Fɔlɔi—Nyɛtsɔsea Nyɛbii Koni Amɛshiɛ

¹ Akɛ gbekɛbii pii ni miisumɔ yɛ anɔkwale mli akɛ amɛaasɔmɔ Nyɔŋmɔ ejɔɔ wɔ asafoi lɛ. (Jaj. 12:1) Amɛfata mɛi ni Yehowa efɔ̃ amɛ nine koni amɛbana eyijiemɔ mli gbɛfaŋnɔ lɛ he. (Lala 148:12-14) No hewɔ lɛ, esa akɛ gbɛtsɔɔmɔ ni tsɔɔ bɔ ni amɛkɛ mɛi krokomɛi aaagba amɛhemɔkɛyeli lɛ he sane yɛ Maŋtsɛyeli shiɛmɔ nitsumɔ lɛ mli lɛ afata tsɔsemɔ ni fɔlɔi kɛhaa amɛbii gbi fɛɛ gbi lɛ he.—5 Mose 6:6, 7.

² Tsɔsemɔ Gbekɛbii lɛ Fiofio Kɛya Hiɛ: Esa akɛ atsɔse gbekɛbii kɛjɛ amɛgbekɛbiiashi tɔ̃ɔ koni amɛfata amɛ fɔlɔi ahe yɛ shiɛmɔ nitsumɔ lɛ mli. Dani nyɛkɛ nyɛhe aaawo shiɛmɔ nitsumɔ lɛ mli lɛ, nyɛtsɔsea nyɛbii koni amɛkɛ amɛhe awo mli yɛ gbɛ ni shishinumɔ yɔɔ mli nɔ. Nyɛsusua nɔ ni nyɛkpaa gbɛ akɛ amɛaafee yɛ shinaa naa lɛ he kɛtsɔ hiɛ. Gbekɛbii ni darako kwraa lɛ baanyɛ amɛkɛ dɛhiɛmɔ woji aha, ni amɛkɛfɔ̃ mɛi anine kɛba Maŋtsɛyeli Asa lɛ nɔ. Abaanyɛ aha gbekɛbii bibii ni baanyɛ akane nii jogbaŋŋ lɛ akane ŋmalɛi yɛ shinaa naa. Amɛbaanyɛ amɛkɛ woji tɛtrɛbii aha yɛ be mli ni amɛkɛ shiɛmɔ wiemɔ kuku tsuɔ nii. Yɛ be mli ni amɛhe saa lɛ, nyɛtsɔsea amɛ ni amɛkɛ Biblia lɛ atsu nii yɛ amɛshiɛmɔ wiemɔ mli. Shiɛlɔi pii ni darako lɛ diɛŋtsɛ ená mɛi ni amɛyahaa amɛ woji tɛtrɛbii, ni amɛyafeɔ sɛɛsaramɔi daa. Ehi jogbaŋŋ akɛ gbekɛ kɛ mɔ ni eda aaatsu nii moŋ fe ni ekɛ gbekɛ kroko aaatsu nii. Mɔ ni eda lɛ baanyɛ etsɔɔ mli eha shiatsɛ lɛ akɛ, aatsɔse gbekɛ bibioo lɛ yɛ shiɛmɔ nitsumɔ lɛ mli.

³ Gbekɛ yoo bibioo ko bi onukpai lɛ koni amɛye amɛbua lɛ ni ehe anyɛ asa akɛ Maŋtsɛyeli shiɛlɔ. Eyɛ mli akɛ eye afii enumɔ pɛ yɛ nakai beaŋ, ni eleee nikanemɔ moŋ, shi enyɛɔ ekɛ Maŋtsɛyeli shɛɛ sane lɛ haa yɛ shinaai anaa yɛ gbɛ ni mɔɔ shi nɔ. Ekase he ni abaana ŋmalɛi lɛ yɛ lɛ ewo eyitsoŋ, ni egbeleɔ, ni ehaa shiatsɛ lɛ kaneɔ, kɛkɛ lɛ etsɔɔ mli.

⁴ Gbekɛ nuu ko ni eye afii enumɔ kɛ ehe wo shiɛmɔ nitsumɔ lɛ mli kɛ ekãa. Eshiɛ etsɔɔ eskulbii kɛ etsɔɔlɔi, ni no tsirɛ eklas tsɔɔlɔ lɛ ni ebi etsɛ akɛ eha lɛ Hii Shi Daa wolo lɛ eko. Beni kpokpaa nɔkwɛlɔ lɛ basara asafo lɛ nyɛsɛɛ nɛɛ, Nyɔŋmɔ Maŋtsɛyeli jajelɔ bibioo nɛɛ fɔ̃ e-Biblia mli nikaselɔi kɛ eskulbii lɛ anine koni amɛbabo maŋshiɛmɔ lɛ toi. Amɛteŋ mɛi nyɔŋma ba.

⁵ Esa akɛ fɔlɔi atsɔ amɛ nɔkwɛmɔ nɔ nɔ amɛtsɔɔ amɛbii anii koni amɛle bɔ ni be he gbɛjianɔ kpakpa ni atoɔ koni akɛ he awo shiɛmɔ nitsumɔ lɛ mli lɛ yɔɔ sɛɛnamɔ. Ehe miihia ni fɔlɔi ato daa otsi shiɛmɔ nitsumɔ he gbɛjianɔ ni tsakeee, koni akɛ he akpɛtɛ he, bɔni afee ni gbekɛbii lɛ ale otsi lɛ mli gbi ni ato akɛ akɛ he aaawo shiɛmɔ nitsumɔ lɛ mli daa.

⁶ Kɛ atsɔse gbekɛbii lɛ beni amɛdarako kwraa koni amɛsumɔ shiɛmɔ nitsumɔ lɛ ni amɛna mli ŋɔɔmɔ lɛ, ebaakanya amɛ koni amɛhe asa kɛha hegbɛi ni nɔ kwɔlɔ yɛ wɔsɛɛ be mli, ekolɛ ni gbɛgbamɔ nitsumɔ lɛ fata he. (1 Kor. 15:58) Esa akɛ wɔ fɛɛ wɔwo gbekɛbii ni yɔɔ wɔteŋ lɛ hewalɛ koni amɛya hiɛ jogbaŋŋ akɛ Yehowa yijielɔi.