Tsɔsemɔ Obii lɛ Koni Amɛjie Yehowa Yi
1. Ani gbekɛbii baanyɛ ajie Yehowa yi?
1 Lala 148:12, 13 woɔ gbekɛbii hii kɛ gbekɛbii yei hewalɛ koni “amɛjie Yehowa gbɛi lɛ yi.” Nɔkwɛmɔnii babaoo yɛ Ŋmalɛi lɛ amli ni tsɔɔ akɛ gbekɛbii jie Yehowa gbɛi lɛ yi. Ákɛ nɔkwɛmɔnɔ lɛ, “Samuel sɔmɔɔ yɛ Yehowa hiɛ; ni gbekɛ ji lɛ.” (1 Sam. 2:18) “Gbekɛ oblayoo fioo ko” ji mɔ ni kɛɛ Naeman ŋa lɛ akɛ Yehowa gbalɔ ko yɛ Israel ni baanyɛ atsá Naeman kpiti lɛ eha lɛ. (2 Maŋ. 5:1-3) Beni Yesu tee sɔlemɔwe lɛ ni efee naakpɛɛ nii wuji lɛ, “gbekɛbii” ji mɛi ni bolɔ akɛ: “Hosiana David bi lɛ!” (Mat. 21:15) Mɛɛ gbɛ nɔ fɔlɔi aaatsɔ atsɔse amɛbii lɛ koni amɛjie Yehowa yi?
2. Mɛni hewɔ ehe hiaa akɛ fɔlɔi afee nɔkwɛmɔnɔ kpakpa aha amɛbii lɛ?
2 Feemɔ Nɔkwɛmɔnɔ Kpakpa: Dani tsɛmɛi ni ji Israelbii lɛ aaadũ anɔkwale lɛ amɛwo amɛbii lɛ atsuiŋ lɛ, klɛŋklɛŋ lɛ afã amɛ ni amɛsumɔ Yehowa ni amɛha ekitai lɛ akã amɛtsuii anɔ. (5 Mose 6:5-9) Kɛ́ nyɛwie shiɛmɔ nitsumɔ lɛ he ekpakpa ni nyɛkɛ nyɛhe wo mli daa otsi lɛ, ebaaha nyɛbii lɛ abu shiɛmɔ nitsumɔ lɛ akɛ nitsumɔ ni he hiaa ni haa mɔ tsui nyɔɔ emli.
3. Mɛɛ gbɛ nɔ nyɛmiyoo ko ná nɔkwɛmɔnɔ kpakpa ni efɔlɔi fee lɛ he sɛɛ?
3 Nyɛmiyoo ko kɛ miishɛɛ wie egbekɛbiiashi he akɛ: “Beni miji gbekɛ lɛ, nibii ni wɔweku lɛ fɔɔ feemɔ lɛ ateŋ ekome ji wɔhe ni wɔkɛwoɔ shiɛmɔ nitsumɔ lɛ mli daa otsi naagbee. Mina akɛ mifɔlɔi nyaa shiɛmɔ he waa diɛŋtsɛ. Beni wɔdaa lɛ, wɔbu shiɛmɔ nitsumɔ lɛ akɛ nɔ ko ni haa mɔ náa miishɛɛ.” Nyɛmiyoo nɛɛ batsɔ shiɛlɔ ni abaptisiko lɛ beni eye afii kpawo, ni amrɔ nɛɛ eshwɛ fioo ni ebaaná afii 33 yɛ be-fɛɛ sɔɔmɔ lɛ mli.
4. Mɛni gbekɛbii ni aaatsɔse amɛ fiofio lɛ tsɔɔ?
4 Tsɔsemɔ ni Akɛhaa Fiofio: Kɛ́ nyɛkɛ nyɛbii lɛ tee shiɛmɔ lɛ, nyɛkahaa amɛnyiɛa nyɛsɛɛ kɛkɛ. Nyɛbaanyɛ nyɛha amɛtswa shinaa, amɛkɛ dɛhiɛmɔ wolo aha shiatsɛ lɛ, loo amɛkane ŋmalɛ. Enɛ baaha amɛná miishɛɛ babaoo, ni ebaaye ebua amɛ koni amɛná ekãa kɛshiɛ Maŋtsɛyeli shɛɛ sane lɛ. Beni amɛdaraa lɛ, esa akɛ gbɛfaŋnɔ ni amɛnáa yɛ shiɛmɔ nitsumɔ lɛ mli lɛ aya hiɛ. No hewɔ lɛ ye obua amɛ koni amɛya amɛhiɛ ni amɛkɛ Nyɔŋmɔjamɔ he otii amamɔ amɛhiɛ.
5. Mɛɛ taomɔ nii esa akɛ gbekɛ ashɛ he koni enyɛ esɔmɔ akɛ shiɛlɔ ni abaptisiko lɛ?
5 Kɛ́ ona akɛ obi lɛ baanyɛ atsɔ shiɛlɔ ni abaptisiko lɛ ni lɛ hu eesumɔ ni efee nakai lɛ, ha onukpai lɛ ale amrɔ nɔŋŋ. Kɛ́ amɛbatsɔmɔ shiɛlɔi lɛ, ebaaha amɛna akɛ sɔ̃ kã amɛnɔ akɛ amɛjie Yehowa yi. Ha ehi ojwɛŋmɔ mli akɛ ehe ehiaaa ni obi lɛ ale nii babaoo tamɔ mɔ ko ni eda ni abaptisi lɛ dani etsɔ shiɛlɔ ni abaptisiko lɛ. Ani obi lɛ nuɔ Biblia lɛ mli shishijee tsɔɔmɔi lɛ ashishi? Ani ekɛ Biblia lɛ mli shishitoo mlai ni kɔɔ jeŋba he lɛ tsuɔ nii? Ani eesumɔ ni ekɛ ehe awo shiɛmɔ nitsumɔ lɛ mli ni ana lɛ akɛ Yehowa Odasefonyo? Kɛ́ nakai ni lɛ, onukpai lɛ baanyɛ akwɛ akɛ eji mɔ ko ni sa akɛ esɔmɔɔ akɛ shiɛlɔ ni abaptisiko lɛ lo.—Kwɛmɔ Ato Wɔhe Gbɛjianɔ Koni Wɔfee Yehowa Suɔmɔnaa Nii, bf. 79-82.
6. Mɛni hewɔ sɛɛnamɔ yɔɔ he akɛ fɔlɔi aaatsɔse amɛbii lɛ?
6 Ebiɔ mɔdɛŋbɔɔ dani anyɛɔ atsɔseɔ gbekɛbii koni amɛjie Yehowa yi kɛjɛ amɛtsuiŋ. Shi kɛlɛ, kɛ́ fɔlɔi na akɛ amɛbii lɛ miiya amɛhiɛ yɛ Nyɔŋmɔjamɔ mli lɛ, ehaa amɛnáa miishɛɛ waa. Nɔ ni fe fɛɛ lɛ, kɛ́ gbekɛbii gba Yehowa naakpɛɛ nitsumɔi lɛ, ehaa Yehowa náa miishɛɛ.