Namɔ Baabo Wɔ Shɛɛ Sane lɛ Toi?
1 Aaha gbɔmɛi anine miishɛ saji babaoo nɔ fe bei fɛɛ ni eho yɛ adesai ayinɔsane mli, ni saji lɛ saŋŋ yɛ ni nilee bɛ mli, ni elakaa mɔ po. Nɔ ni ejɛ mli eba ji akɛ, enɛ gbaa gbɔmɛi babaoo ajwɛŋmɔ naa, ni ebafeɔ nɔ ni wa kɛhaa wɔ akɛ wɔnine aaashɛ amɛnɔ koni amɛbo Nyɔŋmɔ Maŋtsɛyeli lɛ he shɛɛ sane lɛ toi. Amɛnuuu hewalɛ kpakpa ni Nyɔŋmɔ Wiemɔ ni amɛbaabo toi lɛ baanyɛ aná yɛ amɛnɔ lɛ shishi.—Luka 11:28.
2 Wɔmli filiɔ wɔ akɛ yɛ je lɛŋ hei pii lɛ, gbɔmɛi akpei nyɔŋmai abɔ miibo nakai shɛɛ sane lɛ toi ni amɛmiikpɛlɛ shia Biblia mli nikasemɔi ni wɔkɛ amɛ aaafee lɛ nɔ. Shi kɛlɛ, bɔ ni ahereɔ nɔ ahaa lɛ eyaaa hiɛ tsɔ yɛ shikpɔŋkukuji krokomɛi amli. Nibii kpakpai jɛɛɛ mɛi babaoo ni wɔyasaraa amɛ yɛ shiɛmɔ nitsumɔ lɛ mli lɛ mli baaa, ni ekolɛ wɔbaasusu mɔ ni baabo wɔ shɛɛ sane lɛ toi lɛ he.
3 Esa akɛ wɔkwɛ jogbaŋŋ koni wɔnijiaŋ akaje wui. Paulo tsɔɔ mli akɛ: “ ‘Mɔ fɛɛ mɔ ni aaabo atsɛ Nuntsɔ [Yehowa, NW] gbɛi lɛ, aaahere eyiwala.’ Shi te aaafee tɛŋŋ ni amɛaabo amɛtsɛ́ mɔ ni . . . amɛnuko ehe sane lɛ amɛyeŋ? Ni asaŋ te aaafee tɛŋŋ ni amɛaanu kɛ shiɛlɔ ko bɛ lɛ? . . . Taakɛ bɔ ni aŋma akɛ: ‘Kwɛ bɔ ni hejɔlɛ he sanekpakpa shiɛlɔi ni shiɛɔ nii kpakpai lɛ anaji yɔɔ fɛo ha!’ ” (Rom. 10:13-15) Kɛ wɔkɛ ekãa du Maŋtsɛyeli dumɔwu lɛ, Nyɔŋmɔ baaha eda yɛ gbɔmɛi anɔkwafoi lɛ atsuii amli.—1 Kor. 3:6.
4 Yiŋtoo lɛ Ji ni Afee Sɛɛsaramɔi Daa: Yɛ shikpɔŋkukuji ni etamɔ nɔ ni mɛi fioo boɔ wɔ shɛɛ sane lɛ toi yɛ mli lɛ, ehe miihia ni wɔha wɔjwɛŋmɔ ahi miishɛɛ fɛɛ ni wɔbaanà, ni wɔha eya hiɛ lɛ nɔ, kɛ́ wɔkɛ wolo ko ha loo wɔkɛ eko haaa. Mɛni hewɔ esa akɛ omu sane naa oya akɛ anyɛŋ nɔ ko atsu yɛ mli lɛ? Kɛ wɔdu dumɔwu lɛ, wɔleee he ni ebaaye omanye yɛ. (Jaj. 11:6) Kɛ wɔtee ekoŋŋ beni wɔsaa wɔhe koni wɔkɛ mɛi ayagba nɔ ko he sane kɛjɛ Ŋmalɛi lɛ amli lɛ, kɛ eyɛ kuku po lɛ, wɔbaanyɛ wɔshɛ mɔ lɛ tsui he. Wɔbaanyɛ wɔshi dɛhiɛmɔ wolo ko loo woji tɛtrɛbii heei lɛ eko wɔha. Sɛɛ mli lɛ, wɔbaanyɛ wɔfee Biblia mli nikasemɔ he nɔkwɛmɔ nɔ. Wɔnaa baakpɛ wɔhe kɛ miishɛɛ akɛ wɔɔna bɔ ni Yehowa jɔɔ wɔ mɔdɛŋbɔi anɔ ehaa.—Lala 126:5, 6.
5 Ashi dɛhiɛmɔ wolo ko aha yoo ko ni jie miishɛɛ ko kpo lɛ. Ayanaaa lɛ yɛ shia dɔŋŋ kɛyashi nyɔji enyɔ sɛɛ, agbɛnɛ hu, ebɛ dekã kwraa akɛ ekɛ mɔ ko aaawie. Ashi dɛhiɛmɔ wolo lɛ nɔŋŋ aha lɛ. Yɛ mɔdɛŋ ni shiɛlɔ lɛ tee nɔ ebɔ akɛ eeena lɛ yɛ shia lɛ fɛɛ sɛɛ lɛ, ehé nyɔji etɛ kroko dani ayana lɛ, be mli ni ehe miiye. Nyɛmi yoo lɛ tee eŋɔɔ ekoŋŋ enɔ otsi, ni agba dɛhiɛmɔ wolo lɛ he sane kuku. Beni nyɛmi yoo lɛ ku esɛɛ etee eŋɔɔ yɛ otsi ni nyiɛ sɛɛ lɛ mli lɛ, yoo lɛ jie anɔkwa miishɛɛ kpo yɛ Maŋtsɛyeli shɛɛ sane lɛ he. Shihilɛi amli ni tsake yɛ ewala shihilɛ mli lɛ ha ehiɛ ba emumɔŋ hiamɔ nii anɔ. Aje Biblia mli nikasemɔ shishi, ni kɛjɛ no sɛɛ kɛyaa lɛ ekɛ miishɛɛ kase nii otsi fɛɛ otsi.
6 Taakɛ eji yɛ nɔ fɛɛ nɔ ni wɔsumɔɔ ni wɔna akɛ eekwɛ̃ lɛ gbɛfaŋ lɛ, kɛ́ fɔfɔii, ameo, sɛbɛ kɛ amɛhenɔi, loo miishɛɛ ni anáa yɛ Maŋtsɛyeli sane lɛ mli lɛ hu lɛ, shikpɔŋ lɛ nɔsaamɔ he miihia. No heɔ be, mɔdɛŋbɔɔ, nii anɔkwɛmɔ he su ni anáa, kɛ faishi ni atswaa akɛ ahaŋ nijiaŋ aje wui. Nyɛsɛɛ afi lɛ, abaptisi gbɔmɛi ni fa fe akpeiakpe kome mlijaa etɛ mli ekome ni Maŋtsɛyeli dumɔwu ebɔi kwɛ̃ɛ yɛ amɛmli lɛ! Kɛ wɔtee nɔ wɔshiɛ lɛ, wɔbaana nɔmimaa akɛ wɔbaana mɛi babaoo lolo ni baabo wɔ shɛɛ sane lɛ toi.—Okɛto Galatabii 6:9 he.