wɔyeɔ odase lɛ, babaoo ni wɔnáa hegbɛi kɛyeɔ buaa mɛi krokomɛi koni ‘ahere amɛyiwala, ni amɛshɛ anɔkwale lɛ lee mli’ ji no. (1 Tim. 2:3, 4) Bɛ obaanyɛ oto obe he gbɛjianɔ koni okɛ ohe awo gbɛkɛnaashi odaseyeli mli?